ទំនាក់ទំនងរុស្ស៊ី-ចិនឈានដល់កម្រិតប្រវត្តិសាស្ត្រដែលមិនធ្លាប់មានពីមុនមក នឹងបន្តពង្រឹងបន្ថែមទៀត

បរទេស៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃអង្គារបានអះអាងថា ទំនាក់ទំនងរវាងរុស្ស៊ី និងចិនបានឈានដល់កម្រិតប្រវត្តិសាស្ត្រដែលមិនធ្លាប់មានពីមុនមក។

ទីភ្នាក់ងារសារព័ត៌មានរដ្ឋ RIA របស់រុស្ស៊ីបានរាយការណ៍ថា ការអត្ថាធិប្បាយនេះ ខណៈដែលប្រធានាធិបតីរុស្ស៊ីបានជួបជាមួយឧបនាយករដ្ឋមន្ត្រីចិន លោក Zhang Guoqing កាលពីថ្ងៃអង្គារ។

ទីភ្នាក់ងារសារព័ត៌មានរដ្ឋ RIA បានដកស្រង់សម្តីលោកពូទីនថា ទំនាក់ទំនងរវាងរុស្ស៊ី និងចិនបានឈានដល់កម្រិតប្រវត្តិសាស្ត្រដែលមិនធ្លាប់មានពីមុនមកក្នុងប៉ុន្មានឆ្នាំថ្មីៗនេះ។

យោងតាមសេចក្តីរាយការណ៍ព័ត៌មាន លោក ពូទីន និងលោក Zhang Guoqing នឹងពិភាក្សាគ្នាក្នុងអំឡុងពេលកិច្ចប្រជុំរបស់ពួកគេទំនាក់ទំនងទ្វេភាគីនៅកម្រិតខ្ពស់បំផុត នៅចុងឆ្នាំនេះ ទីភ្នាក់ងាររុស្ស៊ីបានដកស្រង់សម្តីអ្នកនាំពាក្យរបស់វិមានក្រឹមឡាំងបាននិយាយកាលពីថ្ងៃអង្គារ។

លោកពូទីននឹងជួបជាមួយឧបនាយករដ្ឋមន្ត្រីចិននៅទីក្រុង Vladivostok ជាកន្លែងដែលរុស្ស៊ីកំពុងរៀបចំវេទិកាសេដ្ឋកិច្ចដ៏សំខាន់មួយក្នុងសប្តាហ៍នេះ។

ទីភ្នាក់ងាររុស្ស៊ីបានដកស្រង់សម្តីអ្នកនាំពាក្យ Dmitry Peskov បានឲ្យដឹងថា នេះគឺជាឱកាសមួយផ្សេងទៀតដើម្បីប្រៀបធៀបកំណត់ត្រាយ៉ាងឆាប់រហ័ស រួមទាំងនៅក្នុងបរិបទនៃទំនាក់ទំនងទ្វេភាគីនៅកម្រិតខ្ពស់បំផុតដែលបានគ្រោងទុកមុនដំណាច់ឆ្នាំនេះ។

ទីប្រឹក្សាគោលនយោបាយការបរទេសរបស់វិមានក្រឹមឡាំង លោក Yury Ushakov បានឲ្យដឹងកាលពីខែកក្កដាថា លោក ពូទីន គ្រោងនឹងទៅបំពេញទស្សនកិច្ចនៅប្រទេសចិនក្នុងខែតុលា នៅពេលនៃវេទិកា «ខ្សែក្រវាត់ និងផ្លូវ» លើកទី៣ របស់ខ្លួន ដោយឆ្លើយតបទៅនឹងការអញ្ជើញដែលចេញដោយប្រធានាធិបតីចិន លោក ស៊ី ជីងពីង ក្នុងអំឡុងពេលទស្សនកិច្ចផ្លូវរដ្ឋដ៏ខ្ពង់ខ្ពស់ទៅកាន់ប្រទេសរុស្ស៊ីកាលពីខែមីនា។

ប្រភព៖ Live Mint

ប្រែសម្រួលដោយ៖ {ឡាយ លីហួ}