ឯកឧត្តម ស្វាយ សំអ៊ាង អំពាវនាវដល់ប្រជាពលរដ្ឋដែលទទួលបានប័ណ្ណកម្មសិទ្ធិដីធ្លី សូមធ្វើសកម្មភាពប្រកបមុខរបរអាជីវកម្ម ឬបង្កបង្កើនផលលើដី ប្រសើរជាងការលក់ដូរ ដែលទទួលផលបានតែម្តង

ភ្នំពេញ៖ ឯកឧត្តម ស្វាយ សំអ៊ាង អភិបាល នៃគណៈអភិបាលខេត្ត និងជាប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត បានអំពាវនាវដល់ប្រជាពលរដ្ឋដែលទទួលបានប័ណ្ណកម្មសិទ្ធិដីធ្លី សូមធ្វើសកម្មភាពប្រកបមុខរបរអាជីវកម្ម ឬបង្កបង្កើនផលលើដីដែលទទួលបានកម្មសិទ្ធិ ដើម្បីទទួលបានផលប្រយោជន៍ដែលកើតចេញពីដីនេះ ប្រសើរជាជាងការលក់ដូរ ដែលអាចទទួលផលបានតែម្តង ហើយនឹងបាត់បង់ប្រយោជន៍គ្រួសារជារៀងរហូត។

ក្នុងឳកាសអញ្ជើញជាអធិបតីក្នុងពិធីបិផ្សាយជាសាធារណៈនូវឯកសារនៃការវិនិច្ឆ័យចុះបញ្ជីដីធ្លីមានលក្ខណៈជាប្រព័ន្ធ ក្នុងភូមិអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែងនៅថ្ងៃទី៣ ខែមករា ឆ្នាំ២០២៤នេះ ឯកឧត្តម ស្វាយ សំអ៊ាង បានឲ្យដឹងថា ជាការពិតណាស់ការទទួល បានប័ណ្ណកម្មសិទ្ធិដីធ្លី គឺជាឯកសាររដ្ឋបាលបញ្ជាក់ពីសិទ្ធិស្របច្បាប់ជាម្ចាស់លើក្បាលដីនីមួយៗ។

ឯកឧត្តម ស្វាយ សំអ៊ាងបន្តថា រដ្ឋធម្មនុញ្ញ ឆ្នាំ១៩៩៣ មាត្រា៤៤ បានចែងថា “កម្មសិទ្ធឯកជនស្របច្បាប់ស្ថិតនៅក្រោមការគាំពារនៃច្បាប់ ដែលនឹងដកហូតកម្មសិទ្ធិអំពីជនណាមួយនោះបាន លុះត្រាតែប្រយោជន៍សាធារណៈតម្រូវឲ្យធ្វើ ក្នុងករណីដែលច្បាប់បានបញ្ញតិទុក ហើយត្រូវផ្ដល់សំណងជាមុន ដោយសមរម្យ និងយុត្តិធម៌”។

ក្នុងន័យនេះ ឯកឧត្តម អភិបាលខេត្តស្ទឹងត្រែង បញ្ជាក់ថា ចាប់ពីពេលដែលទទួល បានប័ណ្ណកម្មសិទ្ធិនេះតទៅបងប្អូននឹងទទួលបាននូវសុវត្ថិភាពនៃការកាន់កាប់ប្រើប្រាស់ អាស្រ័យផលលើដីធ្លីរបស់ ខ្លួន និងចាត់ចែងដីរបស់ខ្លួនផ្តាច់មុខ និងទូលំទូលាយ។

សូមបញ្ជាក់ថា សម្រាប់ការបិទផ្សាយជាសាធារណៈនូវឯកសារនៃការវិនិច្ឆ័យចុះបញ្ជីដីធ្លីមានលក្ខណជាប្រព័ន្ធក្នុងភូមិអូរត្រែល ឃុំថាឡាបរិវ៉ាត់ ស្រុកថាឡាបរិវ៉ាត់ សរុបមានចំនួន ៦៥៩គ្រួសារ ដែលមានក្បាលដីសរុបចំនួន ១.៤១២ក្បាលដី ស្មើនឹង ២.៣៨៧,៥៤ហិកតា ក្នុងនោះប្រភេទដីកសិកម្មមានចំនួន ៥៣៧ក្បាលដី, ដីលំនៅឋាន ៥៤៧ក្បាលដី, ដីសាលារៀន ១ក្បាលដី, ដីត្រពាំង ២ក្បាលដី, ដីទួលអ្នកតា ១ក្បាលដី, ដីមានវិវាទ ១១១ក្បាលដី និងដីគ្មានទិន្នន័យ ២១៦ក្បាលដី។ ចំណោមក្បាលដីសរុបទាំង ១.៤១២ក្បាលដីមិនជាប់គម្របព្រៃឈើឆ្នាំ២០០២មានចំនួន ៧២០ក្បាលដី, ក្បាលដីជាប់គម្របព្រៃឈើឆ្នាំ២០០២មានចំនួន ៦៦៦ក្បាលដី និងក្បាលដីជាប់សហគមន៍ភ្នំប្រាសាទមានចំនួន ២៦ក្បាលដី៕