សម្តេចតេជោ៖ ពេលមានគ្រោះមហន្តរាយផ្សេងៗ អ្នកមាននៅស្រុកខ្មែរ នាំគ្នាបរិច្ចាគថវិកាជួយជាតិ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានកិត្តិយសសមាគមឧកញ៉ាកម្ពុជា បានថ្លែងថា នៅពេលមានគ្រោះមហន្តរាយផ្សេងៗ ជាពិសេសពេលមានជំងឺកូវីដ១៩ អ្នកមាននៅស្រុកខ្មែរនាំគ្នាបរិច្ចាគ ថវិកាជួយជាតិ ដោយថវិកាប្រមាណជិត ២០០លានដុល្លារ ត្រូវបានចូលរួមពីសប្បុរសជន ដើម្បីជួយដោះស្រាយបញ្ហាក្នុងសង្គម។

សម្តេចតេជោ ហ៊ុន សែន បានថ្លែងបែបនេះ ក្នុងឱកាសដែលសម្តេចអញ្ជើញសំណេះសំណាល ក្នុងសន្និបាតលើកទី១ និងកម្មវិធីពិសាអាហារសាមគ្គីមហាគ្រួសារសមាគមឧកញ៉ាកម្ពុជា ដែលធ្វើឡើងនៅសណ្ឋាគារហ្គាដិនស៊ីធី រាជធានីភ្នំពេញ នាល្ងាចថ្ងៃសុក្រ ទី២៦ ខែមេសា ២០២៤។

សម្តេចតេជោ បានបញ្ជាក់ថា ពេលមានប្រធានស័ក្តិម្តងៗ ក្រុមឧកញ៉ា អ្នកមានប្រាក់ តែងចេញមុខ ដើម្បីជួយរាជរដ្ឋាភិបាល។ កាលៈទេសៈ មានគ្រោះទឹកជំនន់ មានគ្រោះរាំងស្ងួត ពិសេសពេលមានកូវីដ១៩ ខ្ញុំគិតថា ប្រាក់ប្រមាណជិត ២០០លានដុល្លារ ដែលក្រុមឧកញ៉ា អ្នកមានបានផ្តល់ដល់រាជរដ្ឋាភិបាល។

សម្តេចតេជោ ហ៊ុន សែន បានថ្លែងថា បើធៀបជាមួយប្រទេសអ្នកមាន គេមានអ្នកមានធនធានច្រើនណាស់ តែការចូលរួមមិនដូចនៅកម្ពុជានោះទេ។ សម្តេចតេជោ បានរំលឹកថា ពេលជំងឺកូវីដ១៩ រាតត្បាត សម្តេចមិនធ្វើឱ្យពលរដ្ឋអត់កន្លែងដេកព្យាបាលជំងឺនោះឡើយ។

សម្តេចតេជោ ហ៊ុន សែន បានថ្លែងថា ទឹកចិត្តនៃការចែករំលែករបស់ឧកញ៉ា និងអ្នកឧកញ៉ា គឺមហាធំធេងណាស់ ហើយសម្តេចរីករាយ ពេលឃើញឧកញ៉ា និងអ្នកឧកញ៉ា ចូលក្រាបបង្គំគាល់ព្រះមហាក្សត្រ និងថ្វាយថវិកា ដើម្បីព្រះមហាក្សត្របំពេញព្រះរាជសកម្មភាពមនុស្សធម៌ ៕