បណ្ណកម្មសិទ្ធិចំនួន ២,៥០០ក្បាលដី ត្រូវបានចែកជូនប្រជាពលរដ្ឋចំនួន២ភូមិ ភូមិបឹងរៃ និងភូមិស្រឡៅដំណាក់ ក្នុងស្រុកព្រែកប្រសព្វ ខេត្តក្រចេះ

ភ្នំពេញ៖ ព្រឹកថ្ងៃពុធ ៦រោច ខែបុស្ស ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៣១ ខែមករា ឆ្នាំ២០២៤ ឯកឧត្ដម ហេង សុថា អភិបាលខេត្តស្តីទី អញ្ជើញជាអធិបតីភាពក្នុងពិធីចែកបណ្ណកម្មសិទ្ធិចំនួន២៥០០ក្បាលដី ជូនប្រជាពលរដ្ឋចំនួន២ភូមិ ភូមិបឹងរៃ និងភូមិស្រឡៅដំណាក់ ឃុំឫស្សីកែវ ស្រុកព្រែកប្រសព្វ ខេត្តក្រចេះ ពិធីធ្វេីឡេីងនៅបរិវេណវត្តមុនីរតនរង្សី ហៅវត្តឫស្សីកែវដោយមានការអញ្ជេីញចូលរួមពីលោក អ៊ូ សុបុណ្ណកា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ និងជានាយកកម្មវិធីអនុវិស័យរដ្ឋបាលដីធ្លីថ្នាក់ខេត្ត លោក លោកស្រីអនុប្រធានមន្ទីរ អង្គភាពពាក់ព័ន្ធ អាជ្ញាធរស្រុក ឃុំ ភូមិ និងប្រជាពលរដ្ឋ ប្រមាណជា៤០០នាក់។

ឯកឧត្តម ហេង សុថា បានបញ្ជាក់ថា ការចែកប្លងរឹងនៅពេលនេះគឺជាការឆ្លុះបញ្ចាំងឲ្យឃើញអំពីការយកចិត្តទុកដាក់ខ្ពស់ របស់ប្រមុខរាជរដ្ឋាភិបាល ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិត ក្នុងការធានាកម្មសិទ្ធិដីធ្លីស្របច្បាប់ជូនប្រជាពលរដ្ឋ សំដៅលើកកម្ពស់ជីវភាព សុខុមាលភាព កាត់បន្ថយជម្លោះដីធ្លី និងការកាត់បន្ថយភាពក្រីក្រ។

ឯកឧត្ដម បានថ្លែងនូវការកោតសរសើរចំពោះ អាជ្ញាធរស្រុកគ្រប់លំដាប់ថ្នាក់ និងក្រុមការងារចុះបញ្ជីដីធ្លី ជាលក្ខណៈប្រព័ន្ធ ដែលបានខិតខំបំពេញការងារសម្រេចបានជោគជ័យនាពេលនេះ និងសូមចូលអបអរសាទរចំពោះបងប្អូនប្រជាពលរដ្ឋ ដែលទទួលប័ណ្ណកម្មសិទ្ធិនាថ្ងៃនេះផងដែរ។

ទន្ទឹមនឹងនេះ ឯកឧត្តម ក៏បានជំរុញដល់មន្ទីររៀបចំដែនដីនគរូបនីកម្ម សំណង់ និងសុរិយោដីខេត្ត ត្រូវខិតខំបន្តចុះបញ្ជីដីធ្លី លក្ខណៈជាប្រព័ន្ធ និងចែកវិញ្ញាបនបត្រសម្គាល់ម្ចាស់អចលនវត្ថុជូនដល់ប្រជាពលរដ្ឋទូទាំងខេត្តឲ្យបានឆាប់រហ័សតាមការគ្រោងទុក។

ឯកឧត្ដម បានធ្វើការផ្ដាំផ្ញើរដល់ប្រជាពលដ្ឋ ដែលទទួលបានប័ណ្ណកម្មសិទ្ធិនៅថ្ងៃនេះ គឺជាឯកសារមួយសំខាន់ណាស់ តំណាងឲ្យទ្រព្យរបស់បងប្អូន ជាឯកសារតំណាងឲ្យសិទ្ធិ នៃកម្មសិទ្ធផ្ដាច់មុខ របស់កម្មសិទ្ធិករ លើដីធ្លីរបស់ខ្លួន ក្នុងការប្រើប្រាស់ និងអាស្រ័យផល ក្នុងការលក់ដូរ ការផ្ទេរទៅអ្នកដទៃ ការផ្ទេរទៅឲ្យកូនចៅជាដើម ៕