ឯកឧត្តមទេសរដ្ឋមន្រ្តី សក់ សេដ្ឋា អញ្ជើញជាអធិបតីក្នុងពិធីសំណេះសំណាលប្រគល់ទទួលរថយន្តដល់ខេត្តគោលដៅចំនួន ៩ នៃគម្រោងអាហារូបត្ថម្ភនៅកម្ពុជា
ភ្នំពេញ៖ ទីស្តីការក្រសួងមហាផ្ទៃ នាព្រឹកថ្ងៃព្រហស្បតិ៍ ទី១៨ ខែមេសា ឆ្នាំ២០២៤ ឯកឧត្តម សក់ សេដ្ឋា ទេសរដ្ឋមន្រ្តីទទួលបន្ទុកបេសកកម្មពិសេស និងជាអនុប្រធានអចិន្ត្រៃយ៍ គ.ជ.អ.ប. តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន គ.ជ.អ.ប. អញ្ជើញជាអធិបតីក្នុងពិធីសំណេះសំណាលប្រគល់ទទួលរថយន្តដល់ខេត្តគោលដៅចំនួន ០៩ នៃគម្រោងអាហារូបត្ថម្ភនៅកម្ពុជាដែលរៀបចំដោយលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប.)។
ឯកឧត្តម សក់ សេដ្ឋា ទេសរដ្ឋមន្រ្តីទទួលបន្ទុកបេសកកម្មពិសេស បានផ្តល់អនុសាសន៍សំខាន់ៗមួយចំនួនក្នុងអង្គពិធីដូចជា៖
១.) ស្នើរដ្ឋបាលគោលដៅទាំង៩ គ្រប់គ្រងប្រើប្រាស់ និងថែរទាំរថយន្តដែលបានប្រគល់ទាំងនេះឱ្យបានល្អ និងចំគោលដៅនៃការអនុវត្តសកម្មភាពនានាពាក់ព័ន្ធនឹងគម្រោងអាហារូបត្ថម្ភនៅកម្ពុជា
២.) ស្នើឱ្យរដ្ឋបាលគោលដៅបន្តយកចិត្តទុកដាក់និងគាំទ្រដល់ការអនុវត្តគម្រោងអាហារូបត្ថម្ភនៅកម្ពុជាដល់រដ្ឋបាលក្រុង និងឃុំ សង្កាត់ ឱ្យដល់គោលដៅដើម្បីឱ្យរដ្ឋបាលទាំងនេះអនុវត្តសកម្មភាពនានានៃគម្រោងប្រកប ដោយប្រសិទ្ធភាព ភាពត្រឹមត្រូវតាមគោលការណ៍និងនីតិវិធីនៃការអនុវត្តគម្រោង។
៣.) ស្នើសុំឱ្យរដ្ឋបាលក្រុង ស្រុក និង ឃុំ សង្កាត់គោលដៅទាំងអស់ត្រូវពង្រឹងការទទួលខុសត្រូវ និងការអនុវត្តកិច្ចការដ៏មានសារៈសំខាន់នេះដើម្បីជាប្រយោជន៍ដល់ការលើកកម្ពស់សុខភាពរបស់ស្ត្រី និងកុមារ ជាពិសេសគឺកុមារនេះតែម្ដង ដែលជាទំពាំងស្នង ឫស្សីនាពេលអនាគត។
៤.) ស្នើសុំឱ្យលេខាធិការដ្ឋាន គ.ជ.អ.ប. សហការជាមួយក្រសួងសុខាភិបាលនិងក្រសួងស្ថាប័នពាក់ព័ន្ធ និងដៃគូអភិវឌ្ឍន៍ត្រូវផ្តល់ការគាំទ្រតាមដានត្រួតពិនិត្យ និងវាយតម្លៃលើការអនុវត្តគម្រោងនេះដើម្បីធានាឱ្យការអនុវត្តគម្រោងនេះទទួលបានលទ្ធផលនានាតាមការរំពឹងទុកនឹងអាចឈានដល់ការពង្រឹងការអនុវត្តគម្រោងនេះទៅរដ្ឋបាលថ្នាក់ក្រោមជាតិទូទាំងប្រទេសផងដែរ និងស្នើសុំលេខាធិការដ្ឋានគ.ជ.អ.ប.ពិនិត្យលទ្ធភាពក្នុងការសិក្សាបទពិសោធនៃការអនុវត្តគម្រោងដើម្បីរៀបចំជាប្រព័ន្ធរបស់រដ្ឋាភិបាល សម្រាប់ការអនុវត្តនៅរដ្ឋបាលថ្នាក់ក្រោមជាតិនៅពេលអនាគត។
គួរបញ្ជាក់ដែរថា គម្រោងអាហារូបត្ថម្ភនៅកម្ពុជានេះមានគោលបំណងដើម្បីធ្វើឱ្យប្រសើរឡើងនូវការប្រើប្រាស់គុណភាពនៃសេវាអាហាររូបត្ថម្ភជាអាទិភាពសម្រាប់សុខុមាលភាពមាតា និងកុមារប្រកបដោយប្រសិទ្ធភាពសំដៅធានានិរន្តភាពនិងស័ក្តិសិទ្ធិភាព នៃការផ្ដល់ហិរញ្ញប្បទានសម្រាប់សេវាសុខភាពបន្តពូជ អាហារូបត្ថម្ភសម្រាប់មាតា និងកុមារព្រមទាំងចូលរួមកាត់បន្ថយអត្រាភាពក្រិនរបស់កុមារ នៅក្នុងខេត្តគោលដៅចំនួន០៩ ក្រុងស្រុកចំនួន ៦៦ និងឃុំ សង្កាត់ចំនួន ៤២០ និងភូមិចំនួន ២.៩០៥ នៃព្រះរាជាណាចក្រកម្ពុជា៕
