ឯកឧត្តម ងួន រតនៈ អញ្ជើញចុះសួរសុខទុក្ខអ្នកជំងឺ ដែលកំពុងទទួលសេវាព្យាបាល នៅមន្ទីរពេទ្យបង្អែកខេត្ត និងកុមារកំព្រា នៅមណ្ឌលកុមារកំព្រាខេត្តកំពង់ធំ
ភ្នំពេញ៖ ឯកឧត្តម ងួន រតនៈ អភិបាលខេត្តកំពង់ធំ និងក្រុមការងារ អញ្ជើញចុះសួរសុខទុក្ខអ្នកជំងឺ ចំនួន ១៥០នាក់ ដែលកំពុងសម្រាកទទួលសេវាសុខាភិបាល នៅមន្ទីរពេទ្យបង្អែកខេត្តកំពង់ធំ និងបន្តដំណើរនាំយកនូវថវិកា នំដានីហ្សា ភេសជ្ជៈ ចែកជូនដល់កុមារកំព្រា នៅមណ្ឌលកុមារកំព្រាខេត្តកំពង់ធំ នាព្រឹកថ្ងៃទី១២ ខែមេសា ឆ្នាំ២០២៤ ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ខាងមុខនេះ ។
ជាមួយគ្នានោះដែរ ឯកឧត្តម ងួន រតនៈ បានកោតសរសើរដល់មន្ទីរពេទ្យបង្អែកខេត្ត ដែលរៀបចំហេដ្ឋារចនាសម្ព័ន្ធ មានរៀបរៀបរយ មានអនាម័យ ផ្ដល់បរិយាយល្អសម្រាប់អ្នកជំងឺ អាគារទាំងអស់ត្រូវបានជួសជុលកែលម្អយ៉ាងស្អាត មានសោភ័ណ្ឌភាពល្អ ជាពិសេសបានផ្តល់សេវាទទួលព្យាបាលអ្នកជំងឺ ២៤ម៉ោង លើ២៤ម៉ោង ជូនបងប្អូនប្រជាពលរដ្ឋដែលមកពីគ្រប់មជ្ឍដ្ឋានទាំងអស់។ ឯកឧត្តមបន្តថា នេះជាការយកចិត្តទុកដាក់ខ្ពស់របស់មន្ត្រីសុខាភិបាល តាមការចង្អុលបង្ហាញរបស់ ប្រមុខរាជរដ្ឋាភិបាល ដោយត្រូវពង្រឹងការផ្តល់សេវាសាធារណៈ ជាពិសេសសេវាសុខភាព គឺត្រូវតែលើកកម្ពស់និងបន្តការយកចិត្តទុកដាក់។
ដើម្បីជៀសវាងពីការឆ្លងជំងឺ ឯកឧត្តម ងួន រតនៈ អភិបាលខេត្តកំពង់ធំ បានណែនាំដល់ប្រជាពលរដ្ឋទាំងអស់ ត្រូវបន្ថែមការយល់ដឹងពីប្រភេទជំងឺនីមួយៗ ត្រូវមានការការពារប្រុងប្រយ័ត្ន និងត្រូវថែរក្សាសុខភាព មានអនាម័យក្នុងការរស់នៅប្រចាំថ្ងៃ។ លើសពីនេះ ឯកឧត្តម បានណែនាំដល់មន្រ្ដីសុខាភិបាលទាំងអស់ ត្រូវបន្តការយកចិត្តទុកដាក់ព្យាបាលថែទាំអ្នកជំងឺឲ្យបានល្អ និងជូនពរដល់អ្នកជំងឺទាំងអស់ឆាប់ជាសះស្បើយ ដើម្បីបានជួបជុំក្រុមគ្រួសារ នាឱកាសពិធីបុណ្យចូលឆ្នាំថ្មីនេះ។
ក្នុងថ្ងៃដដែលនោះ ឯកឧត្តម អភិបាលខេត្តកំពង់ធំ បានបន្តដំណើរនាំយកនូវថវិកា នំដានីហ្សា ភេសជ្ជៈ ចែកជូនដល់កុមារកំព្រា នៅមណ្ឌលកុមារកំព្រាខេត្តកំពង់ធំ និងមានប្រសាសន៍ថា ការរស់នៅជា កុមារកំព្រា ពិតជាបានឆ្លងកាត់នូវការលំបាកគ្រប់ឧបសគ្គ ពុំមានឪពុកម្តាយបងប្អូនសម្រាប់មើលថែនោះទេ។ ប៉ុន្តែឧបកសគ្គទាំងនេះ គឺជាមេរៀនមួយសម្រាប់អោយកូនៗ ចៅៗ ទាំងអស់ខិតខំតស៊ូព្យាយាមប្រឹងប្រែង ជំនះរាល់កាលំបាកទាំងនេះ ដើម្បីអនាគតខ្លួនឯងនាពេលខាងមុខ។ ឯកឧត្តម បានមានប្រសាសន៍បន្តថាៈ ការជួបជុំគ្នាថ្ងៃនេះគឺដើម្បីបន្កើនភាពស្និទ្ធស្នាលនិងក្តីស្រឡាញ់ ជាមួយកូនៗ ក្មួយ ចៅៗ កុមារកំព្រា ដែលរស់នៅគ្មានឪពុកម្តាយ សាច់ញាតិបងប្អូន ប៉ុន្តែសូមក្មួយៗចៅៗកុំព្រួយបារម្ភ និង ត្រូវតាំងចិត្តខិតខំរៀនសូត្រអោយក្លាយខ្លួនជាសិស្សល្អ កូនល្អ និង ពលរដ្ឋល្អ ដើម្បីអនាគតខ្លួនឯង ក្លាយជាទំពាំងស្នងឬស្សី ឬជាធនធានមនុស្សដ៏សំខាន់សម្រាប់កិច្ចអភិវឌ្ឍន៍សង្គមជាតិនាពេលខាងមុខ។ ថ្នាក់ដឹកនាំគ្រប់លំដាប់ថ្នាក់ មិនដែលព្រងើយកន្តើយ ឬនៅឆ្ងាយពីកុមារទាំងអស់គ្នានោះទេ គឺតែងនឹករលឹកជានិច្ច ទោះបីមិនបានរស់នៅជាមួយគ្នា ពិតមែនក៏ប៉ុន្តែសុខទុក្ខទាំងឡាយ របស់កុមារទំាងអស់នោះក៏ជាសុខទុក្ខរបស់ថ្នាក់ដឹកនាំផងដែរ ៕
