បើកម៉ូតូវ៉ាជែងមិនប្រយ័ត្នជ្រុលទៅបុកផាស្អាប់ស្លាប់ម្នាក់និងរបួសធ្ងន់ម្នាក់ នៅសង្កាត់ផ្សារកណ្តាល ក្រុងប៉ោយប៉ែត
ភ្នំពេញ៖ មនុស្សម្នាក់បានស្លាប់នៅនឹងកន្លែងនិងម្នាក់ទៀតរបួសធ្ងន់ ដោយគ្រោះថ្នាក់ចរាចរណ៍រវាងម៉ូតូហុងដាវេវបុកជាមួយផាស្អាប់នៅថ្ងៃទី១២ ខែតុលា ឆ្នាំ២០២៣ វេលាម៉ោង១៣និង៥០នាទី លើផ្លូវជាតិលេខ៥នៅត្រង់ចំណុចខាងមុខអាស្រមលោកយាយម៉ៅស្ថិតក្នុងភូមិអណ្តូងថ្មមាស សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
នគរបាលចរាចរណ៍ក្រុងប៉ោយប៉ែតបានឲ្យដឹងថា៖ជនរងគ្រោះបើកបរម៉ូតូវេវស្លាប់ឈ្មោះ វិច្ឆិការ ភេទប្រុស អាយុ១៧ឆ្នាំ មុខរបរកម្មករ រស់នៅភូមិបន្ទាយទី1 ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ និងអ្នករបួសធ្ងន់ចំនួន០១នាក់(ប្រុស)មិនទាន់ស្គាល់ឈ្មោះជាអ្នករួមដំណើរលើម៉ូតូត្រូវបានក្រុមយុវជនសង្គ្រោះដឹកយកទៅមន្ទីរពេទ្យបង្អែកប៉ោយប៉ែត ។ចំណែកអ្នកបើកបរផាស្អាប់ឈ្មោះ គង់ ម៉ៅ ភេទ ប្រុស អាយុ២១ ឆ្នាំ មុខរបរ បើកបរផាសអេប រស់នៅភូមិអូរនាង សង្កាត់អូរឬស្សី ក្រុងប៉ោយប៉ែត ខេត្តបន្ទាយមានជ័យ ។
នគរបាលចរាចរណ៍បានបញ្ជាក់ថា៖មុនពេលកើតហេតុអ្នកបើកម៉ូតូហុងវ៉េវ ពណ៌ខ្មៅ ពាក់ផ្លាកលេខ បន្ទាយមានជ័យ 1V-9561 ជិះគ្នា០២នាក់បើកបរពីទិសខាងកើតទៅទិសខាងលិច ក្នុងល្បឿនលឿន ដល់កន្លែងកើតហេតុបានឡើងជែងរថយន្តបើកនៅពីមុខ ហើយក៏ជ្រុលទៅបុកនិងម៉ូតូផាស្អាប់មួយគ្រឿង ពណ៌ស ពាក់ផ្លាកលេខ ភ្នំពេញ 1JV-4124 បើកបរពីទិសខាងលិចទៅទិសខាងកើត(ច្រាសទិសគ្នា) បណ្តលអោយគ្រោះថ្នាក់មានអ្នកស្លាប់និងរបួស ។
ចំពោះវត្ថុតាងម៉ូតូវេវខូចធ្ងន់ ម៉ូតូផាស្អាប់ខូចស្រាល ។វត្ថុតាងទាំង០២គ្រឿងនគរបាលជំនាញយកមករក្សាទុកនៅអធិការដ្ឋាននគរបាលក្រុងប៉ោយប៉ែត រងចាំធ្វើការដោះស្រាយនៅពេលក្រោយ៕
