រដ្ឋបាលខេត្តស្ទឹងត្រែង បើកកិច្ចប្រជុំត្រួតពិនិត្យវឌ្ឍនភាពការងាររបស់រដ្ឋបាលខេត្តប្រចាំខែមីនា ឆ្នាំ២០២៤ និងលើកទិសដៅភារកិច្ចបន្ត

ភ្នំពេញ៖ នាព្រឹកថ្ងៃសុក្រ ៥រោច ខែផល្គុន ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៩ ខែមីនា ឆ្នាំ២០២៤ លោក ស៊ី សួន អភិបាលស្តីទី នៃគណៈអភិបាលខេត្តស្ទឹងត្រែង បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងាររបស់រដ្ឋបាលខេត្តប្រចាំខែមីនា ឆ្នាំ២០២៤ និងលើកទិសដៅភារកិច្ចបន្ត ក្នុងគោលបំណងត្រួតពិនិត្យវឌ្ឍនភាពការងារ និងពង្រឹងប្រសិទ្ធភាពក្នុងការអនុវត្តការងាររបស់មន្ទីរវិស័យឲ្យកាន់តែមានប្រសិទ្ធភាពខ្ពស់ថែមទៀត។

កិច្ចប្រជុំនេះមានការអញ្ជើញចូលរួមពីសំណាក់ អភិបាលរងខេត្ត នាយករដ្ឋបាលសាលាខេត្ត អភិបាល អភិបាលរងក្រុង ស្រុក ថ្នាក់ដឹកនាំកម្លាំងទាំងបីប្រភេទ ប្រធាន អនុប្រធានមន្ទីរអង្គភាពជុំវិញខេត្ត នាយករងរដ្ឋបាលសាលាខេត្ត នាយក នាយករងទីចាត់ការ អង្គភាពចំណុះសាលាខេត្ត និងមន្រ្តីពាក់ព័ន្ធមួយចំនួនទៀត នៅសាលប្រជុំសាលាខេត្ត។

ទន្ទឹមនិងនេះដែរកិច្ចប្រជុំ ក៏បានវាយតម្លៃខ្ពស់ លើការអនុវត្តការងាររបស់មន្ទីរអង្គភាពជុំវិញខេត្ត និងរដ្ឋបាលខេត្តដែល បានអនុវត្តកន្លងមកយ៉ាងល្អប្រសើរ ព្រមទាំងបានណែនាំឲ្យស្ថាប័ន មន្ទីរ អង្គភាពជំនាញ សមត្ថកិច្ចពាក់ព័ន្ធ អាជ្ញាធរគ្រប់លំដាប់ថ្នាក់ និងអង្គភាពកងកម្លាំងប្រដាប់អាវុធគ្រប់ប្រភេទ បន្តយកចិត្តទុកដាក់អនុវត្តការងារទៅតាមទិសដៅផែនការដែលបានដាក់ចេញ ដើម្បីនាំគ្នារួមចំណែកថែរក្សាសុខសន្តិភាពនិងអភិវឌ្ឍន៍ខេត្តស្ទឹងត្រែងឲ្យមានភាពរីកចំរើន ៕