លោកជំទាវ ចម និម្មល អនុញ្ញាតឱ្យឯកអគ្គរដ្ឋទូតបង់ក្លាដែសប្រចាំកម្ពុជា ចូលជួបសម្តែងការគួរសម និងជម្រាបលា
ភ្នំពេញ៖ នៅរសៀលថ្ងៃចន្ទ ទី២៧ ខែឧសភា ឆ្នាំ២០២៤ នៅទីស្តីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម អនុញ្ញាតឱ្យឯកឧត្តម ម៉ូហាមេឌ អាប់ឌុល ហៃ (Mohammed Abdul Hye) ឯកអគ្គរដ្ឋទូតនៃសាធារណរដ្ឋប្រជាមានិតបង់ក្លាដែស ប្រចាំព្រះរាជាណាចក្រ កម្ពុជា ចូលជួបសម្តែង ការគួរសម និងជម្រាបលា។
ក្នុងជំនួបនេះផងដែរ ភាគីទាំងពីរបានពិភាក្សានិងផ្លាស់ប្តូរយោបល់គ្នាលើយន្តការនៃការពង្រឹងទំនាក់ទំនង ពាណិជ្ជកម្មទ្វេភាគី។
លោកជំទាវ រដ្ឋមន្រ្តី បានជម្រាបជូន ឯកឧត្តមអគ្គរដ្ឋទូតបង់ក្លាដែស អំពីកំណើនឡើង ជាវិជ្ជមាននូវទំហំពាណិជ្ជកម្មរវាង កម្ពុជា និងបង់ក្លាដែស នារយៈពេល ៤ខែ ដើមឆ្នាំ២០២៤ នេះ និងបានស្នើ ភាគី បង់ក្លាដែសពិនិត្យ និងកំណត់កាលបរិច្ឆេទដើម្បីរៀបចំកិច្ចប្រជុំលើកទី១ នៃក្រុមប្រឹក្សាពាណិជ្ជកម្មចម្រុះកម្ពុជា-បង់ក្លាដែស និងស្នើឱ្យភាគីបង់ក្លាដែស បន្តចុះអនុស្សរណៈនៃការយោគយល់គ្នាស្តីពីពាណិជ្ជកម្មអង្កររវាងប្រទេសទាំងពីរ៕
