សម្តេចធិបតី អរគុណអ្នកវិនិយោគចិន ដែលជួយពន្យល់ និងបកស្រាយយ៉ាងល្អ ចំពោះមតិមហាជនលើកឡើងពាក់ព័ន្ធ រឿង No More Bet
ភ្នំពេញ៖ សម្ដេចមហាបបរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងអំណរគុណដល់អ្នកវិនិយោគទុនចិន ដែលបានជួយពន្យល់ និងបកស្រាយយ៉ាងល្អចំពោះមតិមហាជនលើកឡើងពាក់ព័ន្ធ រឿងភាពយន្តចិន (No More Bet) ។
ក្នុងពិធីជួបសំណេះសំណាល ជាមួយកម្មករជាង ១ម៉ឺន ៥ពាន់នាក់ នៅខេត្តព្រះសីហនុ នាថ្ងៃទី៧ វិច្ឆិកានេះ សម្ដេចធិបតី ហ៊ុន ម៉ាណែត បានរំលឹកថា អំឡុងទស្សនកិច្ចផ្លូវការលើកទី២ របស់សម្ដេចទៅកាន់ទីក្រុងប៉េកាំង កាលពីខែតុលាកន្លងទៅនេះ សម្ដេចបានជួបជាមួយវិនិយោគិនមកពីតំបន់សេដ្ឋកិច្ចពិសេសចេជាង ដែលពួកគាត់បានជួយបកស្រាយពន្យល់ និងបំភ្លឺដល់មតិមហាជនមួយចំនួន នៅប្រទេសចិន ដែលគាត់ព្រួយបារម្ភពីសុវត្ថិភាព ព្រោះមានរឿងចិន «No More Bet» និយាយពី អសុវត្ថិភាពនៅក្រុងព្រះសីហនុ។
សម្ដេចធិបតី ហ៊ុន ម៉ាណែត បានដកស្រង់សម្ដីរបស់វិនិយោគិនទាំងនោះ ពន្យល់ទៅកាន់មតិសាធារណៈ នៅក្រៅប្រទេសថា «គាត់ឡើងនិយាយ គាត់ថា ទេ ! គាត់ធ្វើការនៅហ្នឹងរាល់ថ្ងៃ បុគ្គលិករបស់គាត់មកពីចិនក៏មាន មាននរណាភ័យផងហ្នឹង ហើយគាត់បានទៅប្រាប់គេទៀត»។
សម្តេចធិបតីបានថ្លែងអំណរគុណជាថ្មីចំពោះវិនិយោគិនជនជាតិចិនទាំងនោះ ដែលមានជំនឿទុកចិត្តលើប្រទេសកម្ពុជា ហើយបានបន្តជួយយកអាសារការពារកម្ពុជា។ សម្តេចស្នើក៏ឱ្យបន្តបង្កើតការងារ ផ្ដល់ការយកចិត្តទុកដាក់ទៅលើជីវភាព សុវត្ថិភាព និងបរិស្ថានការងារដល់បងប្អូនកម្មករបន្តទៀត ៕
