២ថ្ងៃ មន្ត្រីជំនាញ សាខា ក.ប.ប. នៅរាជធានី-ខេត្តចំនួន ៧ បានចុះបេសកកម្មត្រួតពិនិត្យ សុវត្ថិភាពម្ហូបអាហារជូនបងប្អូនប្រជាពលរដ្ឋ

ភ្នំពេញ៖ ចាប់ពីថ្ងៃទី៦-៧ ខែមីនា ឆ្នាំ២០២៤ សាខា ក.ប.ប. ខេត្តតាកែវ កំពង់ស្ពឺ កំពត បាត់ដំបង ព្រៃវែង កំពង់ចាម និងរាជធានីភ្នំពេញ បានដឹកនាំកម្លាំងជំនាញចុះត្រួតពិនិត្យសុវត្ថិភាពម្ហូបអាហារតាមបណ្តាទីផ្សារសំខាន់ៗ និងស្តង់ពិព័រណ៌ ដោយបានដកយកសំណាកគំរូ ប្រហិត ប៉ាតេ ហតដក ត្រីសមុទ្រ បបែលក្រៀម បង្អែម ។ល។ យកមកវិភាគដោយប្រើប្រាស់តេស្តបឋម (Testkit) ។

យោងតាមលទ្ធផលវិភាគ មន្ត្រីយើងបានឱ្យដឹងថា បានរកឃើញវត្តមានសារធាតុគីមីហាមឃាត់លើសំណាកគំរូ បបែលក្រៀមផ្អែម/ប្រៃចំនួន ២០គីឡូក្រាម និងបង្អែមបាញ់ឌុកចំនួន ៣គីឡូក្រាម។ យ៉ាងណាមិញ ក្នុងបេសកកម្មត្រួតពិនិត្យនេះដែរ មន្ត្រីជំនាញបានរកឃើញទំនិញចម្រុះ ខូចគុណភាព ហួសកាលបរិច្ឆេទប្រើប្រាស់ និងពុំមានអនុលោមភាពសរុបចំនួន ៦០.៧៦គីឡូក្រាម និងប្រេងកូឡា រំលោភសិទ្ធិផ្តាច់មុខចំនួន ១.២គីឡូក្រាម។ ទំនិញពុំមានអនុលោមភាពទាំងអស់ ត្រូវបានមន្ត្រីយើងដកហូតយកមករក្សាទុកនៅសាខា ដើម្បីបន្តនីតិវិធី។

ទន្ទឹមនឹងនេះដែរ មន្ត្រីយើងបានបន្តអប់រំណែនាំដល់អាជីវករអំពីច្បាប់ និងបទប្បញ្ញត្តិពាក់ព័ន្ធនឹងសុវត្ថិភាពម្ហូបអាហារ និងកិច្ចការពារអ្នកប្រើប្រាស់ ក៏ដូចជាចែកជូននូវផ្ទាំងរូបភាពអប់រំ (Poster) ចំនួន ៦០ផ្ទាំង ជូនដល់អាជីវករថែមទៀតផង៕