នាយឧត្តមសេនីយ៍ ប៉ោ ភក្តិ អញ្ជើញចូលរួមសន្និសីទស្តីពីការជំរុញអភិបាលកិច្ច និងបច្ចេកវិទ្យាឌីជីថល
ភ្នំពេញ៖ នាព្រឹកថ្ងៃទី២៤ ខែតុលា ឆ្នាំ២០២៣ ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការ ក្រសួងមហាផ្ទៃ បានអញ្ជើញចូលរួម សន្និសីទ ស្តីពីការជំរុញអភិបាលកិច្ច និងបច្ចេកវិទ្យាឌីជីចល ហៅកាត់ថា GovTech ក្រោមប្រធានបទ ការជំរុញបរិវត្តកម្មឌីជីថលក្នុងវិស័យសាធារណៈ ក្រោមអធិបតីភាព ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការដ្ឋាភិបាលឌីជីថល ដែលប្រព្រឹត្តិទៅនៅមជ្ឈមណ្ឌលនវានុវត្តន៍ឌីជីថល នៃបណ្ឌិត្យសភាបច្ចេកវិទ្យាឌីជីថលកម្ពុជា។ សន្និសីទនេះក៏មានការអញ្ជើញចូលពីថ្នាក់ដឹកនាំមកពីបណ្តាក្រសួង ស្ថាប័នពាក់ព័ន្ធ ព្រមជាមួយដៃគូអភិវឌ្ឍន៍ជាច្រើនរូបផងដែរ។
ឯកឧត្តម ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការដ្ឋាភិបាលឌីជីថល បានមានប្រសាសន៍ស្វាគមន៍ និងបានលើកថា សន្និសីទនេះពិតជាមានសារៈសំខាន់ណាស់សម្រាប់កម្ពុជា ហើយវាក៏ជាការចាប់ផ្តើមថ្មីមួយទៀត ដែលមានកំណត់នៅក្នុងគោលនយោបាយរដ្ឋាភិបាលឌីជីថលកម្ពុជា (២០២២-២០៣៥) ដែលផ្សារភ្ជាប់ទៅនឹងទំនាក់ទំនងការពង្រឹងកិច្ចសហប្រតិបត្តិការ និងភាពជាដៃគូ តាមរយៈការជំរុញកិច្ចសន្ទនា ការផ្លាស់ប្តូរបទពិសោធន៍ និងការបញ្ជ្រៀបការយល់ដឹងផងដែរ។
ឯកឧត្តម បានបន្តថា សន្និសីទនេះដែរ ក៏នឹងធ្វើអោយប្រសើរឡើងចំពោះការផ្តល់សេវាសាធារណៈតាមរយៈការប្រើប្រាស់បច្ចេកវិទ្យាឌីជីថល ព្រមទាំងស្វែងយល់នូវបញ្ហាប្រឈម និងដំណោះស្រាយនាពេលកន្លងមក ដល់គ្រប់ភាគីពាក់ព័ន្ធ ជាពិសេសក្រសួងស្ថាប័នក្នុងរាជរដ្ឋាភិបាល ដើម្បីចូលរួមក្នុងដំណើរការបរិវត្តកម្មរដ្ឋាភិបាលឌីជីថល។
ឯកឧត្តម បានបន្ថែមទៀតថា ប្រធានបទនៃសន្និសីទនាពេលនេះ ត្រូវបានកំណត់ឡើងស្របតាមនិន្នាការនៃការវិវត្តយ៉ាងឆាប់រហ័សនៃបច្ចេកវិទ្យាឌីជីថល ដែលបាននឹងកំពុងកែប្រែទម្លាប់នៃការរស់នៅប្រចាំថ្ងៃរបស់ប្រជាពលរដ្ឋ ព្រមទាំងរបៀបនៃការធ្វើធុរកិច្ច ការបំពេញការងារស្ទើរគ្រប់វិស័យក្នុងសេដ្ឋកិច្ចសង្គម ជាពិសេសគឺស្របពេលដែលរាជរដ្ឋាភិបាលកម្ពុជា កំពុងពន្លឿននៃការអភិវឌ្ឍសេដ្ឋកិច្ចសង្គម ដោយផ្លាស់ប្តូរមកប្រើប្រាស់បច្ចេកវិទ្យាឌីជីថលដែលជាគន្លឹះនៃការជម្រុញ ដើម្បីសម្រេចបានចក្ខុវិស័យកម្ពុជា។
សូមបញ្ជាក់ផងដែរថា សន្និសីទស្ដីពី “ការជំរុញអភិបាលកិច្ច និងបច្ចេកវិទ្យាឌីជីថល” ហៅកាត់ថាសន្និសីទ GovTech ក្រោមប្រធានបទ “ការជំរុញបរិវត្តកម្មឌីជីថលនៅក្នុងវិស័យសាធារណៈ” គឺជាសន្និសីទលើកដំបូងសម្រាប់កម្ពុជា ដែលធ្វើឡើងដើម្បី ជាវេទិកាប្រមូលផ្ដុំសម្រាប់មន្ត្រីបច្ចេកទេសឌីជីថលពីបណ្តាក្រសួង ស្ថាប័ន អ្នកតំណាងខាងវិស័យឯកជន និងអ្នកតំណាងដៃគូអភិវឌ្ឍន៍ ចែករំលែកបទពិសោធ ឧត្តមានុវត្ត និងករណីសិក្សាពាក់ព័ន្ធនឹងអភិបាលកិច្ច និងបច្ចេកវិទ្យាឌីជីថល និងបង្កើនភាពស្និទស្នាល បង្កើតដៃគូសហការ និងពិភាក្សាផ្លាស់ប្ដូរបទពិសោធន៍អំពីបច្ចេកវិទ្យាឌីជីថលចុងក្រោយ កាលានុវត្តភាព និងបញ្ហាប្រឈមនានានៅក្នុងបច្ចេកវិទ្យារដ្ឋាភិបាលឌីជីថល៕
