សម្តេចធិបតី ហ៊ុន ម៉ាណែត៖ នៅប្រទេសក្នុងតំបន់អឺរ៉ុបមួយចំនួន បញ្ហាសន្តិសុខបើប្រៀបធៀបជាមួយភ្នំពេញ ប្រហែលជារាជធានីភ្នំពេញល្អជាង
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា នៅប្រទេសក្នុងតំបន់អឺរ៉ុបមួយចំនួន បញ្ហាសន្តិសុខ បើប្រៀបធៀបជាមួយភ្នំពេញ ប្រហែលជារាជធានីភ្នំពេញល្អជាង ។
។
ក្នុងឱអញ្ជើញសម្ពោធដាក់ឱ្យប្រើប្រាស់ជាផ្លូវការ «ស្ពានកោះនរា និងស្ពាននាគភ្លោះកោះនរា ភ្ជាប់ពីគម្រោងកោះនរា ទៅកាន់ផ្លូវជាតិលេខ១» នាថ្ងៃទី១៥ ខែវិច្ឆិកា ឆ្នាំ២០២៣ សម្តេចធិបតី ហ៊ុន ម៉ាណែត បានបញ្ជាក់ថា «ឥលូវនេះនិយាយត្រង់ខ្ញុំមិនបង្អាប់ប្រទេសណានោះទេ ប្រទេសដែលខ្ញុំធ្លាប់នៅ ធ្លាប់រៀននៅអឺរ៉ុបមួយចំនួន បញ្ហាសន្តិសុខប្រៀបធៀបជាមួយរាជធានីភ្នំពេញ ប្រហែលជារាជធានីភ្នំពេញល្អជាង តែខ្ញុំមិននិយាយប្រទេសណាទេរឿងរបស់គេ ប៉ុន្តែសួរថាល្អគ្រប់ឫនៅ នៅទេព្រោះនៅមានបញ្ហា ចឹងយើងត្រូវបន្តធ្វើទៅទៀត ហើយខ្ញុំសូមសរសើរណាស់ចំពោះកម្លាំងសមត្ថកិច្ចរបស់យើង» ។
សម្តេចធិបតី ហ៊ុន ម៉ាណែត ក៏បានថ្លែងអរគុណដល់កងកម្លាំងសមត្ថកិច្ច ស្នងការនគរបាលរាជធានីភ្នំពេញ ស្នងការគនរបាលតាមបណ្តាខេត្ត អគ្គស្នងការនគរបាលជាតិ និងកងម្លាំងអាវុធហត្ថនៅតាមបណ្តារាជធានីខេត្តទាំងអស់ ដែលបានចូលរួមសហការអនុវត្តគោលនយោបាយភូមិឃុំ មានសុវត្ថិភាព បានល្អប្រសើរ ហើយបើទោះបីជាមានបញ្ហាអសន្តិសុខតិចតួច ប៉ុន្តែស្ថានភាពនៃការគ្រប់គ្រងបានមានភាគច្រើន។
សម្តេចធិបតី បានរំលឹកថា នៅឆ្នាំជាង១៩៩០ មានចោរប្លន់ជាបណ្តាញតែម្តង ហើយញឹកញាប់ណាស់ ក្រុមរ៉ាស្មាច់ និងក្រុមផ្សេងៗចេញមកទាំងអាការ ទាំងឡានៗ បន្តិចទៅនេះបន្តិចទៅនោះ ប៉ុន្តែបញ្ហាសន្តិសុខនៅពេលនេះគឺមានភាពល្អប្រសើរណាស់។
សម្តេចធិបតី បានលើកឡើងថា ថ្មីៗមានការបង្ក្រាបករណីបាញ់បោះនៅគិរីរម្យ ហើយបានស្រាវជ្រាវឃើញ ជាអកុសលនៅក្នុងជួរកម្លាំងសមត្ថកិច្ច ហើយបានចាត់វិធានការតឹងរឹង ដោយបណ្តេញចេញពីក្របខណ្ឌ ៤នាក់ ដើម្បីធ្វើជាគំរូត្រូវអនុវត្ត ហើយក៏ឃើញមានការចាប់ នៅតាមផ្ទះសំណាក់មួយចំនួនដែលបានបន្លំប្រើប្រាស់គ្រឿងញៀន បានអនុវត្តបានច្រើន និងសុំឱ្យយន្តការនេះបន្តដូចភ្លៀងរលឹម ធ្វើយ៉ាងបោសសំអាតបន្តិចម្តងៗ ដើម្បីប្រឆាំងអំពើទាំងអស់នេះ ៕
