ភ្នំពេញ៖ ឯកឧត្ដម ស្វាយ សំអ៊ាង អភិបាលខេត្ត និងជាប្រធានគណៈបញ្ជាការឯកភាពរដ្ខបាលខេត្ត នៅរសៀលថ្ងៃព្រហស្បតិ៍ ១រោច ខែពិសាខ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី២៣ ខែឧសភាឆ្នាំ២០២៤នេះ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខេត្ត ។
កិច្ចប្រជុំធ្វើឡើងដើម្បីផ្សព្វផ្សាយលិខិតលេខ ០០៨០ សខល ចុះថ្ងៃទី១៤ ខែឧសភា ឆ្នាំ២០២៤ របស់ក្រសួងសុខាភិបាល និងសេចក្ដីណែនាំលេខ ០០៨ សណន ចុះថ្ងៃទី២០ ខែមីនា ឆ្នាំ២០២៤ របស់ក្រសួងមហាផ្ទៃ ការបង្ក្រាប ទប់ស្កាត់បទល្មើសគ្រឿងញៀនឱ្យបានម៉ឺងម៉ាត់ ការគ្រប់គ្រងសភាពការណ៍សន្តិសណ្ដាប់ធ្នាប់ក្នុងការបោះឆ្នោតជ្រើសរើសក្រុមប្រឹក្សា អាណត្តិទី៤ ឆ្នាំ២០២៤ ព្រមទាំងគោលការណ៍ណែនាំមួយចំនួនជាធរមាន និងផែនការសកម្មភាពការងារសំខាន់ៗមួយចំនួនទៀតពាក់ព័ន្ធនឹងការងារសន្តិសុខសណ្ដាប់សង្គម ការពារធនធានធម្មជាតិ ការអនុវត្តលក្ខណសម្បត្តទី៧ នៃគោលនយោបាយភូមិ ឃុំ សង្កាត់មានសុវត្ថិភាពក្នុងដែនសមត្ថកិច្ចរបស់រដ្ឋបាលខេត្តស្ទឹងត្រែង៕
