ឯកឧត្តម វុី សំណាង អញ្ជើញផ្ដល់ប័ណ្ណសរសើរ ដល់គណៈកម្មាធិការគណបក្សក្រុង ស្រុក ឃុំ សង្កាត់ ដែលបានបំពេញភារកិច្ចក្នុងអំឡុងពេលបោះឆ្នោត ឆ្នាំ២០២៣ ក្នុងខេត្តកំពង់ស្ពឺ
ភ្នំពេញ៖ ឯកឧត្តម វុី សំណាង សមាជិកគណៈកម្មាធិការកណ្ដា និងជាប្រធានគណៈកម្មាធិការគណបក្សខេត្តកំពង់ស្ពឺ នាព្រឹកថ្ងៃសុក្រ ៩កើត ខែស្រាពណ៍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៥ ខែសីហា ឆ្នាំ២០២៣ បានអញ្ជើញជាធិបតីក្នុងពិធីផ្ដល់លិខិតថ្លែងអំណរគុណ ប័ណ្ណសរសើរ និងលិខិតសរសើរ ដល់គណៈកម្មាធិការគណបក្សក្រុង ស្រុក និងគណៈកម្មាធិការគណបក្សឃុំ សង្កាត់ ដែលបានបំពេញភារកិច្ចក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ទទួលបានលទ្ធផលយ៉ាងត្រចះត្រចង់។
ដោយមានការអញ្ជើញចូលរួមពីសំណាក់ ឯកឧត្តម យឹម សុខុម សមាជិកគណៈកម្មាធិការកណ្ដាល និងជាអនុប្រធានគណៈកម្មាធិការគណបក្សខេត្ត និងឯកឧត្តម អុិន ឃុន អនុប្រធានគណៈកម្មាធិការគណបក្សខេត្ត និងជាប្រធានមន្ទីរគណបក្សខេត្ត ព្រមទាំងឯកឧត្តម លោកជំទាវ លោក លោកស្រី សមាជិក សមាជិកា គណៈអចិន្ត្រៃយ៍គណៈកម្មាធិការគណបក្សខេត្ត ប្រធានគណៈកម្មាធិការគណបក្សមូលដ្ឋាន ប្រធានសាខាបក្សមន្ទីរអង្គភាព ជុំវិញខេត្ត លោកប្រធានគណៈកម្មាធិការគណបក្សក្រុង ស្រុក និងលោក លោកស្រីប្រធានគណៈកម្មាធិការគណបក្សឃុំ សង្កាត់ សរុបចំនួន ៣៥០នាក់ នៅសាលប្រជុំធំមន្ទីរគណបក្សខេត្ត ៕
