អគ្គនាយកដ្ឋានរដ្ឋបាល រៀបចំកិច្ចប្រជុំសំណេះសំណាល ជាមួយមន្ត្រីរាជការ នៃនាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់

ភ្នំពេញ៖នៅរសៀលថ្ងៃព្រហស្បតិ៍ ទី០៥ ខែតុលា ឆ្នាំ២០២៣ អគ្គនាយកដ្ឋានរដ្ឋបាល នៃក្រសួងមហាផ្ទៃ បានរៀបចំកិច្ចប្រជុំសំណេះសំណាលជាមួយមន្ត្រីរាជការ ក្រោមចំណុះនាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់ ក្រោមអធិបតីភាព ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល ដោយមានការអញ្ជើញចូលរួមពី ឯកឧត្តម លោកជំទាវ ប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ អនុប្រធានការិយាល័យ និងមន្រ្តីក្រោមឱវាទជាច្រើនរូបផងដែរ។

ជាកិច្ចចាប់ផ្តើម ឯកឧត្តម សួស ប្រាថ្នា អគ្គនាយក នៃអគ្គនាយកដ្ឋានរដ្ឋបាល បានសម្តែងនូវការកោតសរសើរ និងវាយតម្លៃខ្ពស់ ចំពោះឯកឧត្តម លោកជំទាវ និងមន្ត្រីទាំងអស់ដែលបានខិតខំប្រឹងប្រែងបំពេញការងារ យកអស់កម្លាំងកាយចិត្តប្រកបដោយស្មារតីទទួលខុសត្រូវខ្ពស់នាពេលកន្លងមក។

ឯកឧត្តអគ្គនាយក មានប្រសាសន៍បញ្ជាក់ថា កិច្ចប្រជុំនាថ្ងៃនេះ រៀបចំឡើងក្នុងគោលបំណង ដើម្បីបង្កើននូវភាពស្និតស្នាល រវាងថ្នាក់ដឹកនាំ ជាមួយមន្ត្រីទាំងអស់ ព្រមទាំងស្វែងយល់ឱ្យបានស៊ីជម្រៅនៃក្របខណ្ឌនីមួយៗក្នុ និងដើម្បីពិនិត្យលើបញ្ហាប្រឈម សំណើ សំណូម និងការលើកទិសដៅការងារបន្តទៀត ដែលជាការរួមចំណែក ក្នុងការងារអនុវត្តគោលដៅយុទ្ធសាស្ត្រ កំណែទម្រង់វិម្ឈការ និងវិសហមជ្ឈការ និង កំណែទម្រង់បញ្ចកោណដំណាក់កាលទី១ របស់រាជរដ្ឋាភិបាល។

នាឱកាសនោះដែរ លោក លី យ៉ាសាក់ ប្រធាននាយកដ្ឋានកិច្ចការរដ្ឋបាល ក្រុង ស្រុក ឃុំ សង្កាត់ នៃ អគ្គនាយកដ្ឋានរដ្ឋបាល ក្រសួងមហាផ្ទៃ បានធ្វើសេចក្តីរាយការណ៍សង្ខេបនូវសមិទ្ធផល ដែលនាយកដ្ឋានសម្រេចបានក្នុងរយៈពេលជាង ៩ខែ នៃឆ្នាំ២០២៣។ លោកប្រធាននាយកដ្ឋាន បានលើកឡើងអំពីការរៀបចំរចនាសម្ព័ន្ធ និងតួនាទីភារកិច្ច ការងារគម្រោងមូលនិធី ក្រុង ស្រុក ឃុំ សង្កាត់ វឌ្ឍនភាព និងការអនុវត្តគម្រោង មូលនិធិក្រុងស្រុកនៅឆ្នាំ២០២៣ ព្រមទាំងការដោះស្រាយរាល់បណ្តឹង ព្រមទាំងការចុះតាមដានការអនុវត្តការងាររបស់រដ្ឋបាលថ្នាក់ក្រោមជាតិ។

ក្នុងនោះ លោក លី យ៉ាសាក់ ក៏បានលើកឡើងនូវទិសដៅការងារបន្ត ដោយនាយកដ្ឋានបានរៀបចំយុទ្ធសាស្ត្ររយៈពេល៥ឆ្នាំ (២០២៣-២០២៨) ដើម្បីធ្វើជាផែនទីបង្ហាញផ្លូវ ក្នុងការអនុវត្តតួនាទីរបស់ខ្លួនប្រកបដោយប្រសិទ្ធភាព។ ជាមួយគ្នានោះ នាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់ នឹងបន្តពង្រឹងសមត្ថភាព និងការទទួលខុសត្រូវរបស់មន្ត្រីរបស់នាយកដ្ឋានក្នុងការអនុវត្តតួនាទីភារកិច្ចរបស់ខ្លួនឱ្យមានប្រសិទ្ធភាពស្របតាមកំណែទម្រង់វិម្ឈការ និងវិសហម្ឈការ ព្រមទាំងគោលនយោបាយ និងកម្មវិធីនានារបស់រាជរដ្ឋាភិបាល។

ក្រោយបានស្តាប់របាយការណ៍សង្ខេបហើយនោះ ឯកឧត្តម សួស ប្រាថ្នា បានសម្តែងនូវការកោតសសើរ ចំពោះថ្នាក់ដឹកនាំ និងមន្ត្រីនៃនាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់ ដែលបានខិតខំប្រឹងប្រែងបំពេញតួនាទីភារកិច្ចយ៉ាងសកម្ម រហូតទទួលបានលទ្ធផលខាងលើ ។

ឯកឧត្តម អគ្គនាយក មានប្រសាសាន៍បន្តថា នាយកដ្ឋានកិច្ចការរដ្ឋបាលក្រុង ស្រុក ឃុំ សង្កាត់នេះ ជានាយកដ្ឋានស្នូល របស់អគ្គនាយកដ្ឋានរដ្ឋបាល ក្រសួងមហាផ្ទៃ ដែលទទួលខុសត្រូវ លើការងារគាំទ្រដល់រដ្ឋបាលក្រុង ស្រុក និងរដ្ឋបាលឃុំ សង្កាត់ក្នុងការអនុវត្តតួនាទីភារកិច្ចរបស់ខ្លួនឱ្យបានសមស្រប តាមច្បាប់ស្តីពីការគ្រប់គ្រងរដ្ឋបាលរាជធានី ខណ្ឌ និងខេត្ត ច្បាប់ស្តីពីការគ្រប់គ្រងរដ្ឋបាល ឃុំ សង្កាត់ និងគោលនយោបាយកំណែទម្រង់វិម្ឈការ និងវិសហមជ្ឈការ របស់រាជរដ្ឋាភិបាល។

ក្នុងនោះ ឯកឧត្តម អគ្គនាយក ក៏បានបង្ហាញក្ដីសង្ឃឹម និងការជឿជាក់យ៉ាងមុតមាំថា ទាំងថ្នាក់ដឹកនាំ និងមន្ត្រីចំណុះនាយកដ្ឋាន នៅតែបន្តកិច្ចខិតខំទាំងអស់គ្នា រួមគ្នាគិត រួមធ្វើ និងរួមគ្នាទទួលខុសត្រូវ ព្រមទាំងការរិះរកមធ្យោបាយ និងវិធីសាស្ត្រថ្មី ដើម្បីសម្រេចបានស្នាដៃថ្មីបន្តទៀត និងកសាងនូវសមិទ្ធផលការងារស្របតាមកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល៕