ក្រុមការងារក្រសួងបរិស្ថាន ចុះអប់រំផ្សព្វផ្សាយច្បាប់ស្តីពីតំបន់ការពារធម្មជាតិ ទប់ស្កាត់បទល្មើសធនធានធម្មជាតិនៅក្នុងភូមិសាស្រ្តខេត្តពោធិ៍សាត់
ភ្នំពេញ៖ នាព្រឹកថ្ងៃទី១៦ ខែមីនា ឆ្នាំ២០២៤ ក្រៅពីចុះអន្តរាគមន៍ជាមួយកម្លាំងចម្រុះបង្កាប ទប់ស្កាត់បទល្មើសធនធានធម្មជាតិ ក្រុមការងារក្រសួងបរិស្ថាន ដឹកនាំដោយឯកឧត្តម ជា សំអាង រដ្ឋលេខាធិការក្រសួងបរិស្ថាន អមដំណើរដោយ មន្រ្តីជំនាញ លោកប្រធានមន្ទីរបរិស្ថានខេត្ត បានជួបប្រជុំពិភាក្សាជាមួយលោកអភិបាលស្រុកវាលវែង និងលោកមេឃុំប្រម៉ោយ មេឃុំអន្លង់រាប នៅស្រុកវាលវែង ខេត្តពោធិ៍សាត់។
ឯកឧត្តម ជា សំអាង បានលើកឡើងពីចំណុចសំខាន់ៗមួយចំនួនរួមមាន៖
១).អំពីយុទ្ធសាស្រ្តបញ្ចកោណរបស់រាជរដ្ឋាភិបាលនីតិកាលទី៧ នៃរដ្ឋសភា, យុទ្ធសាស្រ្តចក្រារបស់ក្រសួងបរិស្ថាន ពិសេសលើមុំតអាទិភាពទី២ ផ្តោតលើភាពបៃតង។ ក្នុងយុទ្ធសាស្រ្តនេះ ដោយក្រសួងបរិស្ថានប្រកាសអនុវត្តច្បាប់១០០% ដោយគ្មានការលើកលែង សហការជាមួយរដ្ឋបាលថ្នាក់ក្រោមជាតិ កងរាជអាវុធហត្ថ និងការដាំស្តារព្រៃឈើទ្បើងវិញ។
២).បានប្រគល់ផែនទីបឋមការប្រើប្រាស់ដីតំបន់ការពារក្នុងភូមិសាស្រ្តស្រុកវាលវែង និងជូនមេឃុំប្រម៉ោយ និងឃុំអន្លង់រាប។
ឯកឧត្តមប្រធានប្រតិភូ បានបន្ថែមថា ករណីមានតម្រូវការបញ្ជាក់ព័ត៌មានបន្ថែមលើផែនទី ស្នើសុំទំនាក់ទំនងក្រុមការបច្ចេកទេសដើម្បីធ្វើបច្ចុប្បន្នភាព និងបានប្រគល់សេចក្តីជូនដំណឹងស្តីពីវិធានការទប់ស្កាត់ លុបបំបាត់ និងបង្រ្កាបការកាប់គាស់ រុករាន ឆ្ការដុតឬការឈូសឆាយដីព្រៃក្នុងតំបន់ការពារធម្មជាតិធ្វើជាកម្មសិទ្ធិ។
ជាមួយគ្នានេះ ឯកឧត្តម ជា សំអាង បានសំណូមពរដល់លោកមេឃុំ ត្រូវឈប់ចុះហត្ថលេខាបញ្ជាក់លើលិខិតស្នើសុំកាន់កាប់ដី ឬបញ្ជាក់លើប្លង់បង្ហាញទីតាំងដី ដែលស្ថិតក្នុងតំបន់ការពារធម្មជាតិ និងពិនិត្យលទ្ធភាពមោឃភាពលើលិខិតបញ្ជាក់កន្លងមកផងដែរ ៕
