នាយករដ្ឋមន្ត្រី៖ ការដាក់ឱ្យអនុវត្តកម្មវិធីរបបសន្តិសុខសង្គម ផ្នែកថែទាំសុខភាព គឺដើម្បីឆ្លើយតបទៅនឹងកំណើននៃតម្រូវការ និងបំណងប្រាថ្នារបស់ពលរដ្ឋ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ការដាក់ឱ្យអនុវត្តកម្មវិធីរបបសន្តិសុខសង្គម ផ្នែកថែទាំសុខភាព គឺដើម្បីឆ្លើយតបទៅនឹងកំណើននៃតម្រូវការ និងសេចក្ដីប្រាថ្នាចង់ក្លាយជាសមាជិក ប.ស.ស ពីពលរដ្ឋនៃសេដ្ឋកិច្ចក្រៅប្រព័ន្ធ ពិសេសបុគ្គលស្វ័យនិយោជន៍ ព្រមទាំងសមាជិក ប.ស.ស ដែលប្រាថ្នាចង់បានការថែទាំសុខភាពដល់សមាជិកគ្រួសាររបស់ខ្លួនផងដែរ ។

ក្នុងពិធីប្រកាសដាក់ឱ្យអនុវត្តជាផ្លូវការ «របបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.» និង «កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យ» នាថ្ងៃទី១៤ ខែវិច្ឆិកា សម្ដេចធិបតី ហ៊ុន ម៉ាណែត បានមានប្រសាសន៍ថា ការអនុវត្តរបបសន្តិសុខសង្គម គឺជាការអនុវត្តដោយយកចិត្តទុកដាក់ដ៏ចម្បងរបស់រាជរដ្ឋាភិបាលក្នុងការជួយប្រជាពលរដ្ឋឱ្យទទួលបានអត្ថប្រយោជន៍ ពិសេសការគាំទ្រជីវភាពនៅពេលមានគ្រោះថ្នាក់ការងារ ការថែទាំសុខភាព ការទទួលបានប្រាក់សោធនដូចមន្ត្រីរាជការសាធារណៈដែរ ដែលពីមុនមកមិនមានអនុវត្តនោះទេនៅក្នុងប្រវត្តិសាស្ត្រកម្ពុជា។

សម្ដេចធិបតីបន្តថា កម្មវិធីរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត ដែលប្រកាសដាក់ឱ្យអនុវត្តជាផ្លូវការនៅថ្ងៃនេះ មានវិសាលភាពអនុវត្តចំពោះបុគ្គលស្វ័យនិយោជន៍ និងអ្នកនៅក្នុងបន្ទុកសមាជិក ប.ស.ស រួមមានប្ដីឬប្រពន្ធ និងកូនក្នុងបន្ទុក ដើម្បីឱ្យពលរដ្ឋដែលជាបុគ្គលស្វ័យនិយោជន៍ និងអ្នកនៅក្នុងបន្ទុកសមាជិក ប.ស.ស គឺកូនក្រោមអាយុ១៨ឆ្នាំ ប្ដីឬប្រពន្ធដែលមានអាយុ៦០ឆ្នាំចុះ អាចបង់ភាគទានផ្នែកថែទាំសុខភាពបាន។

សម្ដេចធិបតីបញ្ជាក់ថា «ការពង្រីងវិសាលភាពនេះគឺដើម្បីឆ្លើយតបទៅនឹងកំណើននៃតម្រូវការ និងសេចក្ដីប្រាថ្នាចង់ក្លាយជាសមាជិក ប.ស.ស ពីពលរដ្ឋនៃសេដ្ឋកិច្ចក្រៅប្រព័ន្ធ ពិសេសបុគ្គលស្វ័យនិយោជន៍ ព្រមទាំងសមាជិក ប.ស.ស ដែលប្រាថ្នាចង់បានការថែទាំសុខភាពដល់សមាជិកគ្រួសាររបស់ខ្លួនផងដែរ ពីព្រោះបច្ចុប្បន្ននេះ ប.ស.ស បានក្លាយជានិម្មិតរូបសុខភាព និងការរីកចម្រើនរបស់ប្រជាជន និងកម្មករនិយោជិត ដែលបានជួយកាត់បន្ថយបន្ទុកចំណាយ ពង្រឹងស្ថិរភាព និងការព្យាករណ៍ចំណូល ធ្វើឱ្យប្រសើរឡើងនូវសុខភាពរបស់ពួកគាត់» ៕