ឧបនាយករដ្ឋមន្ត្រី ទៀ សីហា អញ្ជើញគោរពវិញ្ញាណក្ខ័ន្ធ និងជូនដំណើរសពយោធិនពលី ទាំង ២០រូប ដែលបានបាត់បង់ជីវិតក្នុងសោកនាដកម្មឧបទ្ទវហេតុផ្ទុះគ្រាប់នៅក្នុងបញ្ជាការដ្ឋាន យោធភូមិភាគទី៣

ភ្នំពេញ៖ នារសៀលថ្ងៃទី២៨ ខែមេសា ឆ្នាំ២០២៤ ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងារចុះជួយមូលដ្ឋានខេត្តកំពង់ស្ពឺ បានអញ្ជើញគោរពវិញ្ញាណក្ខ័ន្ធ និងជូនដំណើរសពយោធិនពលី ទាំង ២០រូប ដែលបានបាត់បង់ជីវិតក្នុងសោកនាដកម្មឧបទ្ទវហេតុផ្ទុះគ្រាប់នៅក្នុងបញ្ជាការដ្ឋាន យោធភូមិភាគទី៣។

វត្តមានរបស់ឯកឧត្តមទាំងពីរ រួមទាំងឥស្សរជនរាជរដ្ឋាភិបាលដទៃទៀត បានឆ្លុះបញ្ចាំងពីការយកចិត្តទុកដាក់របស់ថ្នាក់ដឹកនាំកំពូលរបស់ជាតិ ជាពិសេសសម្តេចធិបតី នាយករដ្ឋមន្រ្តី តែងនៅជាមួយក្រុមគ្រួសារសព និងជនរងគ្រោះទាំងអស់ ដើម្បីជួយសម្រាលទុក្ខលំបាក និងចាត់ចែងជូនដំណើរសពទាំងអស់ឱ្យបានខ្ពង់ខ្ពស់តាមប្រពៃណី និងពិធីការកងទ័ព។

ស្ថិតក្នុងសមានទុក្ខដ៏ក្រៀមក្រំនេះ ថ្នាក់ដឹកនាំទាំងអស់ បានចូលរួមរំលែកទុក្ខ ជាមួយក្រុមគ្រួសារសព ចំពោះការបាត់បង់សមាជិកគ្រួសារជាទីគោរពស្រលាញ់ គួរឱ្យសោកស្តាយជាទីបំផុត។

គួររំឭកផងដែរថា កាលពីរសៀល ថ្ងៃទី២៧ ខែមេសា ឆ្នាំ២០២៤ មានហេតុការណ៍ផ្ទុះគ្រាប់ នៅក្នុងបរិវេណបញ្ជាការដ្ឋានយោធភូមិភាគទី៣ ដែលបានបណ្តាលឱ្យស្លាប់ យោធិន ២០ រូប យោធិន និងប្រជាពលរដ្ឋក្បែរខាងរងរបួសធ្ងន់ ស្រាលជាច្រើននាក់ផ្សេងទៀត ព្រមទាំងខូចខាតទ្រព្យសម្បត្តិរបស់អង្គភាព ប្រជាពលរដ្ឋ និងរោងចក្រសហគ្រាសជាច្រើនទៀត ៕