រដ្ឋមន្រ្ដី កែវ រតនៈ ជួបសម្ដែងការគួរសម និងពិភាក្សាការងារជាមួយ ឯកអគ្គរដ្ឋទូតអាមេរិក ប្រចាំកម្ពុជា និងប្រតិភូជាន់ខ្ពស់ធនាគារពិភពលោក (World Bank)
ភ្នំពេញ៖ ឯកឧត្តម កែវ រតនៈ រដ្ឋមន្រ្ដីក្រសួងរ៉ែ និងថាមពល នាថ្ងៃទី២៨ ខែកញ្ញា ឆ្នាំ២០២៣ បានទទួលជួបសម្ដែងការគួរសម និងពិភាក្សាការងារជាមួយ ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា និងប្រតិភូជាន់ខ្ពស់ធនាគារពិភពលោក (World Bank) ដោយមានការចូលរួមពីថ្នាក់ដឹកនាំរបស់ក្រសួង នៅទីស្ដីការក្រសួងរ៉ែ និងថាមពល។
ក្នុងជំនួបពិភាក្សានេះ ឯកឧត្តម W. Patrick Murphy បានស្វែងយល់ពីគោលនយោបាយរបស់ក្រសួងរ៉ែ និងថាមពល និងបានកោតសរសើរពីគោលនយោបាយឧបត្ថម្ភធន (ការចេញខាត) ថ្លៃភ្លើងជួសប្រជាជនដោយរដ្ឋាភិបាល និងស្វែងរកការសហការទ្វេភាគីបន្ថែមទៀត។ ដោយឡែកប្រតិភូជាន់ខ្ពស់ធនាគារពិភពលោក ក៏បានត្រៀមខ្លួនសហការលើគ្រប់វិស័យជាមួយរាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត ៕
