ឯកឧត្តមរដ្ឋលេខាធិការ ចាន់ ស៊ីណាត ដឹកនាំកិច្ចប្រជុំពិនិត្យវឌ្ឍនភាពនៃការអនុវត្តគម្រោងរបស់អង្គការសមាគមអភិរក្សសត្វព្រៃកម្ពុជា (WCS) នៅខេត្តកំពង់ធំ

ភ្នំពេញ៖ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម និងសហការី រួមជាមួយលោកប្រធានមន្ទីរធនធានទឹក និងឧតុនិយមខេត្តកំពង់ធំ បានអញ្ជើញដឹកនាំកិច្ចប្រជុំជាមួយអង្គការសមាគមអភិរក្សសត្វព្រៃកម្ពុជា(WCS) ដើម្បីពិនិត្យលើវឌ្ឍនភាពនៃការអនុវត្តគម្រោងរបស់អង្គការក្រៅរដ្ឋាភិបាល WCS ដែលបានទទួលសិទ្ធិផ្តាច់មុខពីធនាគាអភិវឌ្ឍន៍អាស៊ី (ADB) ក្នុងការអនុវត្តនូវសកម្មភាពផលិតកម្មដោយនិរន្តរភាពលើដំណាំស្រូវនៅកម្ពុជា និងការអភិរក្សសត្វខ្សឹប ក្រោមក្របខ័ណ្ឌគម្រោងកែលម្អវិស័យធារាសាស្រ្តរបស់ក្រសួងធនធានទឹក និងឧតុនិយមនៅក្នុងតំបន់ប្រព័ន្ធធារាសាស្រ្តស្ទឹងជីនិតដែលស្ថិតក្នុងភូមិសាស្រ្តស្រុកសន្ទុក ស្រុកបារាយណ៍ និងស្រុកប្រាសាទបល្ល័ង្គ ខេត្តកំពង់ធំ។

សូមជម្រាបថា កិច្ចប្រជុំបានប្រព្រឹត្តទៅនៅមន្ទីរធនធានទឹក និងឧតុនិយមខេត្តកំពង់ធំ ក្នុងក្រុងស្ទឹងសែន ដោយមានការធ្វើបទបង្ហាញស្តីអំពីវឌ្ឍនភាពនៃការអនុវត្តសកម្មភាពការងាររបស់អង្គការសមាគមអភិរក្សសត្វព្រៃកម្ពុជា(WCS)។

ក្នុងកិច្ចប្រជុំ ឯកឧត្តមរដ្ឋលេខាធិការបានណែនាំដល់ក្រុមការងារអង្គការសមាគមអភិរក្សសត្វព្រៃកម្ពុជា(WCS) ឱ្យបន្តអនុវត្តការងារឱ្យបានលឿនប្រកបដោយប្រសិទ្ធភាពខ្ពស់ ដោយបន្តកិច្ចសហការជាប្រចាំជាមួយមន្ទីរធនធានទឹក និងឧតុនិយមខេត្តកំពង់ធំ អាជ្ញាធរថ្នាក់ក្រោមជាតិគ្រប់លំដាប់ថ្នាក់ ចាប់ពីថ្នាក់ខេត្តរហូតដល់ថ្នាក់មូលដ្ឋានភូមិឃុំ ធ្វើយ៉ាងណាដើម្បីឱ្យការផលិតស្រូវមានការកើនឡើងទាំងបរិមាណ គុណភាពតាមនិយាម SRP និងចំនួនរដូវដាំដុះប្រកបដោយនិរន្តរភាព។

ជាមួយគ្នានេះដែរ ឯកឧត្តមរដ្ឋលេខាធិការមានប្រសាសន៍គូសបញ្ជាក់ថា ការថែរក្សាអភិរក្សសត្វខ្សឹបឱ្យមានចីរភាពក្នុងតំបន់វាលស្មៅបៃតងដ៏ស្រស់ស្អាតនៃប្រព័ន្ធធារាសាស្រ្តស្ទឹងជីនិត ដែលជាបេះដូងនៃវិស័យអេកូទេសចរណ៍របស់ខេត្តភូមិភាគកណ្តាលមួយនេះឱ្យកាន់តែមានភាពទាក់ទាញ គឺជាកិច្ចការដ៏សំខាន់ដែលអង្គការសមាគមអភិរក្សសត្វព្រៃកម្ពុជា(WCS) ត្រូវតែយកចិត្តទុកដាក់បំផុត ដោយត្រូវបន្តសហការយ៉ាងជិតស្និទ្ធជាមួយអាជ្ញាធរមូលដ្ឋានគ្រប់លំដាប់ថ្នាក់ ព្រមទាំងគោរព និងអនុវត្តតាមកិច្ចព្រមព្រៀងអនុស្សរណៈនៃការយោគយល់គ្នារវាងរាជរដ្ឋាភិបាលនៃព្រះរាជាណាចក្រកម្ពុជា និងធនាគារអភិវឌ្ឍន៍អាស៊ី(ADB) ៕