អភិបាលរងខេត្តបន្ទាយមានជ័យ អញ្ជើញអបអរសាទរទិវាអន្តរជាតិ ជនជាតិភាគតិច លើកទី២៩ និងទី១៩ នៅកម្ពុជា
ភ្នំពេញ៖ លោក លី សុវណ្ណារិទ្ធ អភិបាលរងខេត្តបន្ទាយមានជ័យ នាថ្ងៃទី១១ ខែកញ្ញា ឆ្នាំ២០២៣ នៅវត្តសុវណ្ណបព្វតានារាម បានអញ្ជើញអបអរសាទរទិវាអន្តរជាតិ ជនជាតិដើមភាគតិចពិភពលោកលើកទី២៩ និង ទី១៩ ដែលមានជនជាតិដើមភាគតិចមួយក្រុម គឺជាជនតិចកួយរស់នៅ ក្នុងភូមិជ្រាប់ចាស់ និងភូមិជ្រាប់ថ្មី ឃុំជប់វារី ស្រុកព្រះនេត្រព្រះ ខេត្តបន្ទាយមានជ័យ ។ ក្នុងពិធីនោះលោកបាលរងខេត្ត បានថ្លែងថា យុវជនជាជនជាតិដើមភាគតិច ជាតួអង្គនៃការផ្លាស់ប្តូរដើម្បីសិទ្ធិស្វ័យសម្រេច ៩សីហា ២០២៣។
លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យបានមានប្រសាសន៍លើកឡើងថា៖រាជរដ្ឋាភិបាលកម្ពុជា ដែលដឹកនាំប្រកបដោយគតិបណ្ឌិតរបស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននឹងកំពុងយកចិត្តទុកដាក់និងលើកកម្ពស់សិទ្ធិជនជាតិដើមភាគតិច ដែលផ្តល់ឱកាសនិងទទួលស្គាល់សិទ្ធិជនជាតិដើមភាគតិច ក្នុងការបញ្ចេញមតិយោបល់របស់ខ្លួន គឺគោលបំណងចូលរួមយ៉ាងសកម្មទៅ ក្នុងការអភិវឌ្ឍប្រទេសជាតិ។ នៅក្នុងភូមិជ្រាប់ថ្មី មានចំនួន១៩៨គ្រួសារ មនុស្សរាយចំនួន៧៦៥នាក់ ស្ត្រីចំនួន៤០០នាក់ និងភូមិ ជ្រាប់ចាស់ មានចំនួន ២២៥គ្រួសារសរុបទាំង០២ភូមិមាន ចំនួន៤២៨គ្រួសារ ដែលពួកគាត់ភាគច្រើនប្រកបរបរកសិកម្មធ្វើស្រែចម្ការ។
លោកស្រី សោមសុម៉ាលី ដែលជាអនុប្រធាននាយកដ្ឋានអភិវឌ្ឍន៍ជនជាតិដើមភាគតិចនៃក្រសួងអភិវឌ្ឍន៍ជនបទនិងលោកលី សុវណ្ណារិទ្ធ អភិបាលរងខេត្តបានមានប្រសាសន៍ថា៖ ក្នុងឆ្នាំ២០២៣នេះ អង្គការសហប្រជាជាតិបានលើកយកប្រធានបទរួមមួយគឺយុវជនជនជាតិដើមភាគតិចជាតួអង្គនៃការផ្លាស់ប្តូរដើម្បីសិទ្ធិស្វ័យសម្រេច ប្រធានបទនេះពិតជាមានសារសំខាន់ណាស់ក្នុងការចូលរួមចំណែកអភិរក្សវប្បធម៌ប្រពៃណីទំនៀមទម្លាប់ និងភាសាដ៏ផូរផង់របស់បងប្អូនជនជាតិដើមភាគតិច ធានាដោយច្បាប់ជាតិនិងគោលនយោបាយជាតិនានា តាមរយៈការប្ដេជ្ញាចិត្តរបស់រាជរដ្ឋាភិបាលកម្ពុជា បានផ្តល់ឱកាសនិងលើកកម្ពស់សិទ្ធិសេរីភាព សេដ្ឋកិច្ចសង្គម វប្បធម៌និងការបញ្ចេញមតិយោបល់ដើម្បីការអភិវឌ្ឍលើគ្រប់វិស័យតាមរយៈគម្រោងអភិវឌ្ឍន៍នានា។
នាឱកាសនោះដេរ លោក លី សុវណ្ណារិទ្ធិ ក៏បានសំណូមពរមួយចំនួនទៅកាន់ពុកម៉ែបងប្អូនដែលជាជនជាតិដើមភាគតិចសុំឲ្យចូលរួមអនុវត្តនូវសិទ្ធិរបស់ខ្លួននិងមានមោទកភាពចំពោះខ្លួនឯង ដែលជាជនជាតិដើមភាគតិចកួយ បន្តជំរុញកូនចៅឲ្យទទួលនូវការអប់រំនិងរៀនសូត្រពេញមួយជីវិត ដើម្បីឲ្យពួកគេជាអ្នកបន្តវេនប្រកបដោយប្រសិទ្ធភាព នាពេលអនាគតស្របទៅនឹងប្រធានបទនៃទិវាឆ្នាំនេះ បន្តបង្រៀនកូនចៅពីចំណេះដឹងជនជាតិដើមភាគតិចដើម្បីនិរន្តរភាពនៃចំណេះដឹងរបស់ដូនតា៕
