តុលាការ សម្រេចបញ្ចូលសំណុំរឿង ករណីជនជាតិចិនបើករថយន្តគេចបារ៉ាស់ត្រួតពិនិត្យរបស់សមត្ថកិច្ច រួចជ្រុលទៅបុកមនុស្សស្លាប់ម្នាក់ នៅព្រះសីហនុ

ភ្នំពេញ៖ សាលាដំបូងខេត្តព្រះសីហនុ បានសម្រេចបញ្ចូលសំណុំរឿងករណីជនជាតិចិនបើករថយន្តគេចបារ៉ាស់ត្រួតពិនិត្យរបស់សមត្ថកិច្ច រួចជ្រុលទៅបុកមនុស្សស្លា.ប់ម្នាក់ និងរ.បួ.ស២នាក់ កាលពីពេលថ្មីៗនេះជាសំណុំរឿងតែមួយ។ រួចបើកការចោទប្រកាន់លើជនសង្ស័យពីបទបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្នបណ្តាលឱ្យរបួស និងស្លាប់ដល់អ្នកដទៃ កាលពីថ្ងៃទី២១ ខែកុម្ភៈ ឆ្នាំ២០២៤។

យោងតាមលិខិតដដែលបានឱ្យដឹងថា កាលថ្ងៃទី១៧ និងទី១៨ ខែកុម្ភៈ ឆ្នាំ២០២៤ អយ្យការអមសាលាដំបូងខេត្តព្រះសីហនុ បានទទួល និងចាត់ការសំណុំរឿងព្រហ្មទណ្ឌចំនួន០២ ពីស្នងការដ្ឋាននគរបាលខេត្តព្រះសីហនុ រួមមាន៖ ទី១.សំណុំរឿងលេខ២៣៨ ចុះថ្ងៃទី១៧ ខែកុម្ភៈ ឆ្នាំ២០២៤ ករណីគ្រោះថ្នាក់ចរាចរណ៍បើករត់គេចពីគោលដៅត្រួតពិនិត្យរបស់សមត្ថកិច្ច បណ្តាលឱ្យស្លាប់មនុស្សម្នាក់ និងរងរបួស២នាក់ ពីការិយាល័យនគរបាលចរាចរណ៍ផ្លូវគោក និងទី២.សំណុំរឿងលេខ ២៤៣ ចុះថ្ងៃទី១៨ ខែកុម្ភៈ ឆ្នាំ២០២៤ ពីករណីរត់គេចពីគោលដៅត្រួតពិនិត្យរបស់សមត្ថកិច្ច ពីការិយាល័យនគរបាលព្រហ្មទណ្ឌកម្រិតស្រាល។

អ្នកនាំពាក្យនៃអយ្យការអមសាលាដំបូងខេត្តព្រះសីហនុ សង្កត់ធ្ងន់ថា៖«ក្រោយតំណាងអយ្យការ បានពិនិត្យសំណុំរឿងទាំងពីរខាងលើ និងបានស្តាប់ចម្លើយជនសង្ស័យ ព្រមទាំងពិនិត្យភស្តុតាងជារួមរួចមក ចំពោះអង្គហេតុករណីសំណុំរឿងនេះ តំណាងអយ្យការបានសម្រេចបញ្ចូលសំណុំរឿងទាំងពីរ ទៅជាសំណុំរឿងតែមួយ រួចសម្រេចបើកការចោទប្រកាន់លើជនសង្ស័យឈ្មោះទូ ស៊ីភីង DOU SHIPING ភេទប្រុស អាយុ២៧ឆ្នាំ ជនជាតិចិន ពីបទបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន បណ្តាលឱ្យរបួស និងស្លាប់ដល់អ្នកដទៃ»។

សូមរំឭកថា កាលពីថ្ងៃទី១៥ ខែកុម្ភៈ ឆ្នាំ២០២៤ វេលាម៉ោង២១៖៣០នាទីយប់ នៅចំណុចភូមិ២ សង្កាត់លេខ៤ ក្រុងព្រះសីហនុ សមត្ថកិច្ចបានធ្វើការដាក់បារ៉ាស់ត្រួតពិនិត្យជាតិអាកុល គ្រឿងញៀន និងអាវុធជាតិផ្ទុះ ដែលដឹកនាំដោយគណៈបញ្ជាការឯកភាពក្រុង ស្របពេលនោះដែរក៏មានរថយន្តមួយគ្រឿង ម៉ាក FORD MUSTANG ពណ៌លឿង ពាក់ស្លាកលេខ ភ្នំពេញ ២BP-៨៩៦៧ បើកបរដោយឈ្មោះទូ ស៊ីភីង ជាជនជាតិចិន ព្យាយាមបើករត់គេចពីបារ៉ាស់គោលដៅត្រួតពិនិត្យនោះ ក្នុងល្បឿនលឿនទិសដៅពីលិចទៅកើត។ ភ្លាមៗកម្លាំងសមត្ថកិច្ចបានជិះប្រដេញតាមរហូតដល់វេលាម៉ោង២៣៖១៥នាទី លើផ្លូវសែនជ័យត្រង់ចំណុចមុខរមណីយដ្ឋានបាល់ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់។ ជនសង្ស័យក៏បានផ្លាស់ប្ដូរទិសដៅរថយន្តបត់ឆ្វេង ហើយក៏ត្រូវបានម៉ូតូ០១គ្រឿងម៉ាក HONDA DREAM C-១២៥ ពណ៌ខ្មៅ ពាក់ស្លាកលេខកំពង់ចាម ១C-០៧៩១ បើកបរដោយឈ្មោះ ហ៊ាង ផេង ភេទប្រុស និងមានអ្នករួមដំណើរ០២នាក់ ឈ្មោះ ហួន ភាព ភេទប្រុស និងឈ្មោះ មាស ចាន់ ភេទប្រុស ក្នុងទិសដៅផ្ទុយគ្នាបានបុកចំទ្វារចំហៀងខាងស្ដាំរថយន្តយ៉ាងពេញទំហឹងតែម្ដង៕