ឯកឧត្តមសាស្ត្រាចារ្យ កុយ វ៉ាន់នី ទទួលជួបសំដែងការគួរសម និងពិភាក្សាការងារជាមួយគណៈប្រតិភូធុរកិច្ច សភាពាណិជ្ជកម្មកម្ពុជា ប្រចាំប្រទេសកាណាដា

ភ្នំពេញ៖ នាព្រឹកថ្ងៃទី៣ ខែមិថុនា ឆ្នាំ២០២៤ នៅទីស្តីការក្រសួងសុខាភិបាល ឯកឧត្តមសាស្ត្រាចារ្យ កុយ វ៉ាន់នី រដ្ឋលេខាធិការក្រសួងសុខាភិបាល បានទទួលជួបសំដែងការគួរសមជាមួយ លោក MO Kelvin ប្រធានក្រុមប្រឹក្សាសភាពាណិជ្ជកម្មកម្ពុជា ប្រចាំប្រទេសកាណាដា និងអមជាមួយគណៈប្រតិភូធុរកិច្ចកាណាដា សរុបចំនួន ១៥រូប។

ក្នុងនាមក្រសួងសុខាភិបាល ឯកឧត្តមសាស្ត្រាចារ្យរដ្ឋលេខាធិការ បានសំដែងការកោតសរសើរ ចំពោះការប្តេជ្ញាចិត្តរបស់អ្នកធុរកិច្ចជនប្រទេសកាណាដា ក្នុងការជំរុញទំនាក់ទំនងពាណិជ្ជកម្មដ៏រឹងមាំជាមួយប្រទេសកម្ពុជា។

ឯកឧត្តមសាស្ត្រាចារ្យ បានលើកឡើងពីគំនិតផ្តួចផ្តើមរបស់រាជរដ្ឋាភិបាល ក្នុងការជួយដល់ការអភិវឌ្ឍន៍សេដ្ឋកិច្ចកម្ពុជា ដោយបានសង្កត់ធ្ងន់លើសារៈសំខាន់នៃភាពជាដៃគូរវាងវិស័យសាធារណៈ និងវិស័យឯកជន ដើម្បីជំរុញកំណើនជីវភាព និងសុខភាពប្រជាពលរដ្ឋប្រកបដោយចីរភាព និងបង្កើតឱកាសសម្រាប់ធុរកិច្ចនៃប្រទេសទាំងពីរកម្ពុជា កាណាដា។

ជាកិច្ចបន្តតាមរយៈ ឯកឧត្តមសាស្ត្រាចារ្យរដ្ឋលេខាធិការ លោក MO Kelvin ប្រធានក្រុមប្រឹក្សាសភាពាណិជ្ជកម្មកម្ពុជាប្រចាំប្រទេសកាណាដា បានថ្លែងការអបអរសាទរ និងបានលើកឡើងថា សភាពាណិជ្ជកម្មកម្ពុជាប្រចាំប្រទេសកាណាដា បាននិងខិតខំបន្តចែករំលែកការយល់ដឹងដ៏មានតម្លៃអំពីឱកាសវិនិយោគរបស់នៅកម្ពុជា និងពិភាក្សាអំពីវិស័យសក្តានុពលសម្រាប់ភាពជាដៃគូ និងកិច្ចសហប្រតិបត្តិការលើវិស័យសុខាភិបាល ជាមួយគណៈប្រតិភូធុរកិច្ច មកពីប្រទេសកាណាដា។

លើសពីនេះទៀត ភាគីទាំងពីរបានឯកភាពលើសារៈសំខាន់នៃការបន្តកិច្ចសន្ទនា និងកិច្ចសហប្រតិបត្តិការដើម្បីពង្រឹងទំនាក់ទំនងពាណិជ្ជកម្មបន្ថែមទៀត និងជំរុញកំណើនសេដ្ឋកិច្ចក្នុងតំបន់ ដើម្បីស្វែងយល់ឱ្យកាន់តែស៊ីជម្រៅទៅលើបញ្ហាជាក់លាក់ និងស្វែងរកគម្រោងសហការដែលនឹងផ្តល់អត្ថប្រយោជន៍ដល់សហគមន៍ធុរកិច្ច និងរួមចំណែកដល់ភាពរីកចម្រើនទៅវិញទៅមក។

ឯកឧត្តមសាស្ត្រាចារ្យរដ្ឋលេខាធិការ បានថ្លែងអំណរគុណដ៏ជ្រាលជ្រៅដល់លោក MO Kelvin និងគណៈប្រតិភូធុរកិច្ច និងសូមស្វាគមន៍ចំពោះកិច្ចសហការបន្ថែមលើភាពជាដៃគូរវាងវិស័យសាធារណៈ និងវិស័យឯកជន (Public Private Partnership, PPP) លើវិស័យសុខាភិបាល តាមរយៈការវិនិយោគ ដូចជាផលិតផលឱសថ ចំណីអាហារ បច្ចេកវិទ្យាវេជ្ជសាស្ត្រ និងស្វែងយល់អំពីឱកាសក្នុងការអភិវឌ្ឍន៍បន្ថែមហេដ្ឋារចនាសម្ព័ន្ធ ក្នុងវិស័យសុខាភិបាលកម្ពុជា សំដៅការលើកកម្ពស់សុខុមាលភាព ការលើកកម្ពស់គុណភាពសេវាសុខាភិបាល និងការអភិវឌ្ឍធនធានមនុស្សសុខាភិបាល ដើម្បីរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕