ឯកឧត្តម ស្វាយ សំអ៊ាង៖ កម្លាំងនគរបាលជាតិ ក៏ដូចជាកម្លាំងការពារព្រំដែន មានភារកិច្ចការពារបូរណភាពទឹកដី

ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្តស្ទឹងត្រែង បានមានប្រសាសន៍ថា ការពិតណាស់កងកម្លាំងរបស់យើងតែងតែបំពេញភារកិច្ចព្រោះថាយើងជាកម្លាំងនគរបាលជាតិ, ក៏ដូចជាកម្លាំងការពារព្រំដែន ចឹងយើងមានភារកិច្ចការពារបូរណភាពទឹកដី និងជាសេនាធិការឱ្យស្នងការនគរបាលខេត្ដ និងជាសេនាធិការអោយក្រសួងមហាផ្ទៃ ក៏ដូចជាអគ្គស្នងការនគរបាលជាតិ ក្នុងការថែរក្សាសន្តិសុខ សណ្ដាប់ធ្នាប់ និងសុវត្ថិភាពសង្គម។

ឯកឧត្តម ស្វាយ សំអ៊ាង បានលើកឡើងបែននេះ នៅថ្ងៃទី០៩ ខែមេសា ឆ្នាំ២០២៤ខណៈ ឯកឧត្តម និងឯកឧត្តម ឈាង ឡាក់ ប្រធានក្រុមប្រឹក្សាខេត្ត អញ្ជើញចុះសួរសុខទុក្ខ និងនាំអំណោយរបស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ ផ្ដល់ជូនដល់កងកម្លាំងនគរបាលការពារព្រំដែនគោកលេខ៧០១ និងកងកម្លាំងកងរាជអាវុធហត្ថខេត្ត ដែលឈរជើងនៅតាមខ្សែបន្ទាត់ព្រំដែនកម្ពុជា-ឡាវ នៅវរសេនាតូចនគរបាលការពារព្រំដែនគោកលេខ៧០១។

ឯកឧត្តមអភិបាលខេត្ត បានបន្ដទៀតថា ការខិតខំប្រឹងប្រែងកងកម្លាំងរបស់យើងមានការតស៊ូព្យាយាមដើម្បីជម្នះនូវការលំបាកនេះដើម្បីធ្វើឱ្យទទួលបានលទ្ធផលល្អប្រសើរ ដូចជាកិច្ចសហប្រតិបត្តិការការបោះបង្គោលព្រំដែនបំពេញបន្ថែម ក៏ដូចជាបង្គោលព្រំដែនដែលជាការកំណត់នូវព្រំដែនកម្ពុជា-ឡាវ រួមទាំងការសហការគ្នាដើម្បីទប់ស្កាត់នូវបទល្មើសផ្សេងៗដែលជាស្មារតីរបស់កងកម្លាំងដែលបានខិតខំប្រឹងប្រែងយ៉ាងសកម្មដែលទទួលបានលទ្ធផលល្អប្រសើរ៕