ឧត្តមសេនីយ៍ទោ សិទ្ធិ ឡោះ ណែនាំឲ្យកងកម្លាំងនគរបាល ខិតខំយកចិត្តទុកដាក់បំពេញតួនាទីភារកិច្ចរបស់ខ្លួនឲ្យបានល្អ គោរពវិន័យរបស់នគរបាលជាតិ

ភ្នំពេញ៖ ការបង្កើតកងអនុសេនាតូចនេះឡើងគឺដើម្បីដោះស្រាយរាល់សភាពការណ៍កើតឡើងជាយថាហេតុ ក្នុងខេត្ត ។ នេះគឺជាការលើកឡើងរបស់លោកឧត្តមសេនីយ៍ទោសិទ្ធិ ឡោះ ស្នងការនគរបាលខេត្តបន្ទាយមានជ័យ នៅថ្ងៃទី២៥ ខែមីនា ឆ្នាំ២០២៤ នៅស្នងការដ្ឋាននគរបាលខេត្ត ក្នុងពិធីសំណេះសំណាលជាមួយកងកម្លាំងនគរបាលការិយាល័យជំនាញចំណុះស្នងការដ្ឋានក្រោយពិធីគោរពទង់ជាតិ ដោយមានការចូលរួមពីលោក លោកស្រី ឧត្តមសេនីយ៍ វរសេនីយ៍ ស្នងការរង នាយ នាយរងការិយាល័យ នាយ នាយផ្នែកនិងមន្ត្រីនគរបាលជាច្រើនរូប ។

នាឱកាសនោះផងដែរ លោកឧត្តមសេនីយ៍ទោ សិទ្ធិ ឡោះ បានណែនាំដល់កងកម្លាំងនគរបាលទាំងអស់ត្រូវខិតខំយកចិត្តទុកដាក់បំពេញតួនាទីភារកិច្ចរបស់ខ្លួនឲ្យបានល្អ គោរពវិន័យរបស់នគរបាលជាតិ ។ដោយឡែកចំពោះការបង្កើតកងអនុសេនាតូច(កម្លាំងអន្តរាគមន៍ពិសេស)នេះ គឺក្នុងគោលបំណងដើម្បីដោះស្រាយរាល់សភាពការណ៍ណាមួយកើតឡើង ដូច្នេះលោកស្នងការរងដែលគ្រប់គ្រងកងកម្លាំងក្នុងកងអនុសេនាតូចនេះត្រូវត្រួតពិនិត្យកម្លាំងរបស់ខ្លួនគឺត្រូវមានសម្ភារៈ គ្រឿងបរិក្ខាបានគ្រប់គ្រាន់សម្លៀកបំពាក់ត្រិមត្រូវដែលស្នងការដ្ឋានបានបំពាក់ជូន ហើយពេលមានសភាពការណ៍អ្វីកើតឡើងត្រូវប្រមូលផ្តុំកម្លាំងឲ្យបានទាន់ពេលវេលា។

លោកឧត្តមសេនីយ៍ស្នងការបានបញ្ជាក់ថា៖ ដើម្បីធានាបានស្ថេរភាព សន្តិសុខ សណ្តាប់ឆ្នាប់ សុវត្ថិភាពសង្គម គឺត្រូវយកចិត្តទុកដាក់ ធានាសុវត្ថិភាពជូនឥស្សរជនជាន់ខ្ពស់ជាតិ អន្តរជាតិដែលចុះមកបំពេញទស្សនកិច្ចឬចុះសួរសុខទុក្ខចែកអំណោយជូនប្រជាពលរដ្ឋ ។ ពិសេសនៅថ្ងៃបុណ្យចូលឆ្នាំប្រពៃណីជាតិនាពេលខាងមុខនេះត្រូវយកចិត្តទុកដាក់ពង្រឹងវិធានការជំនាញ ដោយអនុវត្តផែនការបង្ការទប់ស្កាត់ បង្រ្កាបអំពើលួចឆក់ ប្លន់ បង្រ្កាបបទល្មើសគ្រឿងញៀននិងបង្រ្កាបក្រុមក្មេងទំនើងឲ្យមានប្រសិទ្ធិភាព ។ បន្តរឹតបន្តឹងការអនុវត្តច្បាប់ចរាចរណ៍ផ្លូវគោកទូទាំងខេត្តតាមខ្លឹមសារអនុក្រឹត្យលេខ៣៩អ.ន.ក្រនិងតាមគោលការណ៍របស់គ.ស.ច.គ សំដៅកាត់បន្ថយគ្រោះថ្នាក់ចរាចរណ៍ ។ មួយវិញទៀតនៅថ្ងៃខាងមុខនេះ ពិធីបុណ្យចូលឆ្នាំប្រពៃណីជាតិខ្មែរនឹងឈានចូលមកដល់ដូច្នេះគ្រប់ការិយាល័យត្រូវបោសសំអាតនិងរៀបចំសែនព្រេនលំអរទៅដោយភ្លើងពណ៍ចម្រុះ ដើម្បីសុំសិរីសួស្តីពីទេវតាឆ្នាំថ្មី ៕