ឧបនាយករដ្ឋមន្ត្រី ហង់ជួន ណារ៉ុន អញ្ជើញទស្សនកិច្ចនៅវិទ្យាល័យ ហ៊ុន សែន ប្រសូតិ ដើម្បីគាំទ្រការអនុវត្តស្តង់ដាសាលារៀនគំរូ
ភ្នំពេញ៖ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី១៩ ខែមិថុនា ឆ្នាំ២០២៤ បានអញ្ជើញទស្សនកិច្ចនៅវិទ្យាល័យ ហ៊ុន សែន ប្រសូតិ ដើម្បីគាំទ្រការអនុវត្តស្តង់ដាសាលារៀនគំរូ ដោយមានការចូលរួមពីសំណាក់ ឯកឧត្ដមអភិបាលរង នៃគណៈអភិបាលខេត្ត ឯកឧត្ដម លោកជំទាវ លោក លោកស្រី មន្ត្រីពាក់ព័ន្ធក្រោមឱវាទក្រសួង គណៈគ្រប់គ្រងសាលា លោកគ្រូ អ្នកគ្រូ មាតាបិតា អ្នកអាណាព្យាបាល តំណាងសហគមន៍ អាជ្ញាធរដែនដី និងសិស្សានុសិស្សសរុបចំនួនប្រមាណ ៣៥០នាក់។
ក្នុងឱកាសនេះ ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានផ្ដល់អនុសាសន៍ ដើម្បីបន្តលើកកម្ពស់គុណភាពអប់រំនៅវិទ្យាល័យ ដូចខាងក្រោម៖
– សូមកោតសរសើរ និងវាយតម្លៃខ្ពស់ ចំពោះគណៈគ្រប់គ្រង គណៈកម្មការគ្រប់គ្រងសាលារៀន លោកគ្រូ អ្នកគ្រូ មាតាបិតា អ្នកអាណាព្យាបាល សិស្សានុសិស្ស និងសហគមន៍ទាំងមូល ដែលបានខិតខំប្រឹងប្រែងអភិវឌ្ឍសាលារៀនឱ្យមានសោភ័ណភាពស្រស់បំព្រង លទ្ធភាពសិក្សារបស់សិស្សល្អប្រសើរ ទទួលបាននូវពានរង្វាន់ផ្សេងៗ ជាពិសេសប្រែក្លាយសាលាឱ្យទៅជាសាលារៀនគំរូ ស្ថិតនៅក្នុងចំណោមសាលារៀនឆ្នើម ឈានមុខ និងជាគំរូសម្រាប់សាលាផ្សេងទៀត ទោះបីជាសាលាស្ថិតនៅឆ្ងាយពីទីក្រុងក្តី។
– គូសបញ្ជាក់ផងដែរថា លទ្ធផលសិក្សាដ៏ល្អប្រសើរនេះ គឺបានឆ្លុះបញ្ចាំងពីការខិតខំប្រឹងប្រែងជាច្រើនឆ្នាំពីអ្នកពាក់ព័ន្ធទាំងអស់ ចាប់តាំងពីថ្នាក់មត្តេយ្យសិក្សា ថ្នាក់បឋមសិក្សា និងថ្នាក់មធ្យមសិក្សា ដែលអាចសម្រេចបានដោយមានកត្តាសំខាន់ៗចំនួន ៤ ដែលក្នុងនោះរួមមាន៖ សាលារៀន គ្រូបង្រៀន សិស្ស និងមាតាបិតា ដែលទាំងអស់នេះជាកត្តាសំខាន់ ធ្វើឱ្យសាលារៀនជាប់ស្តង់ដាសាលារៀនគំរូ និងសម្រេចបាននូវអត្រាជាប់សញ្ញាបត្រមធ្យមសិក្សាទុតិយភូមិបានល្អប្រសើរ ប្រមាណជាង៩០% ដែលខ្ពស់ជាងអត្រាថ្នាក់ជាតិ។
– ទោះបីជាជាប់ពានស្តង់ដាសាលារៀនគំរូក្តី ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី បានលើកទឹកចិត្តឱ្យវិទ្យាល័យត្រូវបន្តកែលម្អបន្ថែមទៀត តាមស្តង់ដាទាំង ៥រួមមាន៖ លទ្ធផលសិក្សារបស់សិស្ស, ការបង្រៀន និងរៀន ការចូលរួមរបស់សហគមន៍ ដំណើរប្រតិបត្តិ និងរដ្ឋបាលសាលារៀន និងគណនេយ្យភាពរបស់សាលារៀន ក៏ដូចជាសូចនាករទាំង ៨៣ នៃស្តង់ដាសាលារៀន គំរូ។
– ក្រសួងសូមគាំទ្រការប្ដេជ្ញាចិត្តរបស់គណៈគ្រប់គ្រង លោកគ្រូ អ្នកគ្រូ និងសហគមន៍ទាំងមូល ក្នុងការប្រែក្លាយវិទ្យាល័យនេះ ឱ្យទៅជាសាលារៀនជំនាន់ថ្មី ដែលនឹងទទួលបានការវិនិយោគបន្ថែមលើហេដ្ឋារចនាសម្ព័ន្ធ ការរៀបចំបន្ទប់រៀនតាមមុខវិជ្ជា បណ្ណាល័យសតវត្សរ៍ទី២១ ការផ្ដល់ឱកាសជូនគ្រូបង្រៀនក្នុងការទទួលបានការបំប៉នលើវិធីសាស្ត្របង្រៀនថ្មី ផ្ដល់ឱកាសដល់សិស្សានុសិស្សក្នុងការប្រើប្រាស់បច្ចេកវិទ្យាសម្រាប់ការរៀន ការកែលម្អបន្ទប់ពិសោធន៍ ជាពិសេស ប្រើប្រាស់បច្ចេកវិទ្យាកុំព្យូទ័រក្នុងការរៀន និងបង្រៀន។
– ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី ក៏បានលើកឡើងដែរថា ការចូលជាសាលារៀនជំនាន់ថ្មី នឹងត្រូវអនុវត្តវិធីសាស្ត្របង្រៀនថ្មី ជួយសិស្សានុសិស្សឱ្យចេះរៀន មានគោលដៅច្បាស់លាស់ ការប្រើប្រាស់បច្ចេកវិទ្យា និងភាសាបរទេសក្នុងការរៀន និងបង្រៀន មានឱកាសបង្កើតជាក្លឹបសិក្សា ស្វ័យភាពក្នុងការរៀនសូត្រទៅតាមចំណង់ចំណូលចិត្តរបស់សិស្សរៀងៗខ្លួន ក៏ដូចជាត្រៀមខ្លួនរួចរាល់សម្រាប់ឧត្ដមសិក្សា និងឱកាសក្នុងការទទួលបានអាហារូបករណ៍ទៅសិក្សាបន្តទាំងក្នុង និងក្រៅប្រទេស។
– លើកទឹកចិត្តឱ្យធ្វើទស្សនកិច្ចសិក្សានៅសាលារៀនជំនាន់ថ្មី ដូចជាវិទ្យាល័យព្រះស៊ីសុវត្ថិ ដើម្បីឱ្យលោកគ្រូ អ្នកគ្រូ ទទួលបាននូវចំណេះដឹងថ្មីៗ យល់ដឹងពីការបង្រៀនប្រើប្រាស់បច្ចេកវិទ្យាទំនើបៗ ដែលអាចជួយសិស្សឱ្យមានសមត្ថភាពសតវត្សទី២១ ដែលរៀនមិនមែនដើម្បីទន្ទេញចាំនោះទេ ពោលគឺរៀនដើម្បីចេះដោះស្រាយបញ្ហា ការធ្វើការជាក្រុម មានសមត្ថភាពធ្វើបទបង្ហាញ ភាពជាអ្នកដឹកនាំ ចេះស្រាវជ្រាវ ចេះប្រើប្រាស់បច្ចេកវិទ្យា និងកុំព្យូទ័រជាដើម។
សារជាថ្មីម្តង ឯកឧត្ដមបណ្ឌិតសភាចារ្យ ឧបនាយករដ្ឋមន្ត្រី សូមថ្លែងអំណរគុណចំពោះអ្នកពាក់ព័ន្ធទាំងអស់ដែលបានខិតខំប្រឹងប្រែងជួយគាំទ្រអភិវឌ្ឍសាលាកន្លងមក និងជឿជាក់ថា ប្រសិនបើមានការប្ដេជ្ញាចិត្តខ្ពស់ នោះវិទ្យាល័យ ហ៊ុន សែន ប្រសូតិ នឹងអាចប្រែក្លាយទៅជាវិទ្យាល័យជំនាន់ថ្មីនាពេលអនាគត៕
