ឯកឧត្តម គង់ សោភ័ណ្ឌ ជួបសំណេះសំណាលជាមួយថ្នាក់ដឹកនាំ កង កម្លាំង នៃស្នងការដ្ឋាននគរបាលខេត្តកណ្ដាល ក្នុងឱកាសពិធីបុណ្យភ្ជុំបិណ្ឌ

ភ្នំពេញ៖ ឯកឧត្តម គង់ សោភ័ណ្ឌ អភិបាល នៃគណៈអភិបាលខេត្តកណ្ដាល នាព្រឹកថ្ងៃព្រហស្បតិ៍ ១៣រោច ខែភទ្របទ ឆ្នាំ ថោះ បញ្ចស័ក ព.ស.២៥៦៧ ត្រូវនឹងថ្ងៃទី១២ ខែតុលា ឆ្នាំ២០២៣ បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីសំណេះសំណាលជាមួយថ្នាក់ដឹកនាំ កងកម្លាំងនៃស្នងការដ្ឋាននគរបាលខេត្តកណ្ដាល ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ នៅស្នងការដ្ឋាននគរបាលខេត្តកណ្តាល។

នាឱកាសនេះ ឯកឧត្តម​ គង់ សោភ័ណ្ឌ អភិបាលខេត្ត បានសម្តែងការកោត សរសើរ និងវាយតម្លៃខ្ពស់ចំពោះសកម្មភាព កងកម្លាំងមានសមត្ថកិច្ចទាំងអស់ រួមមាន នគរបាលប៉ុស្តិ៍ អធិការក្រុង កងរាជអាវុធហត្ថក្រុង បញ្ជាការដ្ឋានផ្នែកសឹករងក្រុង និងប្រជាការពារ ក្នុងការខិតខំបំពេញភារកិច្ច ការពាររក្សាបាននូវសុខសន្តិភាព និងសណ្តាប់ធ្នាប់សាធារណៈ ព្រមទាំងការពារសុខសុវត្ថិភាពជូនបងប្អូនប្រជាពលរដ្ឋ ក្នុងមូលដ្ឋានបានយ៉ាងល្អប្រសើរ។

ឯកឧត្តមអភិបាលខេត្ត បានបន្តថា សូមអរគុណដល់ អាជ្ញាធរ កងកម្លាំងគ្រប់លំដាប់ថ្នាក់ទូទាំងខេត្ត ដែលបានការពារសុវត្ថិភាព សន្តិសុខ សណ្តាប់ធ្នាប់សាធារណៈ របៀបរៀបរយ និងសម្រួលចរាចរណ៍ឱ្យបានល្អប្រសើរ បង្កលក្ខណៈងាយស្រួលជូនដល់បងប្អូនប្រជាពលរដ្ឋ និងទេសចរណ៍ នៅក្នុងកំឡុងពេលបុណ្យភ្ជុំបិណ្ឌនេះ។

ជាចុងក្រោយ ឯកឧត្តមអភិបាលខេត្ត ក៏បានបួងសួងដល់គុណបុណ្យព្រះរតនត្រ័យ ទេវតាថែរក្សាទឹកដីព្រះរាជាណាក្រកម្ពុជា វត្ថុស័ក្តិសិទ្ធិក្នុងលោក សូមជួយអភិបាលប្រោះព្រំ ប្រសិទ្ធពរជ័យជូន ថ្នាក់ដឹកនាំ និងកងកម្លាំងទាំងអស់ និងអង្គពិធីទាំងមូល សូមបានប្រកបតែនឹងពុទ្ធពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀង ឃ្លាតឡើយ ៕