ឃាត់ខ្លួនជនសង្ស័យ ៣នាក់ក្រោយយកដាវសាំម៉ូរ៉ៃ និងកាំបិត កាប់ទៅលើជនរងគ្រោះ ខណៈពេលកំពុងមើលការប្រគុំតន្ត្រី នៅស្រុកមោងឬស្សី
ភ្នំពេញ៖ យោងបទបញ្ជាលោកឧត្តមសេនីយ៍ត្រី ហែម វុទ្ធី មេបញ្ជាការកងរាជវុធហត្ថខេត្តបាត់ដំបង នៅវេលាម៉ោង ០០និង១០នាទី រំលងអធ្រាត្រឈានចូលថ្ងៃទី២៦ ខែឧសភា ឆ្នាំ២០២៤ កម្លាំងអាវុធហត្ថដឹកនាំដោយលោក វរសេនីយ៍ត្រី លី គឹមហ៊ាង មេបញ្ជាការ មូលដ្ឋានកងរាជអាវុធហត្ថមោងឬស្សី បានបង្ក្រាបករណីហិង្សាដោយចេតនាស្ថានទម្ងន់ទោស នៅចំណុចអនុវិទ្យាល័យមោង ភូមិពោធិ៍១ ឃុំគារ ស្រុកមោងឬស្សី ខេត្តបាត់ដំបង។
ក្នុងការបង្ក្រាបបានឃាត់ខ្លួនជនសង្ស័យចំនួន ៣នាក់ តាមបណ្តឹងរបស់ជនរងគ្រោះឈ្មោះ វាសនា វណ្ណះ ភេទប្រុស អាយុ ២១ឆ្នាំ មុខរបរនៅផ្ទះ ទីលំនៅបច្ចុប្បន្នភូមិចកតូច ឃុំកកោះ ស្រុកមោងឬស្សី ខេត្តបាត់ដំបង ដោយក្រុមជនសង្ស័យបានធ្វើសកម្មភាពយកដាវសាំម៉ូរ៉ៃ និងកាំបិត បានធ្វើសកម្មភាពកាប់ទៅលើជនរងគ្រោះ ខណៈពេលដែលមើលការប្រគុំតន្ត្រីបណ្តាលឲ្យរងរបួសរយះត្រង់ប្រអប់ជើង និង ក្បាលជង្គង់ខាងឆ្វេងចេញឈាម កាលពីវេលាម៉ោង ២២និង០០នាទី ថ្ងៃទី២៥ ខែឧសភា ឆ្នាំ២០២៤ នៅចំណុចអនុវិទ្យាល័យមោង ភូមិពោធិ៍១ ឃុំគារ ស្រុកមោងឬស្សី ខេត្តបាត់ដំបង ។
កម្លាំងបានចាប់យកវត្ថុតាងកាំបិតចាចែត ចំនួន ០១ដើម ប្រហែល ៦៥សង់ទីម៉ែត្រ ម៉ូតូចំនួន ០១ គ្រឿង ម៉ាកហុងដាឃ្លីច ស៊េរីឆ្នាំ២០២០ ពណ៌ស ពាក់ផ្លាកលេខ បាត់ដំបង 1AL-7311 ទូរស័ព្ទចំនួន ០១ គ្រឿង ។
បច្ចុប្បន្នជនសង្ស័យ រួមនឹងវត្ថុតាងត្រូវបានមន្ត្រីជំនាញកងរាជអាវុធហត្ថខេត្តកំពុងកសាងសំណុំរឿងដើម្បីចាត់ការតាមនីតិវិធី៕
