លោកជំទាវរដ្ឋមន្ត្រី ចម និម្មល ទទួលជួបប្រធានសភាពាណិជ្ជកម្មចិន សម្ព័ន្ធសហគ្រិននៅតំបន់ឆ្នេរសមុទ្រ និងក្រុមហ៊ុនសាន់វ៉ា គ្រុប

ភ្នំពេញ៖ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម នាថ្ងៃទី៩ ខែមេសា ឆ្នាំ២០២៤ បានអនុញ្ញាតជូន លោក Jonathan K.S. Choi ប្រធានសភាពាណិជ្ជកម្មចិន សម្ព័ន្ធសហគ្រិននៅតំបន់ឆ្នេរសមុទ្រ និងក្រុមហ៊ុនសាន់វ៉ា គ្រុប អមដំណើរដោយគណៈប្រតិភូមកពី ក្វាងទុង ហុងកុង និងម៉ាកាវ នៃប្រទេសចិន ជាង ៦០រូប ចូលជួបសម្តែងការគួរសម និងពិភាក្សាការងារក្នុងគោលបំណងពង្រឹងកិច្ចសហប្រតិបត្តិការរវាងភាគីទាំងពីរ។

លោកជំទាវរដ្ឋមន្ត្រី បានសម្តែងនូវការស្វាគមន៍យ៉ាងកក់ក្តៅចំពោះវត្តមាន លោក Jonathan K.S. Choi រួមទាំងគណៈប្រតិភូចិនគ្រប់រូប ដែលបានអញ្ជើញមកដល់ទីស្ដីការក្រសួងពាណិជ្ជកម្ម ក៏ដូចជាបានមកបំពេញទស្សនកិច្ចដោយផ្ទាល់នៅព្រះរាជាណាចក្រកម្ពុជា។

លោកជំទាវរដ្ឋមន្ត្រី បានមានប្រសាសន៍បង្ហាញនូវការសាទរ និងគាំទ្រចំពោះគោលបំណងជំរុញកំណើននៃការធ្វើពាណិជ្ជកម្ម និងវិនិយោគទ្វេភាគី បន្ថែមទៀត។ ស្របពេលជាមួយគ្នានេះ លោកជំទាវរដ្ឋមន្ត្រី បានមានប្រសាសន៍ណែនាំដល់ភាគីក្រុមហ៊ុន ក្នុងការទំនាក់ទំនង និងសិក្សាលើគម្រោងដែលបានលើកឡើងពីខាងដើមនេះ ជាមួយក្រសួង-ស្ថាប័នពាក់ព័ន្ធ ដើម្បីសម្រេចបាននូវលទ្ធផលប្រកបដោយប្រសិទ្ធភាព។ ហើយក្រសួងពាណិជ្ជកម្មរីករាយក្នុងការសហការ និងជួយសម្របសម្រួលជូនដល់វិនិយោគិនទាំងឡាយ ក្នុងក្របខណ្ឌពាណិជ្ជកម្ម ដើម្បីជំរុញកិច្ចសហប្រតិបត្តិការបានកាន់តែច្រើនឡើងបន្ថែមទៀត។

ក្នុងឱកាសនៃជំនួបនេះ លោក Jonathan K.S. Choi បានថ្លែងអំណរគុណជូនចំពោះ លោកជំទាវរដ្ឋមន្ត្រី ដែលបានឆ្លៀតពេលវេលាដ៏មមាញឹក ទទួលជួបរូបលោក និងគណៈប្រតិភូទាំងអស់ ហើយលោកក៏បានលើកឡើងពីគោលបំណង និងចំណាប់អារម្មណ៍ពីការវិនិយោគលើវិស័យនានាជាច្រើនក្នុងប្រទេសកម្ពុជា រួមមាន៖ ឌីជីថល ឡូជីស្ទីក ថាមពល អចលនទ្រព្យ ផលិតកម្មលើការកែច្នៃ ជាដើម។ ស្របពេលជាមួយគ្នានេះ គណៈប្រតិភូជាវិនិយោគិន ក៏បានស្នើសុំការបញ្ជាក់ចំពោះលក្ខខណ្ឌនៃការធ្វើពាណិជ្ជកម្មមួយចំនួនក្នុងប្រទេសកម្ពុជា ផងដែរ ៕