ក្រុមប្រឹក្សាអភិវឌ្ឍន៍កម្ពុជា អនុម័តឱ្យក្រុមហ៊ុនចំនួន៣ មានទុនវិនិយោគ ១៣លានដុល្លារ វិនិយោគលើរោងចក្រផលិតស្រោមជើង គ្រឿងសង្ហារិមក្រៅផ្ទះ និងផ្គុំដំឡើងគ្រឿងបន្លាស់រថយន្ត

ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា បានអនុម័តឱ្យក្រុមហ៊ុនចំនួន៣ ដែលមានទុនវិនិយោគ ១៣ លានដុល្លារអាម៉េរិក  វិនិយោគលើរោងចក្រផលិតស្រោមជើង រោងចក្រផលិតគ្រឿងសង្ហារិមក្រៅផ្ទះ និងរោងចក្រផ្គុំដំឡើងគ្រឿងបន្លាស់រថយន្ត។

គម្រោងវិនិយោគទាំងបីនេះ មានទីតាំងក្នុងតំបន់សេដ្ឋកិច្ចពិសេស នៅខេត្តព្រះសីហនុ ស្វាយរៀងនិងបន្ទាយមានជ័យនិងអាចបង្កើតការងារ ​ជូនប្រជាជនជាង ២.០០០ នាក់។

យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី ៩ ខែតុលា បានឱ្យដឹងថា ក្រុមហ៊ុនJUHAI BAOSHUN (CAMBODIA) CO., LTD.មានគម្រោងបង្កើត រោងចក្រផលិតស្រោមជើង ដែលមានទីតាំងវិនិយោគ ស្ថិតនៅក្នុងតំបន​សេដ្ឋកិច្ច​ពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគប្រមាណ ៥,២លានដុល្លារអាម៉េរិក និងអាចបង្កើតការងារបានចំនួន ៨០៤ កន្លែង។

ចំណែកក្រុមហ៊ុន HOME TERRACE CO., LTD. គម្រោងគបង្កើតរោងចក្រផលិតគ្រឿង សង្ហារិមក្រៅផ្ទះ (មានដូចជា តុ, កៅអី, តង់, អង្រឹង, រនាំងបាំង, រទះដាក់សម្ភារៈ, កៅអីបង់, ឆ័ត្រ…) ដែលមានទីតាំងវិនិយោគ ស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីសស៍ ខេត្តស្វាយរៀង ក្នុងទុនវិនិយោគ ៥លានដុល្លារអាម៉េរិក និងអាចបង្កើតការងារ បានចំនួន ៦៨៦ កន្លែង។

រីឯក្រុមហ៊ុន TECHNO PARK POI PET PVT CO., LTD.” គម្រោងបង្កើតរោងចក្រផ្គុំ ដំឡើងគ្រឿងបន្លាស់រថយន្ត ដែលមានទីតាំងវិនិ​យោគ ​ស្ថិតនៅក្នុងតំបន់សេដ្ឋកិច្ចពិសេស សានកូ ប៉ោយប៉ែត ខេត្តបន្ទាយមានជ័យ ក្នុងទុនវិនិយោគ ប្រមាណ ២,៦ លានដុល្លារ អាម៉េរិក និងអាចបង្កើតការងារបានចំនួន ៧៩៣ កន្លែង៕