ឯកឧត្តមទេសរដ្ឋមន្ត្រី សក់ សេដ្ឋា អញ្ជើញសំណេះសំណាលជាមួយ គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស ត្រៀមប្រឡងបាក់ឌុប

​

ភ្នំពេញ៖ ឯកឧត្តម សក់ សេដ្ឋា ទេសរដ្ឋមន្ត្រី ទទួលបន្ទុកបេសកកម្មពិសេស និងជាប្រធានក្រុមការងារ រាជរដ្ឋាភិបាលចុះមូលដ្ឋានស្រុកបវេល ខេត្តបាត់ដំបង នាព្រឹកថ្ងៃទី២៨ ខែតុលា ឆ្នាំ២០២៣នេះ បានអញ្ជើញសំណេះសំណាលជាមួយ គណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស ត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ៦ វិច្ឆិកា ២០២៣ នៃវិទ្យាល័យបវេល និងវិទ្យាល័យល្វា ។

ថ្លែងក្នុងពិធីសំណេះសំណាលនេះដែរ ឯកឧត្ដមទេសរដ្ឋមន្ត្រី សក់ សេដ្ឋា បានលើកទឹកចិត្ត និងផ្ដាំផ្ញើដល់សិស្សានុសិស្សទាំងអស់ ត្រូវតែយកចិត្តទុកដាក់ខិតខំសិក្សារៀនសូត្រ បញ្ចេញឱ្យអស់ពីសមត្ថភាព ដើម្បីប្រឡងជាប់សញ្ញាបត្រមធ្យមសិក្សាទុតិយភូមិ ធ្វើយ៉ាងណាឱ្យទទួលបានលទ្ធផលជោគជ័យ និងនិទ្ទេសល្អទាំងអស់គ្នា។

ឯកឧត្ដមទេសរដ្ឋមន្ត្រី បានជូនពរឲ្យ សិស្សានុសិស្សថ្នាក់ទី១២ ទាំងអស់ក្នុងស្រុកបវេល ក៏ដូចជានៅទូទាំងប្រទេស ប្រលងជាប់ និងទទួលបាននិទ្ទេសល្អគ្រប់ៗគ្នា ៕

ក្នុងឱកាសនោះដែរលោក សួន វែង ប្រធាន ស.ស.យ.ក ស្រុកបវេល បានមានប្រសាសន៍ថា ជារៀងរាល់ឆ្នាំសហភាពសហព័ន្ធយុវជនកម្ពុជាស្រុកបវេលតែងតែខិតខំស្វះស្វែងរកអាហារូបករណ៍ជូនប្អូនៗបើទោះបីជាប្អូនៗប្រឡងជាប់ឬធ្លាក់ក៏ដោយ ដើម្បីឱ្យមានឱកាសបន្តការសិក្សានៅថ្នាក់មហាវិទ្យាល័យនានាក្នុងខេត្តក៏ដូចជាទីក្រុងភ្នំពេញផងដែរ អាហារូបករណ៍ទាំងនោះបានមកពីសំណាក់ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងប្រធានក្រុមការងាររាជរដ្ឋាភិបាលចុះមូលដ្ឋានស្រុកបវេល រួមមានអាហារូបករណ៍ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអនុប្រធានសហភាពសហព័ន្ធយុវជនកម្ពុជាទទួលបន្ទុក០៣ខេត្ត បាត់ដំបង បន្ទាយមានជ័យ និងព្រៃវែង អាហារូបករណ៍របស់សម្តេចអគ្គមហាសេនាធិបតី តេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងអាហារូបករណ៍របស់សម្តេចក្រឡាហោម ស ខេង ឧត្តមក្រុមប្រឹក្សាផ្ទាល់ព្រះមហាក្សត្រតាមរយៈឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ ទាំងបរិញ្ញាបត្រ បរិញ្ញាបត្ររង និងកម្រិតបច្ចេកទេសវិជ្ជាជីវៈទី១ នៅសកលវិទ្យាល័យ និងវិទ្យាស្ថាននានាក្នុងខេត្តបាត់ដំបង ។

ប្រធាន ស.ស.យ.ក ស្រុកបវេល បញ្ជាក់ថា កាលពីឆ្នាំសិក្សា២០២១-២០២២នេះ សិស្សថ្នាក់ទី១២នៃវិទ្យាល័យបវេល និងវិទ្យាល័យល្វា សរុបមាន ៥៨១ នាក់ ស្រីចំនួន ៣៣០ នាក់ បានប្រឡងជាប់សញ្ញាបត្រមធ្យមសិក្សាទុតិយភូមិ ក្នុងសម័យប្រឡង ០៥ ធ្នូ ២០២២ សរុបចំនួន ៤១៨ នាក់ ស្រីចំនួន ២៥២ នាក់ ក្នុងនោះនិទ្ទេស A សរុប ០១ នាក់ ស្រី ០០ នាក់ និទ្ទេស B សរុប ៣៤ នាក់ ស្រី ១៨ នាក់ និទ្ទេស C សរុប ៨២ នាក់ ស្រី ៥៨ នាក់ និទ្ទេស D សរុប ១៣៧ នាក់ ស្រី ៨៧ នាក់ និងនិទ្ទេស E សរុប ១៦៤ នាក់ ស្រី ៨៩ នាក់ ស្មើនឹង ៧១.៩៤% បើធៀបនឹងថ្នាក់ខេត្ត ៦៨.២៥% ខ្ពស់ជាង ៣.៦៩ % ហើយបើធៀបនឹងថ្នាក់ជាតិ ៧២.៣៣% ក្រោម ០.៣៩% ហើយបើធៀបទៅនឹងឆ្នាំសិក្សា២០២០-២០២១ ៦២.៨៩% យើងកើនបាន ៩.០៥%។ ដោយឡែកក្នុងឆ្នាំសិក្សា២០២២-២០២៣នេះ សិស្សថ្នាក់ទី១២នៃវិទ្យាល័យបវេល និងវិទ្យាល័យល្វា សរុបមាន ៦៨៦ នាក់ ស្រីចំនួន ៤០៤ នាក់ កើនលើសឆ្នាំសិក្សាមុនចំនួនសរុប ១០៥ នាក់ ស្រី ៧៤នាក់ដើម្បីត្រៀមឡងសញ្ញាបត្រមធ្យមសិក្សាទុតិយភូមិ ក្នុងសម័យប្រឡង ០៦ វិច្ឆិកា ២០២៣ នៅទីរួមខេត្តបាត់ដំបង ។ ដើម្បីលើកកម្ពស់វិស័យអប់រំ សហភាពសហព័ន្ធយុវជនកម្ពុជាខេត្តបាត់ដំបង ស.ស.យ.កស្រុកបវេល និងវិទ្យាល័យទាំង២បានរៀបចំវគ្គបំប៉នដោយឥតគិតថ្លៃចាប់ពីថ្ងៃទី១០ ខែសីហា មកដល់ចុងខែតុលានេះ មានរយៈពេលជាងពីរខែលើ៥មុខវិជ្ជា៖ ភាសាខ្មែរ គណិត រូប គីមី និងជីវវិទ្យា ក្រោមការជួយឧត្ថម្ភរបស់សម្តេចក្រឡាហោម ស ខេង ឧត្តមក្រុមប្រឹក្សាផ្ទាល់ព្រះមហាក្សត្របន្ថែមដល់លោកគ្រូ អ្នកគ្រូចំនួន១០នាក់ក្នុងម្នាក់ៗ១០០ដុល្លារ។

លើសពីនេះទៀតនោះ ក្នុងនាមការិយាល័យអបរំ យុវជន និងកីឡាស្រុក សហភាពសហព័ន្ធយុវជនកម្ពុជាស្រុកបវេល គណៈគ្រប់គ្រងសាលារៀន លោកគ្រូ អ្នកគ្រូ និងសិស្សានុសិស្សទាំងអស់ សូមគោរពថ្លែងអំណរគុណដ៏ជ្រាលជ្រៅបំផុតចំពោះ ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកកម្មពិសេស និងប្រធានក្រុមការងាររាជរដ្ឋាភិបាលចុះមូលដ្ឋានស្រុកបវេល ដែលជានិច្ចជាកាលឯកឧត្តមប្រធាន តែងតែឧបត្ថម្ភ គាំទ្រ និងបានផ្តល់ឱកាស និងលើកទឹកចិត្តដល់ប្អូនៗសិស្សានុសិស្សក្នុងស្រុកមិនដែលខកខានមួយឆ្នាំណាឡើយ ហើយជាពិសេស សូមថ្លែងអំណរគុណផងដែរចំពោះ ឯកឧត្តម អ៊ួង ចន្ធី ប្រធានក្រុមការងារថ្នាក់ជាតិគាំទ្រយុវជនស្រុកបវេល ដែលបានយកចិត្តទុកដាក់ចំពោះយុវជន យុវសិស្ស និងបានគាំទ្រយ៉ាងពេញទំហឹង ទាំងស្មារតី សម្ភារៈ និងថវិកា ៕