មេបញ្ជាការយោធភូមិភាគទី៥ កោតសរសើរជាខ្លាំងចំពោះយោធិន ក្នុងអង្គភាពទាំងមូល ដែលខិតខំពុះពាររាល់ការលំបាក គ្រោះថ្នាក់ និងឧបស័គ្គនានា រួមគ្នាអនុវត្តតាមបទបញ្ជា របស់រាជរដ្ឋាភិបាល
ភ្នំពេញ៖ ឯកឧត្តម ឧត្តមសេនីយ៍ឯក ឯក សំអូន មេបញ្ជាការរងកងទ័ពជើងគោក មេបញ្ជាការ យោធភូមិភាគទី៥ នាថ្ងៃទី៧ ខែមីនា ឆ្នាំ២០២៤ បានអញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធាសន្តិសុខ ឆ្នាំ២០២៣ និងទិសដៅផែនការការអនុវត្តបន្តឆ្នាំ២០២៤ នៅតំបន់ប្រតិបត្តិការសឹករងបាត់ដំបង។
របាយការណ៍បូកសរុបលទ្ធផលការងារឆ្នាំ២០២៣ និងទិសដៅឆ្នាំ២០២៤ របស់តំបន់ប្រតិបត្តិការសឹករងបាត់ដំបង ព្រមជាមួយនោះ អង្គភាពក៏បានផ្សព្វផ្សាយសេចក្តីណែនាំ ស្តីពីការបំផុសចលនាប្រឡងប្រណាំងឆ្នាំ២០២៤។
ជាកិច្ចបន្ទាប់ អង្គប្រជុំបានធ្វើការពិភាក្សាផ្លាស់ប្តូរយោបល់យ៉ាងផុលផុស ដោយបានលើកឡើងនូវបទពិសោធន៍ នៃការអនុវត្តន៍ការងារកន្លងមក ស្វែងរកចំណុចខ្លាំង ចំណុចខ្វះខាតសម្រាប់អនុវត្តបន្ត ក្នុងឆ្នាំ២០២៤ ឱ្យទទួលបានជោគជ័យ និងសម្រេចភារកិច្ចដែលថ្នាក់លើបានប្រគល់។
ឯកឧត្តម ឧត្តមសេនីយ៍ឯក ឯក សំអូន បានថ្លែងនូវការកោតសរសើរជាខ្លាំងចំពោះយោធិនក្នុងអង្គភាពទាំងមូល ដែលបានខិតខំពុះពាររាល់ការលំបាក គ្រោះថ្នាក់ និងឧបស័គ្គនានា រួមគ្នាអនុវត្តតាមបទបញ្ជា របស់រាជរដ្ឋាភិបាល ក្រសួងការពាជាតិ អគ្គមេបញ្ជាការ និងមេបញ្ជាការកងទ័ពជើងគោក រហូតសម្រេចជោគជ័យធំៗជាច្រើន គួរជាទីមោទនយ៉ាងក្រៃលែង។
ឯកឧត្តម មេបញ្ជាការ បានណែនាំឱ្យបណ្តាអង្គភាព ត្រូវយកចិត្តទុកដាក់អនុវត្តឱ្យបានជាដាច់ខាតនូវគោលនយោបាយបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា។ តាមដានក្តាប់សភាពការណ៍ក្នុង និងក្រៅអង្គភាពជាប់ជាប្រចាំ សកម្មវាយបកនូវរាល់ការឃោសនាញុះញង់ បំបែកបំបាក់ ឧបាយកល កលល្បិច របស់ពួកជ្រុលនិយម ជនអគតិមួយចំនួន ដែលមាននិន្នាការប្រឆាំង មានបំណងផ្តួលរលំរាជរដ្ឋាភិបាលស្របច្បាប់ និងត្រូវចាត់តាំងអប់រំរៀនសូត្រនយោបាយចិត្តសាស្ត្រ ពង្រឹងស្មារតី ឆន្ទ: ស្មោះត្រង់ ដាច់ខាត ការពារជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់ ដែលប្រសូត្រចេញពីការបោះឆ្នោត។ ពង្រឹងសន្តិសុខ សណ្តាប់ធ្នាប់ផ្ទៃក្នុង រក្សាសុវត្តិភាព របៀបរៀបរយ ក្នុងអង្គភាពឱ្យបានល្អ។ ពង្រឹងការត្រៀមប្រយុទ្ធ ចល័តប្រយុទ្ធ១០០% មានសមត្ថភាព លទ្ធភាពគ្រប់គ្រាន់ក្នុងការអនុវត្តន៍ពេលមានបទបញ្ជា។ បន្តជំរុញសកម្មភាពហ្វឹកហ្វឺន បណ្តុះបណ្តាល បំប៉នជំនាញ តាមផែនការ កម្មវិធី។ បន្តយកចិត្តទុកដាក់ក្នុងការជួសជុល កសាងសំណង់អគារ ឱ្យសម្រេចតាមពេលវេលា និងផែនការកំណត់។ តាមដាន ស្រាវជ្រាវ ទប់ស្កាត់ការជួញដូរ ប្រើប្រាស់គ្រឿងញៀន និងត្រូវចាត់វិធានការមិនអាចលើកលែងចំពោះយោធិនល្មើស តាមបទបញ្ជា ស្តីពីការដាក់ចេញវិធានការម៉ឺងម៉ាត់ ក្នុងការប្រយុទ្ធប្រឆាំងគ្រឿងញៀនខុសច្បាប់ របស់រាជរដ្ឋាភិបាល កាលពីថ្ងៃទី២០ ខែកុម្ភៈកន្លងមក។ ត្រៀមកម្លាំង កងអនុសេនាតូចបោសសំអាតមីន និងកងប្រតិបត្តិការរុករក និងសង្គ្រោះគ្រោះមហន្តរាយ របស់អង្គភាព ចូលរួមជួយរំដោះដីដែលមានមីន កាកសំណល់សង្គ្រាម និងជួយសង្គ្រោះប្រជាពលរដ្ឋដែលរងគ្រោះដោយគ្រោះមហន្តរាយផ្សេងៗ ពេលមានបទបញ្ជា។ ពង្រឹងការងារដាំដុះ ចិញ្ចឹមសត្វ លើកកម្ពស់ជីវភាពរស់នៅ របស់កងទ័ព និងយកចិត្តទុកដាក់អប់រំថែទាំសុខភាព ក្នុងការពិនិត្យ ព្យាបាលជម្ងឺជូនកងទ័ព និងគ្រួសារ។ បង្កើនការគ្រប់គ្រង អាវុធ-គ្រាប់ រថយន្ត គ្រឿងចក្រ និងសម្ភារៈដែលបានបំពាក់ ឱ្យបានម៉ឺងម៉ាត់ ម៉ត់ចត់ និងចាត់តាំងត្រួតពិនិត្យបណ្តាឃ្លាំងអាវុធ និងសម្ភារៈ ធានាបានគុណភាព មានសុវត្ថិភាពល្អ។ ទន្ទឹមនឹងការងារស្នូលរបស់អង្គភាព ត្រូវយកចិត្តទុកដាក់ សកម្មលើការងារចុះជួយមូលដ្ឋាន ដែលក្រុមការងាររបស់អង្គភាពទទួលខុសត្រូវ។
ជាចុងក្រោយ អធិបតីនៃអង្គពិធី បានជូនប័ណ្ណសរសើរ លិខិតសរសើរ ជូនដល់នាយទាហាន នាយទាហានរង ពលទាហាន ដែលមានស្នាដៃឆ្នើមក្នុងការងារ១ឆ្នាំកន្លងទៅ និង បានប្រគល់ថវិកា ចំនួន ២.០០០.០០០រៀល ជូនទីបញ្ជាការ តំបន់ប្រតិបត្តិការសឹករងបាត់ដំបងផងដែរ៕
