សម្ដេចធិបតី ហ៊ុន ម៉ាណែត៖ ខ្ញុំចរចាជាមួយអន្តរជាតិ ខ្ញុំមិនឱ្យបាត់អាធិបតេយ្យភាព របស់ជាតិនោះទេ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងអះអាងថា សម្ដេចទៅចរចាជាមួយអន្តរជាតិ គឺមិនឱ្យបាត់អាធិបតេយ្យភាពរបស់ជាតិនោះទេ ហើយធ្វើការជាមួយមិត្ត ភក្តិគឺដោយគោរពអធិបតេយ្យភាព និងផលប្រយោជន៍គ្នាទៅវិញទៅមក ដោយស្មើមុខស្មើមាត់គ្នា ។

ក្នុងពិធីសំណេះសំណាលជាមួយកម្មករ និយោជិតចំនួន ១៨ ១០៤ នាក់ នៅក្នុងស្រុកបាទី ខេត្តតាកែវ នាថ្ងៃទី១៩ ខែកញ្ញា សម្តេចមហាបវរធិបតី ហ៊ុន ម៉ាណែត បានមានប្រសាសន៍ថា ដំណើរទស្សនកិច្ចរបស់សម្ដេច នៅចិនគឺដើម្បីបញ្ជាក់គោលជំហរ របស់រាជរដ្ឋាភិបាលថ្មីរបស់កម្ពុជាយើង ។ សម្ដេចថា គោលជំហររបស់កម្ពុជាយើងគឺឈរលើមូលដ្ឋានឯករាជ្យ អធិបតេយ្យភាព ដោយផ្អែកទៅលើច្បាប់ ។

សម្ដេចធិបតី បញ្ជាក់ថា គោជំហរគោលនយោបាយការទូត ជាមួយចិនដែលនៅតែរក្សាដដែល ព្រោះជាគោលនយោបាយ របស់គណបក្សប្រជាជនកម្ពុជា គឺគោលនយោបាយចិនមួយ ។

សម្តេចធិបតី អះអាងថា ប្រទេសកម្ពុជាតូច យើងត្រូវតែពង្រីកទំនាក់ទំនង ជាមួយអន្តរជាតិឱ្យបានច្រើន។ សម្តេចនាយករដ្ឋមន្រ្ដី ថា «ខ្ញុំចរចាជាមួយអន្តរជាតិ ខ្ញុំមិនឱ្យបាត់អាធិបតេយ្យភាពរបស់ជាតិនោះទេ ។ខ្ញុំធ្វើការជាមួយមិត្ត ភក្តិគឺដោយគោរពអធិបតេយ្យភាពនិងផលប្រយោជន៍គ្នាទៅវិញទៅមកដោយស្មើមុខស្មើមាត់គ្នា»។

នាយករដ្ឋមន្រ្ដី ហ៊ុន ម៉ាណែត ក៏បានលើកជាសំណួរថា តើប្រជាពលរដ្ឋខ្មែរយើង វាខុសអ្វីដែលយើងទៅបង្កើតមិត្តឱ្យច្រើននៅអន្តរជាតិនោះ។ យើងគួរតែអបអរសាទរ ដែលយើងបង្កើតមិត្តកាន់តែច្រើន សួរមើលតើធ្វើពាណិជ្ជកម្មជាមួយចិនវាអាក្រក់មែនទេ ហើយតើអាម៉េរិក អឺរ៉ុប ចាំបាច់ធ្វើពាណិជ្ជកម្មជាមួយចិនធ្វើអ្វី។ សម្ដេចធិបតីបានបញ្ជាក់ទៀតថា បើធ្វើពាណិជ្ជកម្មជាមួយចិនអាក្រក់ តើគេចាំបាច់ទៅធ្វើពាណិជ្ជកម្មជាមួយចិនធ្វើអី ។

សម្ដេចធិបតី ហ៊ុន ម៉ាណែត ថ្លែងទៀតថា ប្រទេសកម្ពុជាតូច តែយើងអង្គុយទល់មុខជាមួយ ប្រធានាធិបតី ស៊ី ជីនពីង នាយករដ្ឋមន្ត្រីចិន និងប្រធានសភារបស់ចិន ព្រមទាំងអង្គុយទល់មុខជាមួយនាយករដ្ឋមន្ត្រីជប៉ុន ជាមួយប្រធានាធិបតីកូរ៉េ ស្មើភាពគ្នា ចរចាក្នុងនាមជារដ្ឋអធិបតេយ្យភាពមួយ ដែលចេញទៅការពារផលប្រយោជន៍ប្រជាពលរដ្ឋ ៕