ឯកឧត្តម សេរី ជំនះ អញ្ជើញជាអធិបតី ក្នុងពិធីប្រកួតរូបថតកាយរឹទិ្ធថ្នាក់ជាតិលើកទី២ វគ្គផ្តាច់ព្រ័ត្រ ក្រោមប្រធានបទ “ការអប់រំបរិយាបន្ន និងចីរភាព”
ភ្នំពេញ៖ ឯកឧត្តម សេរី ជំនះ រដ្ឋលេខាធិការ និងជាអនុប្រធានកាយរឹទិ្ធជាតិកម្ពុជា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា និងជាប្រធានកាយរឹទិ្ធជាតិកម្ពុជា នាថ្ងៃទី៣១ ខែឧសភា ឆ្នាំ២០២៤ បានអញ្ជើញជាអធិបតី នៃការប្រកួតរូបថតកាយរឹទិ្ធថ្នាក់ជាតិលើកទី២ វគ្គផ្តាច់ព្រ័ត្រ ក្រោមប្រធានបទ “ការអប់រំបរិយាបន្ន និងចីរភាព” ដែលរៀបចំធ្វើនៅសាលប្រជុំសាកលវិទ្យាល័យប៊ែលធីអន្តរជាតិ។
ព្រឹត្តិការណ៍នេះ បានចាប់ផ្តើមប្រកួតជម្រុះ តាំងពីដើមខែមករា ឆ្នាំ២០២៤ ដែលបេក្ខជនទាំងអស់ ត្រូវឆ្លងកាត់ការដាក់ពិន្ទុប្រកបដោយយុត្តិធម៌ និងសុក្រឹតពីគណៈកម្មការចំនួន ៥រូប ដែលសុទ្ធតែជាអ្នកជំនាញ និងមានវិជ្ជាជីវៈថតរូបអាជីព ដូចជាមកពីក្រសួងបរិស្ថាន ស្ថានីយទូរទស្សន៍បាយ័ន ក្រុមហ៊ុនAMS ក្រុមរៀនថត និងអ្នកផលិតមាតិកាដុំហ្វីល។ មានតែបេក្ខជនចំនួន ៥ក្រុមប៉ុណ្ណោះ ដែលបានឈានមកដល់វគ្គផ្តាច់ព្រ័តនេះ ហើយដែលត្រូវប្រកួតដណ្តើមជ័យលាភី លេខ១ លេខ២ និងលេខ៣ គឺបេក្ខជនមកពីកាយរឹទិ្ធជាតិកម្ពុជា ចំនួន២ក្រុម សមាគមន៍កាយឫទ្ធិនារីកម្ពុជា ចំនួន២ក្រុម និងសហភាពសហព័ន្ធយុវជនកម្ពុជា ១ក្រុម។
ជាលទ្ធផល៖
១. ជ័យលាភីលេខ១៖ បានទៅលើយុវជនកាយរឹទិ្ធ ព្រេជ វន្ថា មកពីខេត្តឧត្តរមានជ័យ
២. ជ័យលាភីលេខ២៖ បានទៅលើយុវតី សាន្ត ម៉ៃជឺលីង គឹមឡាង និងយុវតី ធឿន ម៉ូនីកា មកពីសមាគមន៍កាយឫទ្ធិនារីកម្ពុជា រាជធានីភ្នំពេញ
៣. ជ័យលាភីលេខ៣៖ បានទៅលើយុវតី ឆោម សុខឆដា មកពីសមាគមន៍កាយឫទ្ធិនារីកម្ពុជា ខេត្តកំពត។
សូមគូសបញ្ជាក់ថា យុវជន និងយុវតីដែលជាម្ចាស់ជ័យលាភីទាំង៣ក្រុម នឹងទទួលបានការបណ្តុះបណ្តាល និងហ្វឹកហាត់បន្ថែមទៀតលើជំនាញថតរូប ដើម្បីត្រៀមចូលរួម ប្រកួតរូបថតកាយរឹទិ្ធថ្នាក់តំបន់អាស៊ី-ប៉ាស៊ីហ្វិក លើកទី២៣ នាខែកក្កដា ខាងមុខនេះ។
