ក.ប.ប រៀបចំវគ្គបណ្តុះបណ្តាលស្តីពី «ការពង្រឹងសមត្ថភាពមន្ត្រីលើការអនុវត្តបទប្បញ្ញត្តិថ្មីៗ ពាក់ព័ន្ធនឹងអនុក្រឹត្យស្តីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច និងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា»
ភ្នំពេញ៖ នាថ្ងៃទី០៥ និងថ្ងៃទី០៦ ខែតុលា ឆ្នាំ២០២៣ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» សហការជាមួយទីភ្នាក់ងារសហប្រតិបត្តិការអាល្លឺម៉ង់ (GIZ) បានរៀបចំ «វគ្គបណ្តុះបណ្តាលស្ដីពីការពង្រឹងសមត្ថភាពមន្ត្រីលើការអនុវត្តបទប្បញ្ញត្តិថ្មីៗ ពាក់ព័ន្ធនឹងអនុក្រឹត្យស្តីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច និងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា» នៅទីស្នាក់ការអគ្គនាយកដ្ឋាន ក.ប.ប. ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. និងលោកស្រី គង់ ដារ៉ែន ទីប្រឹក្សាជាន់ខ្ពស់សម្រាប់កិច្ចសហប្រតិបត្តិការសេដ្ឋកិច្ចនិងការអភិវឌ្ឍន៍វិស័យឯកជន (GIZ)។ សមាសភាពចូលរួមក្នុងវគ្គបណ្តុះបណ្តាលខាងលើរួមមាន ឯកឧត្តម លោកអគ្គនាយករង ប្រធាននាយកដ្ឋាន អនុប្រធាននាយកដ្ឋាន ប្រធានសាខា ក.ប.ប. រាជធានី ខេត្ត ប្រធានការិយាល័យ អនុប្រធានការិយាល័យ មន្ត្រីរាជការនៃអគ្គនាយកដ្ឋាន ក.ប.ប. សរុបប្រមាណ ៣០០នាក់។
គោលបំណងក្នុងការរៀបចំវគ្គបណ្តុះបណ្តាលនេះ គឺជាផ្នែកមួយក្នុងការជួយពង្រឹងសមត្ថភាពរបស់មន្ត្រីអនុវត្តច្បាប់ ជាពិសេសបានស្វែងយល់បន្ថែមអំពីការអនុវត្តបទប្បញ្ញត្តិថ្មីៗ ពាក់ព័ន្ធនឹងអនុក្រឹត្យស្តីពីលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច និងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា និងផ្លាស់ប្ដូរបទពិសោធន៍នានា សម្រាប់ការអនុវត្តច្បាប់របស់អគ្គនាយកដ្ឋាន ក.ប.ប. បន្ថែមទៀត។ ជាពិសេសព្រមទាំងបានផ្តល់ឱកាសដល់វាគ្មិនដែលធ្លាប់មានបទពិសោធន៍បានរចែករំលែកបទពិសោធន៍របស់ខ្លួន ជូនដល់សិក្ខាកាមដែលបានចូលរួមទាំងអស់ពាក់ព័ន្ធនឹងលក្ខខណ្ឌនិងនីតិវិធីអំពីការរួមបញ្ចូលគ្នានៃធុរកិច្ច ព្រមទាំងការអនុវត្តអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា។
ថ្លែងក្នុងពិធីបើកវគ្គបណ្តុះបណ្តាលនេះ ឯកឧត្ដម ផាន អូន បានផ្តាំផ្ញើដល់សិក្ខាកាមទាំងអស់ ត្រូវត្រងត្រាប់ស្តាប់គ្រូឧទ្ទេសនាម និងលើកឱ្យអស់នូវបញ្ហានានាដែលបានជួបប្រទះក្នុងកំឡុងពេលអនុវត្តច្បាប់ ព្រមទាំងស្វែងរកដំណោះស្រាយរួមគ្នា ដើម្បីឆ្លើយតបទៅបញ្ហាប្រឈមនានា ឱ្យមានភាពស្របគ្នាក្នុងការអនុវត្តច្បាប់ និងឆ្លើយតបរាល់សំណួរនានាទៅសាធារណជន និង/ឬបុគ្គលពាក់ព័ន្ធ និងបន្តសិក្សារៀនសូត្រជានិច្ច ព្រោះអគ្គនាយកដ្ឋាន ក.ប.ប. តែងតែបន្តរៀបចំនូវបទប្បញ្ញត្តិថ្មីៗ សម្រាប់គាំទ្រដំណើរការអនុវត្តច្បាប់ និងបទប្បញ្ញត្តិពាក់ព័ន្ធធ្វើយ៉ាងណាឱ្យទទួលបានប្រសិទ្ធភាព និងប្រសិទ្ធផលខ្ពស់ ៕
