អាវុធហត្ថខេត្តបន្ទាយមានជ័យ បញ្ជូនជនសង្ស័យ២នាក់ ទៅសាលាដំបូងខេត្តអនុវត្តតាមនីតិវិធី ពាក់ព័ន្ធករណីលួចមានស្ថានទម្ងន់ទោស
ភ្នំពេញ៖ ជនសង្ស័យទាំង២នាក់ ត្រូវបានកម្លាំងការិយាល័យព្រហ្មទណ្ឌ កងរាជអាវុធហត្ថខេត្ត បញ្ជូនទៅសាលាដំបូងខេត្តហើយ នៅព្រឹកថ្ងៃអាទិត្យ ទី១៨ ខែកុម្ភៈ ឆ្នាំ២០២៤ ដើម្បីអនុវត្តតាមនីតិវិធី ពាក់ព័ន្ធករណីលួចមានស្ថានទម្ងន់ទោស ។
លោកវរសេនីយ៍ត្រី នួន នីណារ៉ូ មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតបានឱ្យដឹងថា ៖ យោងតាមពាក្យបណ្តឹងរបស់ជនរងគ្រោះចំនួន០២នាក់ ១.ឈ្មោះ ណាយ ពិយ៉ា ភេទប្រុស អាយុ២៨ឆ្នាំ ជនជាតិខ្មែរ បច្ចុប្បន្នរស់នៅភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ២.ឈ្មោះ ផាន់ ផាលីន ភេទប្រុស អាយុ២៣ឆ្នាំ ជនជាតិខ្មែរ ទីលំនៅបច្ចុប្បន្នភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ស្ដីពីករណីបាត់ម៉ូតូ១គ្រឿង ម៉ាកហុងដាPCX ពណ៌ខ្មៅ ផលិតឆ្នាំ២០២៤ គ្មានផ្លាកលេខ ដែលបានបាត់កាលពីវេលាម៉ោង០២ ថ្ងៃទី០៣ ខែកុម្ភៈ ឆ្នាំ២០២៤ នៅចំណុចក្នុងភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។
ក្រោយពីទទួលបានពាក្យបណ្ដឹង នៅវេលាម៉ោង១៨និង៣៥នាទី ថ្ងៃទី១៦ ខែកុម្ភៈ ឆ្នាំ ២០២៤ កម្លាំងមូលដ្ឋានកងរាជអាវុធហត្ថក្រុងប៉ោយប៉ែត ចុះស្រាវជ្រាវតាមវិធានការជំនាញ រហូតឈានដល់ឃាត់ខ្លួនជនសង្ស័យបានម្នាក់ ១.ឈ្មោះ ហន សុគន្ធ ភេទប្រុស អាយុ១៧ឆ្នាំ ជនជាតិខ្មែរ បច្ចុប្បន្នរស់នៅភូមិប៉ោយប៉ែត សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ រួចនាំមកមូលដ្ឋានកងរាជអាវុធហត្ថក្រុងដើម្បីសួរនាំ ក្រោយពីសួរនាំរួច ទើបដឹងថាបក្សពួកម្នាក់ទៀតគេចខ្លួនទៅស្នាក់នៅក្នុងស្រុកមង្គលបូរី ទើបកម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត សហការជាមួយកម្លាំងជំនាញមូលដ្ឋានកងរាជអាវុធហត្ថស្រុកមង្គលបូរី ធ្វើការស្រាវជ្រាវ រហូតឈានដល់ការឃាត់ខ្លួនជនសង្ស័យម្នាក់ទៀតឈ្មោះ ប៊ុន មេសា ភេទប្រុស អាយុ២៥ឆ្នាំ នៅចំណុចភ្នំតូច ស្ថិតក្នុងភូមិភ្នំតូច ឃុំភ្នំតូច ស្រុកមង្គលបូរី ខេត្តបន្ទាយមានជ័យ។
លោកមេបញ្ជាការកងរាជអាវុធហត្ថក្រុង បានឱ្យដឹងទៀតថា៖ ក្រោយពីឃាត់ខ្លួនជនសង្ស័យទាំង០២នាក់ខាងលើ និងសួរនាំរួច ទើបលោកសុំបទបញ្ជាពីសំណាក់លោកឧត្ដមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលពី ឯកឧត្ដម កើត វណ្ណារ៉េត ព្រះរាជអាជ្ញា អមសាលាដំបូងខេត្តបន្ទាយមានជ័យ ធ្វើការឆែកឆេរលើទីតាំងបន្ទប់ជួល០១កន្លែង ស្ថិតក្នុងភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ តាមការបង្ហាញពីជនសង្ស័យទាំង២នាក់ រកឃើញម៉ូតូម៉ាកហុងដា PCX ពណ៌ខ្មៅ ផលិតឆ្នាំ២០២៤ ជារបស់ជនរងគ្រោះឈ្មោះ ណាយ ពិយ៉ា និងរកឃើញម៉ូតូផ្សេងៗទៀតដូចជា ម៉ូតូម៉ាក អ៊ុចសង់ទ័រ ពណ៌ខ្មៅ គ្មានផ្លាកលេខចំនួន០១គ្រឿង,ម៉ូតូម៉ាកអ៊ុចសង់ទ័រ ពណ៌ខៀវ គ្មានផ្លាកលេខចំនួន០១គ្រឿង,ម៉ាស៊ីនម៉ូតូ០១គ្រឿង,និងអាវម៉ូតូ ព្រមទាំងឧបករណ៍ដោះដូរ ជួសជុល កែច្នៃមួយចំនួនបន្ថែមទៀត ហើយត្រូវបានកម្លាំងមូលដ្ឋានកងរាជអាវុធហត្ថក្រុងយកមករក្សាទុក ដើម្បីស្វែងរកម្ចាស់បន្តទៀត។ ចំពោះម៉ូតូម៉ាកហុងដា PCX ពណ៌ខ្មៅ ផលិតឆ្នាំ២០២៤ ជារបស់ជនរងគ្រោះឈ្មោះ ណាយ ពិយ៉ា ត្រូវបានប្រគល់ជូនម្ចាស់ដើមវិញហើយ។
លោកវរសេនីយ៍ឯក ម៉ែន ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ និងបង្ក្រាបបទល្មើសបានឱ្យដឹងថា៖ ជនសង្ស័យទាំង២នាក់ក្រោយពីកម្លាំងជំនាញសួរនាំរួច បានឆ្លើយសារភាពថា ពួកខ្លួនពិតជាបានលួចម៉ូតូជាច្រើនគ្រឿងក្នុងភូមិសាស្រ្តក្រុងប៉ោយប៉ែតពិតប្រាកដមែន៕
