ទស្សនៈ និងមតិ៖ RFA ក្រុមតាំងខ្លួន ជាសារព័ត៌មានឯករាជ្យប្រឆាំង តែគ្មានវិជ្ជាជីវៈ មិនខ្វល់ពីផលប្រយោជន៍ជាតិ និងប្រជាជន ពិសេសកិត្យានុភាពជាតិ

​

ភ្នំពេញ៖ ឆ្លើយតបទៅវិទ្យុអាស៊ីសេរី (RFA) លោក ម៉ក់ ហ៊ាងរិទ្ធី អគ្គនាយកអង្គភាពសារព័ត៌មាន HOT News Asia បានលើកឡើងថា វិទ្យុ RFA ជាក្រុមតាំងខ្លួនជាសារព័ត៌មានឯករាជ្យប្រឆាំង ប៉ុន្តែគ្មានវិជ្ជាជីវៈជាអ្នកសារព័ត៌មាន ដោយមិនខ្វល់ពីផលប្រយោជន៍ជាតិ និងប្រជាជន ពិសេសកិត្យានុភាពជាតិ ។

ការឆ្លើយតបរបស់លោក ម៉ក់ ហ៊ាងរិទ្ធី បែបនេះធ្វើឡើងបន្ទាប់ពី កាលពីព្រឹកថ្ងៃទី១៨ ខែមករា ឆ្នាំ២០២៤នេះ វិទ្យុអាស៊ីសេរី ចុះផ្សាយថា «នាយករដ្ឋមន្ត្រី ហ៊ុន ម៉ាណែត ត្រូវបានប្រព័ន្ធផ្សព្វផ្សាយអន្តរជាតិមួយឈ្មោះ Politico ចាត់ចូលជាមេដឹកនាំកខ្វក់ក្នុងចំណោមបុគ្គល ១២រូប ដែលបានចូលរួមនៅក្នុងវេទិកាសេដ្ឋកិច្ចពិភពលោក (WEF) នៅទីក្រុងដាវូស (Davos) ប្រទេសស្វីស (Switzerland)» ។

ជុំវិញការផ្សព្វផ្សាយរបស់ RFA នេះមិនត្រឹមតែធ្វើឲ្យប៉ះពាល់ ដល់កិត្តិយសកេរ្តិ៍ឈ្មោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាប៉ុណ្ណោះទេ ប៉ុន្តែថែមទាំងធ្វើឲ្យប៉ះពាល់ដល់ផលប្រយោជន៍ជាតិ និងប្រជាជន ជាពិសេសប៉ះពាល់ដល់កិត្យានុភាពជាតិ ។

ជាក់ស្ដែងសម្តេចធិបតី បានអញ្ជើញទៅដល់ប្រទេសស្វីស​ ជួបជាមួយតំណាងក្រុមហ៊ុនជាង​ ១០​ ថ្នាក់ដឹកប្រទេស​ ពិសេសក៏បានជួបស្ថាបនិកអ្នកបង្កើត​ វេទិកាសេដ្ឋកិច្ចពិភពលោក​ និងពិសារអាហារថ្ងៃជាមួយគ្នា​ ចឹងតើពួកគេទាំងនោះល្ងង់ណាស់មែនទេ​ ឬរិតតែមហាល្ងង់​ ដែលត្រូវមកសុំជួប​ និងពិភាក្សាការងារជាមួយសម្តេចធិបតីជាបន្តបន្ទាប់មិនដាច់​ ដែលអស់លោកប្រឌិតសរសេរចោទថា​ សម្តេចធិបតីជាប់ឈ្មោះជាមេដឹកនាំកខ្វក់?

មិនត្រឹមតែប៉ុណ្ណោះទេ សម្ដេចមហាបវរធិបតី ក៏ត្រៀមជួបប្រធានាធិបតីបារាំង នៅថ្ងៃទី១៨​ មករានេះ​ រួចក៏ជួបទាំងប្រធានព្រឹទ្ធសភា​ និងប្រធានរដ្ឋសភា​ផងដែរ ។

សូមបញ្ជាក់ផងដែរថា តាំងពីសម្ដេចមហាបវរធិបតី ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី ដឹកនាំនាវាកម្ពុជាឆ្ពោះទៅមុខ ដោយមិនគិតពីការនឿយហត់ ខិតខំប្រឹងប្រែងទាំងយប់ទាំងថ្ងៃ បំពេញតាមការសន្យាជាមួយបងប្អូនប្រជាពលរដ្ឋ នៅមុនការបោះឆ្នោត ។ ជាក់ស្ដែងសម្ដេចធិបតី បានសម្រេចសមិទ្ធផលជាច្រើន ជូនជាតិនិងប្រជាជន ៕