ឯកឧត្តមរដ្ឋមន្ត្រី ប៊ិន ត្រឈៃ អញ្ជើញដឹកនាំកិច្ចប្រជុំលើកទី២ របស់គណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជននិងអភិវឌ្ឍន៍ (ICPD)
ភ្នំពេញ៖ នាព្រឹកថ្ងៃទី២៨ ខែមីនា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ និងជាប្រធានគណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជននិងអភិវឌ្ឍន៍ (សរសេរកាត់ គ.អ.ស.អ.ប.អ.) បានអញ្ជើញដឹកនាំកិច្ចប្រជុំលើកទី២ ឆ្នាំ២០២៤ របស់ គ.អ.ស.អ.ប.អ. ដើម្បីពិភាក្សាអំពីក្របខ័ណ្ឌយុទ្ធសាស្ត្រកម្ពុជា និងផែនការសកម្មភាព ២០២៤-២០៣០ សម្រាប់តាមដានការអនុវត្តកម្មវិធីសកម្មភាព (PoA) នៃសន្និសីទអន្តរជាតិស្តីពីប្រជាជននិងអភិវឌ្ឍន៍។
កិច្ចប្រជុំនេះ ផ្តោតលើការកសាងក្របខ័ណ្ឌយុទ្ធសាស្ត្ររបស់កម្ពុជា និងផែនការសកម្មភាពឆ្នាំ ២០២៤-២០៣០ សម្រាប់ពិនិត្យ តាមដាន និងវាយតម្លៃ ការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជននិងអភិវឌ្ឍន៍ ដែលក្នុងនោះរួមមានការពិភាក្សាលើប្រភពធនធានហិរញ្ញវត្ថុ ការប៉ាន់ស្មានថវិកា ការត្រួតពិនិត្យវាយតម្លៃសមិទ្ធផលនិងបញ្ហាប្រឈម និងបញ្ហាផ្សេងៗទៀត។
គួររំលឹកថា គណៈកម្មាធិការពិសេសតាមដានការអនុវត្តកម្មវិធីសកម្មភាព នៃសន្និសីទអន្តរជាតិស្តីពីប្រជាជននិងអភិវឌ្ឍន៍ ត្រូវបានបង្កើតឡើង ដើម្បីជួយរាជរដ្ឋាភិបាលកម្ពុជា ក្នុងការតាមដាននិងពន្លឿនការអនុវត្តកម្មវិធីសកម្មភាពនៃសន្និសីទអន្តរជាតិស្តីពីប្រជាជននិងអភិវឌ្ឍន៍ ប្រកបដោយប្រសិទ្ធភាពនិងប្រសិទ្ធផលក្នុងក្របខ័ណ្ឌអភិវឌ្ឍន៍ជាតិ និងគោលដៅអភិវឌ្ឍន៍ប្រកបដោយចីរភាពកម្ពុជា ៕
