ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការក្រសួងធនធានទឹក ចុះពិនិត្យវឌ្ឍនភាពការងារអនុវត្តគម្រោង ក្នុងភូមិសាស្ត្រខេត្តពោធិ៍សាត់
ភ្នំពេញ៖ ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការ ក្រសួងធនធានទឹក និងឧតុនិយម អមដំណើរដោយមន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តពោធី៍សាត់ រួមជាមួយអាជ្ញាធរមូលដ្ឋាន បានអញ្ជើញចុះពិនិត្យវឌ្ឍនគម្រោងមួយចំនួន ដែលអនុវត្តដោយនាយកដ្ឋានវិស្វកម្មនៃក្រសួងធនធានទឹក និងឧតុនិយម ស្ថិតនៅក្នុងភូមិសាស្រ្តស្រុកកណ្ដៀង ខេត្តពោធិ៍សាត់។
ក្នុងឱកាសនោះ ឯកឧត្តមរដ្ឋលេខាធិការប្រចាំ និងគណៈប្រតិភូ បានអញ្ជើញចុះពិនិត្យជាក់ស្តែងវឌ្ឍនភាពគម្រោងសាងសង់សំណង់ស្ទាក់ទឹកពោធិ៍អណ្តែត ស្ថិតនៅក្នុងឃុំកញ្ជរ និងគម្រោងស្តារទ្បើងវិញប្រទ្បាយមេចារឹក(MC2) ដែលស្ថិតនៅក្នុងឃុំអន្លង់វិល និងឃុំកញ្ជរ ស្រុកកណ្តៀង។
ឯកឧត្តមរដ្ឋលេខាធិការប្រចាំការមានប្រសាសន៍ថា គម្រោងសាងសង់សំណង់ស្ទាក់ទឹកពោធិ៍អណ្តែតត្រូវប្រើរយៈពេល ២ឆ្នាំ ដើម្បីសាងសង់ ហើយគិតមកដល់ពេលនេះវឌ្ឍនភាពការងារសម្រេចបានប្រមាណ ៣៥%។
ឯកឧត្តមរដ្ឋលេខាធិការប្រចាំការបញ្ជាក់ថា គម្រោងនេះអាចបង្កើនសមត្ថភាពស្រោចស្រពបន្ថែមដល់ផ្ទៃដីបង្កបង្កើនផលរដូវវស្សាចំនួន ១៣៨៥ហិកតា និងរដូវប្រាំងចំនួន ៥៩៥ ហិកតា ព្រមទាំងដំណាំរួមផ្សំចំនួន ៩០ហិកតា ដោយមានប្រជាពលរដ្ឋប្រមាណ ២២០៩គ្រួសារបានទទួលផលពីគម្រោងនេះ។
ដោយឡែក ចំពោះគម្រោងស្តារឡើងវិញប្រឡាយមេចារឹក ឯកឧត្តមរដ្ឋលេខាធិការបញ្ជាក់ថា គិតមកដល់ពេលនេះ វឌ្ឍនភាពការងារសម្រេចបានប្រមាណ ៤០% ក្នុងនោះការងារស្តារប្រទ្បាយមេចារឹក ប្រវែង ៥០០០ម៉ែត្រ សម្រេចបាន ៧៥% និងការងារជួសជុលសាងសង់សំណង់សិល្បការចំនួន ៣កន្លែងសម្រេចបាន ២៥%។
សូមបញ្ជាក់ថា គម្រោងស្តារឡើងវិញប្រឡាយមេចារឹក (MC2) មានទំហំការងារដែលត្រូវអនុវត្តចំនួន២ គឺ៖ ទី១).ស្តារប្រឡាយមេប្រវែង ៥,០០០ម៉ែត្រ និងទី២).សំណង់សិល្បការចំនួន ៣កន្លែង។ ប្រទ្បាយមេចារឹក(MC2) មានលទ្ធភាពស្រោចស្រពលើផ្ទៃដីបង្កបង្កើនផលសរុប ២,១០០ហិកតា និងដំណាំរួមផ្សំ ចំនួន ២០ហិកតា ព្រមទាំងមានប្រជាពលរដ្ឋទទួលផល ចំនួន ១,៦១៦គ្រួសារ ៕
