លោកជំទាវ គឹម សេដ្ឋានី ចូលរួមកិច្ចប្រជុំថ្នាក់រដ្ឋមន្រ្តី ស្តីពីការកសាងភាពធន់អាកាសធាតុ ចាប់ផ្តើមពីការអប់រំកុមារតូច ដើម្បីអនាគតប្រកបដោយចីរភាព
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានដឹកនាំប្រតិភូកម្ពុជាចូលរួមក្នុងកិច្ចប្រជុំថ្នាក់រដ្ឋមន្រ្តីស្តីពីការកសាងភាពធន់អាកាសធាតុចាប់ផ្តើមពីការអប់រំកុមារតូចដើម្បីអនាគតប្រកបដោយចីរភាព នាថ្ងៃទី១៥ ខែឧសភា ឆ្នាំ២០២៤ នៅទីក្រុងវៀងច័ន្ទ ប្រទេសឡាវ។
វេទិកា និងកិច្ចប្រជុំនេះ ប្រមូលផ្តុំរដ្ឋមន្រ្តីអប់រំអាស៊ានដើម្បីរួមគ្នាដោះស្រាយបញ្ហាប្រឈម និងបង្កើតឱកាសក្នុងការផ្តល់នូវសិទ្ធិទទួលបានការថែទាំ និងការអប់រំកុមារតូចប្រកបដោយគុណភាពខ្ពស់ ឱ្យបានស្មើភាពគ្នាក្នុងបរិបទនៃការប្រែប្រួលអាកាសធាតុ។
ក្នុងកិច្ចប្រជុំថ្នាក់រដ្ឋមន្រ្តី លោកជំទាវរដ្ឋលេខាធិការប្រចាំការ បានចែករំលែកបទពិសោធន៍នៃការអនុវត្តគោលនយោបាយជាតិស្តីពីការគាំពារ និងការអប់រំកុមារតូច និងការអនុវត្តកម្មវិធីភាពធន់អាកាសធាតុក្នុងការគាំពារ និងការអប់រំកុមារតូច ដែលរួមមាន៖ (១) ការអនុវត្តគោលនយោបាយ និងកម្មវិធីជាតិគាំពារ និងថែទាំកុមារតូច ដែលមានលក្ខណៈទូលំទូលាយ និងពេញលេញ ដោយមានការចូលរួមពីគ្រប់ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ (២) ការធ្វើសមារណកម្មការបម្រែបម្រួលអាកាសធាតុ និងបរិស្ថានក្នុងកម្មវិធី និងសៀវភៅសិក្សាគោលការអប់រំកុមារ (៣) ការអភិវឌ្ឍសមត្ថភាពគ្រូមត្តេយ្យ អ្នកថែទាំ និងមាតាបិតាលើបម្រែលបម្រួលអាកាសធាតុ (៤) ការអនុវត្តវិធីសាស្រ្តបង្រៀន និងការលេងដែលផ្សារភ្ជាប់នឹងធម្មជាតិ និងបរិស្ថាន និង (៥) ការកសាងភាពជាដៃគូរវាងមាតាបិតា សហគមន៍ និងសាលារៀនក្នុងការលើកកម្ពស់ការយល់ដឹងពីបម្រែបម្រួលអាកាសធាតុ និងបរិស្ថាន និង (៦) និងការកសាងកិច្ចសហការ និងភាពជាដៃគូរវាងភាគីពាក់ព័ន្ធក្នុងតំបន់អាស៊ាន និងក្រៅតំបន់អាស៊ាន។
កិច្ចប្រជុំថ្នាក់រដ្ឋមន្រ្តី បានអនុម័តរួមគ្នាលើសេចក្តីថ្លែងការណ៍ទីក្រុងវៀងច័ន្ទ ស្តីពីសមធម៌ ការទទួលបានការអប់រំ និងបរិស្ថាន៖ ការកសាងភាពធន់នៃការអប់រំកុមារតូចក្នុងតំបន់អាស៊ាន (Vientiane Statement on Equity, Access and Environment: Advancing Climate Resilience in Early Childhood Settings in ASEAN) ដែលនឹងត្រូវដាក់ជូនកិច្ចប្រជុំកំពូលអាស៊ានលើកទី៤៤-៤៥។ នៅក្នុងសេចក្ដីថ្លែងការណ៍នេះ រដ្ឋមន្ត្រីអប់រំអាស៊ាន បានប្តេជ្ញាចិត្តរួមគ្នាក្នុងការលើកកម្ពស់ការទទួលបានការគាំពារ និងការអប់រំកុមារតូចប្រកបដោយគុណភាព និងសមធម៌ ការស្វែងរកឱកាស និងភាពជាដៃគូក្នុងការបង្កើនវិនិយោគលើការអប់រំកុមារតូច និងការលើកកម្ពស់ការយល់ដឹង និងការផ្លាស់ប្តូរឥរិយាបថស្ដីពីបម្រែបម្រួលអាកាសធាតុ និងបរិស្ថានពីកម្រិតកុមារតូច ៕
