ឯកឧត្តម សួស ប្រាថ្នា៖ ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ បានបញ្ចប់អាណត្តិរបស់ខ្លួន បន្ទាប់ពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ កាលពីថ្ងៃ២៦ ឧសភា

ភ្នំពេញ៖ ឯកឧត្តម សួស ប្រាថ្នា អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ បានលើកឡើងថា ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ បានបញ្ចប់អាណត្តិរបស់ខ្លួន បន្ទាប់ពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ កាលពីថ្ងៃ២៦ ខែឧសភា ឆ្នាំ២០២៤ កន្លងមកនេះ។

ក្នុងឱកាសអញ្ជើញបើកកិច្ចប្រជុំស្តីពីការផ្សព្វផ្សាយកិច្ចការត្រៀមចូលកាន់តំណែង
ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ អាណត្តិទី៤ នាថ្ងៃទី២៧ ខែឧសភា ឆ្នាំ២០២៤នេះ ឯកឧត្ដម សួស ប្រាថ្នា បានគូសរំលឹកថា ផ្អែកតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ រដ្ឋបាលទាំងពីរថ្នាក់នេះត្រូវមានក្រុមប្រឹក្សារបស់ខ្លួនដែលកើតឡើងពីការបោះឆ្នោតអសកល ដែលមានអាណត្តិរយៈពេល៥ឆ្នាំ ហើយត្រូវផុតកំណត់នៅពេលក្រុមប្រឹក្សាថ្មីចូលកាន់តំណែង ស្របតាមនីតិវិធីកំណត់ដោយច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ។ ហេតុនេះ ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣ បានបញ្ចប់អាណត្តិរបស់ខ្លួន បន្ទាប់ពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ កាលពីថ្ងៃ២៦ ខែឧសភា ឆ្នាំ២០២៤ ខាងកន្លងមកនេះ។

ឯកឧត្ដមមានប្រសាសន៍ថា ទន្ទឹមនេះ នៅក្នុងមាត្រា៦២ នៃច្បាប់ស្តីពីការគ្រប់គ្រងរាជធានី ខេត្ត ក្រុង ស្រុក ខណ្ឌ បានកំណត់ថា កិច្ចប្រជុំចូលកាន់តំណែងរបស់ក្រុមប្រឹក្សាជាប់ឆ្នោត អាណត្តិថ្មី ត្រូវធ្វើឡើងក្នុងរយៈពេលមិនលើសពី១៤ថ្ងៃ បន្ទាប់ពីគ.ជ.ប ប្រកាសជាផ្លូវការនូវលទ្ធផលបោះឆ្នោត ដែលផ្អែកតាមប្រតិទិនកំណត់សម្រាប់ការបោះឆ្នោតក្រុមប្រឹក្សាអាណត្តិទី៤នេះ គឺប្រព្រឹត្តទៅនាថ្ងៃទី៨ ខែមិថុនា ឆ្នាំ២០២៤។

ឯកឧត្ដម សួស ប្រាថ្នា បានថ្លែងថា អនុលោមតាមកម្មវិធីកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ ស្ថានភាព នៃការអនុវត្តតួនាទី ភារកិច្ច និងរចនាសម្ព័ន្ធត្រូវបានធ្វើការកែសម្រួលឡើងវិញជាបន្តបន្ទាប់ ដើម្បីធានាបាននូវស្វ័យភាព និងភាពជាម្ចាស់របស់ក្រុមប្រឹក្សាលើធនធានដែលបានផ្ទេរពីថ្នាក់ជាតិ ដើម្បីអនុវត្តមុខងារក្នុង ការផ្តល់សេវាសាធារណៈនានាជូនប្រជាពលរដ្ឋ និងការអភិវឌ្ឍមូលដ្ឋានប្រកបដោយប្រសិទ្ធភាព គណនេយ្យភាព និងបរិយាប័ន្ន។ ស្របតាមបរិការណ៍នៃការធ្វើកំណែទម្រង់នេះ ក្រសួងមហាផ្ទៃ បានពិនិត្យ ឃើញអំពីភាពចាំបាច់ក្នុងការបន្តគាំទ្រ និងអន្តរាគមន៍ដល់ក្រុមប្រឹក្សា អាណត្តិទី៤ ដែលនឹងត្រៀមចូលកាន់តំណែងនាពេលខាងមុខ បន្ទាប់ពីការបោះឆ្នោត តាមរយៈការដាក់ចេញនូវសេចក្តីណែនាំ(ថ្មី)ស្តីពីការរៀបចំបទបញ្ជាផ្ទៃក្នុងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ ដើម្បីកំណត់នូវវិធានទាំងឡាយសម្រាប់ក្រុមប្រឹក្សាមានមូលដ្ឋានក្នុងការរៀបចំ និងអនុម័តបទបញ្ជាផ្ទៃក្នុងឲ្យបានត្រឹមត្រូវ និងទាន់ពេលវេលារៀបចំ និងធានាឲ្យការរៀបចំបទបញ្ជាផ្ទៃក្នុងស្របតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។

ឯកឧត្ដម សួស ប្រាថ្នា គូសបញ្ជាក់ថា ហេតុនេះ កិច្ចប្រជុំរបស់យើង នាឱកាសនេះ នឹងធ្វើការផ្សព្វផ្សាយអំពីសេចក្តីណែនាំលេខ០២៤ សណន ចុះថ្ងៃទី១៦ ខែឧសភា ឆ្នាំ២០២៤ ស្តីពីការរៀបចំបទបញ្ជាផ្ទៃក្នុងរបស់ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ និងប្រកាសលេខ២៣៧៥ ប្រក ចុះថ្ងៃទី១៦ ខែឧសភា ឆ្នាំ២០២៤ ស្តីពីកិច្ចប្រជុំចូលកាន់តំណែង កិច្ចប្រជុំសាមញ្ញលើកទី១ និងកិច្ចប្រជុំសាមញ្ញលើកទី២របស់ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ក្នុងគោលបំណងធានាឲ្យការរៀបចំកិច្ចប្រជុំ របៀបបរបប ធ្វើការងារ និងដំណើរការនៃការចូលតំណែងក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ ប្រព្រឹត្តទៅដោយរលូនស្របតាមនីតិវិធីច្បាប់កំណត់ ៕