ភ្នំពេញ៖ នៅថ្ងៃទី១៦ ខែកុម្ភៈ ឆ្នាំ២០២៤ វេលាម៉ោង៣ និង២០នាទី នៅចំណុចក្រុមទី០៧ ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង មានករណីលួច (ម៉ូតូ) មួយកើតឡើង ប្រព្រឹត្តដោយជនសង្ស័យឈ្មោះ សំ សុខុម ភេទប្រុស អាយុ៣៧ឆ្នាំ មានទីលំនៅស្នាក់បណ្តោះអាសន្នភូមិអូរស្ងាត់ ឃុំសន្តិភាព ស្រុកសំពៅលូន ខេត្តបាត់ដំបង បានធ្វើសកម្មភាពលួចម៉ូតូម៉ាក zoomer x ពណ៌ក្រហម-ខ្មៅ ស្លាកលេខ សៀមរាប 1AA-5355 សេរីឆ្នាំ២០១៨ ចំនួន ១គ្រឿង របស់ជនរងគ្រោះឈ្មោះ ធួន សុង ភេទប្រុស អាយុ៥៣ឆ្នាំ មានទីលំនៅបច្ចុប្បន្ន ភូមិគីឡូ១៣ ឃុំសន្តិភាព ស្រុកសំពៅលូន ខេត្តបាត់ដំបង មុខរបរលក់ដូរ ដែលទុក្ខនៅក្នុងផ្ទះ ក្នុងពេលធ្វើសកម្មភាព ក៏ត្រូវជនរងគ្រោះឃើញទាន់ ហើយជនសង្ស័យក៏បានដើរចេញយ៉ាងលឿន រត់គេចខ្លួនបណ្តាលឲ្យដួលទៅនឹងដី បោកក្បាលប៉ះនឹងដុំថ្មរងរបួសចេញឈាម ហើយក៏ត្រូវជនរងគ្រោះដែលជាម្ចាស់ម៉ូតូ ព្រមទាំងប្រជាពលរដ្ឋជិតខាងចាប់បាន និងប្រគល់ជូនសមត្ថកិច្ច នៃអធិការដ្ឋាននគរបាលស្រុកសំពៅលូន ។
ក្រោយពីទទួលបណ្តឹងពីជនរងគ្រោះ កម្លាំងផ្នែកជំនាញព្រហ្មទ័ណ្ឌ នៃអធិការដ្ឋាននគរបាលស្រុកសំពៅលូន ដឹកនាំដោយលោកវរសេនីយ៍ទោ ទឹម វិឆ័យ អធិការនគរបាលស្រុកសំពៅលូន បានចុះធ្វើការឃាត់ខ្លួនជនសង្ស័យម្នាក់ ឈ្មោះ សំ សុខុម ភេទប្រុស យកទៅសាកសួរនៅអធិការដ្ឋាននគរបាលស្រុកសំពៅលូន ដើម្បីសាកសួរ ។ ក្រោយពីបានសាកសួរជនសង្ស័យ បានឆ្លើយសារភាពថាខ្លួនបានធ្វើសកម្មភាពលួចយកម៉ូតូ របស់ជនរងគ្រោះពិតប្រាកដមែន ។
ករណីនេះ ជនសង័្សយខាងលើ ត្រូវបានកម្លាំងនគរបាលស្រុកសំពៅលូន សាងសំណុំរឿងបញ្ជូនទៅការិយាល័យជំនាញខេត្ត ដើម្បីចាត់ការបន្តតាមនីតិវិធី៕
