ឯកឧត្ដម ប្រាជ្ញ ចន្ទ៖ សម្រាប់ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ បានរៀបចំរួចរាល់អស់ហើយ

ភ្នំពេញ៖ នាព្រឹកថ្ងៃទី២៤ ខែកុម្ភៈ ឆ្នាំ២០២៤ ឯកឧត្តម ប្រាជ្ញ ចន្ទ ប្រធាន គណៈកម្មាធិការជាតិ រៀបចំការបោះឆ្នោត (គ.ជ.ប) បានអញ្ជើញចុះពិនិត្យមើលការរៀបចំ ការិយាល័យបោះឆ្នោត សម្រាប់ការបោះឆ្នោត ជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ នៅមជ្ឈមណ្ឌលគរុកោសល្យភូមិភាគ ហ៊ុន សែន ខេត្តកណ្ដាល។

ឯកឧត្តម ប្រាជ្ញ ចន្ទ ប្រធាន (គ.ជ.ប) មានប្រសាសន៍ថា សម្រាប់ដំណើរ ការបោះឆ្នោតជ្រើសតាំងសមាជិក ព្រឹទ្ធសភា នីតិកាលទី៥ ឆ្នាំ២០២៤ បានរៀបចំ រួចរាល់អស់ហើយនៅថ្ងៃនេះ ហើយជាពិសេស នៅការិយាល័យចំនួន២ នៅក្នុងខេត្តកណ្ដាល រួមមានការិយាល័យ ៣០០១ និងការិយាល័យ ៣០០២ទាំងនេះ គឺរៀបចំ រួចរាល់អស់ហើយ ទាំងសម្ភារៈ បរិក្ខារ រហូតដល់មន្ត្រីការិយាល័យ ក៏បានមកពិនិត្យត្រៀមរៀបចំ រួចរាល់អស់ហើយ ។

សូមបញ្ជាក់ថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ឆ្នាំ២០២៤ មានគណបក្សនយោបាយចំនួន៤ ចូលរួមប្រកួតប្រជែងមានដូចជា៖ គណបក្សប្រជាជនកម្ពុជា, គណបក្សឆន្ទៈខ្មែរ, គណបក្សកម្លាំងជាតិ, និងគណបក្សហ៊្វុនស៊ិនប៉ិច ខណៈការបោះឆ្នោតអសកលនេះ ប្រព្រឹត្ត ទៅនៅថ្ងៃទី២៥ ខែកុម្ភៈឆ្នាំ២០២៤ ស្អែកនេះ។

សម្រាប់អង្គបោះឆ្នោត គឺមានអ្នកតំណាងរាស្ត្រ ក្នុងតំណែង បច្ចុប្បន្ន ចំនួន១២៥នាក់ និងសមាជិក ក្រុមប្រឹក្សាឃុំសង្កាត់ ក្នុងតំណែងចំនួន១១.៦២២នាក់ ខណៈសមាជិកព្រឹទ្ធសភាទាំងអស់ មានសរុប៦២រូប ក្នុងនោះចំនួន៥៨រូប ត្រូវបានបោះឆ្នោត ជាលក្ខណៈអសកលកាល ចំណែក សមាជិកចំនួន២រូប ត្រូវតែងតាំង ដោយព្រះមហាក្សត្រ និងចំនួន២រូបទៀត ជ្រើសតាំងដោយរដ្ឋសភា៕