ឧត្តមសេនីយ៍ឯក ងួន ស្រេង អញ្ជើញចូលរួមពិធីសំណេះសំណាលជាមួយថ្នាក់ដឹកនាំ នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ
ភ្នំពេញ៖ ឯកឧត្តម ឧត្តមសេនីយ៍ឯក ងួន ស្រេង អគ្គនាយក នៃអគ្គនាយកដ្ឋានសវនកម្មផ្ទៃក្នុង នាព្រឹកថ្ងៃសុក្រ ៨រោច ខែស្រាពណ៍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០៨ ខែកញ្ញា ឆ្នាំ២០២៣ បានអញ្ជើញចូលរួមពិធីសំណេះសំណាលជាមួយថ្នាក់ដឹកនាំ នៃអគ្គនាយកដ្ឋានសវនកម្មផ្ទៃក្នុង ក្រសួងមហាផ្ទៃ ក្រោមអធិបតីភាពដ៏ខ្ពង់ខ្ពស់ ឯកឧត្តម រស់ វរុណ រដ្ឋលេខាធិការ ទទួលបន្ទុកអគ្គនាយកដ្ឋានសវនកម្មផ្ទៃក្នុង ដោយមានការអញ្ជើញចូលរួមពី ឯកឧត្តម លោកជំទាវ អនុរដ្ឋលេខាធិការ ឯកឧត្តម លោកជំទាវ អគ្គនាយករង និងលោក ប្រធាននាយកដ្ឋាន នៅសាលប្រជុំអគ្គនាយកដ្ឋានសវនកម្មផ្ទៃក្នុង (ជាន់ទី៣) ទីស្តីការក្រសួងមហាផ្ទៃ។
ជាកិច្ចចាប់ផ្តើម ឯកឧត្តម ឧត្តមសេនីយ៍ឯក អគ្គនាយក មានមតិស្វាគមន៍យ៉ាងកក់ក្តៅ និងមានសេចក្តីសោមមនស្សរីករាយ ចំពោះ ឯកឧត្តម រដ្ឋលេខាធិការដែលទទួលបន្ទុកការងារអគ្គនាយកដ្ឋានសវនកម្មផ្ទៃក្នុង។
ឆ្លៀតក្នុងឱកាសនោះ ឯកឧត្តម ឧត្តមសេនីយ៍ឯក អគ្គនាយក បានគោរពរាយការណ៍ជូនឯកឧត្តម រដ្ឋលេខាធិការ ទទួលបន្ទុក អំពីស្ថានភាពក្របខ័ណ្ឌមន្រ្តីរាជការស៊ីវិល និងមន្រ្តីនគរបាលជាតិ ចំណុះអគ្គនាយកដ្ឋាន និងលទ្ធផលដែលសម្រេចបាននាពេលកន្លងមក ព្រមទាំងទិសដៅការងាររបស់អគ្គនាយកដ្ឋាននាថ្ងៃអនាគត។
ជាកិច្ចបន្ទាប់ ឯកឧត្តមរដ្ឋលេខាធិការ បានថ្លែងអំណអរគុណដល់ថ្នាក់ដឹកនាំ ចំណុះអគ្គនាយកដ្ឋានសវនកម្មផ្ទៃក្នុង ដែលបានខិតខំប្រឹងប្រែងបំពេញការងារជូនអង្គភាព ដែលទទួលបានលទ្ធផលជាផ្លែផ្កានាពេលនេះ។ ឯកឧត្តម រដ្ឋលេខាធិការ បានបន្ថែមថា ដោយមានសេចក្តីទុកចិត្តពី ឯកឧត្តម អភិសន្តិបណ្ឌិត ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ ឲ្យមកទទួលជួយការងារអគ្គនាយកដ្ឋានសវនកម្មផ្ទៃក្នុង ដើម្បីនិរន្តភាព និងមានវឌ្ឃនភាពការងាររបស់អង្គភាព ដោយអនុលោមតាមផែនការយុទ្ធសាស្រ្តរបស់ក្រសួងមហាផ្ទៃ។
ក្នុងន័យនេះ ឯកឧត្តមរដ្ឋលេខាធិការ បានផ្តាំផ្ញើ និងជំរុញដល់ថ្នាក់ដឹកនាំ នៃអគ្គនាយកដ្ឋានសវនកម្មផ្ទៃក្នុង បន្តអនុវត្តតួនាទីភារកិច្ចរបស់ខ្លួន ដែលថ្នាក់ដឹកនាំក្រសួងមហាផ្ទៃប្រគល់ជូន និងមានការសាមគ្គីភាពផ្ទៃក្នុង គោរពតាមភិក្រមទាំង៣គឺ៖
១. កុំឈ្លោះគ្នា, កុំចោទប្រកាន់គ្នា,កុំច្រណែនគ្នា
២. គួរស្រលាញ់គ្នា, គួរជ្រោមជ្រែងគ្នា, គួរសាទរគ្នា
៣. គួរឱបដើមឈើក្រសួងមហាផ្ទៃឱ្យបានជោគជ័យ ៕
