សភាសម្ព័ន្ធសហជីពជាតិកម្ពុជា សូមអបអរសាទរ ឯកឧត្តមបណ្ឌិត ហ៊ុន ម៉ាណែត ក្នុងឱកាសដែលព្រះមហាក្សត្រផ្តល់គោរមងារកិត្តិយសពិសេសដ៏ឧត្តុងឧត្តមបំផុតនៃរាជបណ្ឌិតសភាកម្ពុជាជា កិត្តិទេសាភិបាលបណ្ឌិត ជូនឯកឧត្តមបណ្ឌិត ហ៊ុន ម៉ាណែតតែមួយរូបគត់
ភ្នំពេញ៖ ឯកឧត្តម សួង ហួត ប្រធានសភាសម្ព័ន្ធសហជីពជាតិកម្ពុជា(NACC) តំណាង ៦៤ សហព័ន្ធសហជីព និងអង្គការ-សមាគម ដែលមានសមាជិកសមាជិកាជាកម្មករ និយោជិត គ្រូបង្រៀន និស្សិតបញ្ញាវន្ត កំពង់បម្រើការនៅក្នុងវិស័យកាត់ដេរសម្លៀកបំពាក់ ស្បែកជើង កាបូប វិស័យអប់រំ កសិកម្ម សេវាកម្ម ដឹកជញ្ជូន និងសេដ្ឋកិច្ចក្រៅប្រព័ន្ធ សូមសម្ដែងនូវអំណរសាទរប្រកបដោយក្ដីរំភើបឥតឧបមាគោរពជូនចំពោះ ឯកឧត្តមបណ្ឌិត ហ៊ុន ម៉ាណែត នាឱកាសដ៏មហានក្ខត្តឬក្ស និងឧត្តុង្គឧត្តមបំផុត ដែលត្រូវបាន ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ត្រាស់បង្គាប់ចាត់តាំងជា នាយករដ្ឋមន្ដ្រី នៃព្រះរាជាណាចក្រកម្ពុជា សម្រាប់នីតិកាលទី៧ នៃរដ្ឋសភា នៅថ្ងៃទី៧ ខែសីហា ឆ្នាំ២០២៣ នេះ និងបានផ្តល់គោរមងារកិត្តិយសពិសេសដ៏ឧត្តុង្គឧត្តមបំផុតនៃរាជបណ្ឌិតសភាកម្ពុជា ជា កិត្តិតេសាភិបាលបណ្ឌិត ជូនឯកឧត្តមបណ្ឌិត ហ៊ុន ម៉ាណែត តែមួយរូបគត់។
តាមរយៈសាលិខិតអបអរសាទរ សភាសម្ព័ន្ធសហជីពជាតិកម្ពុជា បានចាត់ទុកឯកឧត្តមបណ្ឌិត ហ៊ុន ម៉ាណែតជាថ្នាក់ដឹកនាំវ័យក្មេង និងជាបញ្ញាវន្ដខ្មែរដ៏ឆ្នើម ពោរពេញដោយសមត្ថភាព និងទេពកោសល្យ ដែលសក្តិសមបំផុតនិងទទួលបាននូវការចាត់តាំងនេះដោយសារឯកឧត្តមបណ្ឌិតបានលះបង់កម្លាំងកាយ ចិត្ត និងប្រាជ្ញាស្មារតីក្នុងបុព្វហេតុជាតិ សាសនា និងព្រះមហាក្សត្រ ដែលបានឆ្លុះបញ្ចាំងឱ្យឃើញពីគុណវឌ្ឍិ នៃភាពជាអ្នកដឹកនាំជាន់ខ្ពស់ប្រកបដោយភាពឈ្លាសវៃសម្រាប់បន្ដដឹកនាំរាជរដ្ឋាភិបាលនៃព្រះរាជាណាចក្រកម្ពុជា ដើម្បីការពាររដ្ឋធម្មនុញ្ញា អធិបតេយ្យភាព បូរណភាពទឹកដី សុខសន្ដិភាព ស្ថិរភាពសង្គម-សេដ្ឋកិច្ច នាំមកនូវវឌ្ឍនភាព វិបុលភាព និងសុភមង្គលជូនប្រជានកម្ពុជា ព្រមទាំងបន្ដលើកកម្ពស់កិត្យានុភាពជាតិឱ្យកាន់តែល្បីល្បាញនៅក្នុងតំបន់ និងសកលលោក។
ឯកឧត្តម សួង ហួត បានបញ្ជាក់ថា « យើងខ្ញុំទាំងអស់គ្នា សូមយកឱកាសដ៏វិសេសវិសាលនេះ បួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្ដិសិទ្ធិទាំងឡាយក្នុងលោក និងទេវតាថែរក្សាទឹកដី នៃព្រះរាជាណាចក្រកម្ពុជា សូមជួយប្រសិទ្ធពរជ័យបវរសួស្ដី សិរីមណ្ឌល វិបុលសុខ មហាប្រសើរជូន ឯកឧត្តមបណ្ឌិត ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា និងលោកជំទាវ ព្រមទាំងក្រុមគ្រួសារជាទីគោរពស្រឡាញ់ សូមបានសមប្រកបនូវពុទ្ធពរទាំង៤ ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ»៕
