រដ្ឋបាលខេត្តរតនគិរី នាំយកទៀនព្រះវស្សានិងទេយ្យវត្ថុគ្រឿងឧបភោគបរិភោគប្រគេនព្រះសង្ឃគង់ចាំព្រះវស្សាចំនួន ៣៦វត្ត នៅទូទាំងខេត្ត
ភ្នំពេញ៖ ឯកឧត្តម ណាប់ ប៊ុនហេង ប្រធានក្រុមប្រឹក្សាខេត្តរតនគិរី និងឯកឧត្តម ញ៉ែម សំអឿន អភិបាល នៃគណៈអភិបាលខេត្តរតនគិរី និងលោកជំទាវ នាព្រឹកថ្ងៃសុក្រ១១កើត ខែទុតិយាសាឍ ឆ្នាំថោះ បញ្ចសក័ ព.ស ២៥៦៧ ត្រូវនឹងព្រឹកថ្ងៃទី២៨ ខែកក្កដា ឆ្នាំ២០២៣ បានដឹកនាំមន្ត្រីរាជការ កងកម្លាំងប្រដាប់អាវុធ និងពុទ្ធបរិស័ទចំណុះជើងវត្ត នាំយកទៀនព្រះវស្សា ទេយ្យវត្ថុ គ្រឿងឧបភោគបរិភោគ និងបច្ច័យប្រគេនដល់ព្រះសង្ឃដែលគង់ចាំព្រះវស្សានៅតាមបណ្តាវត្តនានាក្នុងខេត្តចំនួន ៣៦វត្ត នៅទូទាំងខេត្ត សម្រាប់ទ្រទ្រង់ដល់ព្រះសង្ឃគង់ចាំព្រះវស្សាអស់កាលត្រីមាសនៅតាមវត្តនីមួយៗក្នុងរយះពេល០៣ខែ។ដែលពិធីប្រគេនព្រះវស្សានេះប្រារព្ធឡើងនៅវត្ត ឥសាន្តរតនារាម(វត្តភ្នំស្វាយ) ស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី។
មានប្រសាសន៍នាឱកាសនេះ ឯកឧត្តម ញ៉ែម សំអឿន បានលើកឡើងថា ពិធីបុណ្យចូលព្រះវស្សា គឺជាពិធីបុណ្យសាសនារបស់ខ្មែរតាំងពីដូនតា នៃបុព្វបុរសរបស់យើង ហើយបុណ្យចូលព្រះវស្សា គឺចាប់ផ្តើមពីថ្ងៃ១រោច ខែអាសាឍ រហូតដល់ថ្ងៃ ១៥កើត ខែអស្សុជ មានរយៈពេល៣ខែ ដែលជារដូវដែលមានភ្លៀងធ្លាក់ជោគជាំ ជាហេតុធ្វើឱ្យព្រះសង្ឃមិនបាននិមន្តចេញទៅបិណ្ឌបាត្របានក្នុងរយៈពេល ៣ខែ។ដូច្នេះ ក្នុងនាមយើងជាមន្ត្រីរាជការ កងកម្លាំងប្រដាប់អាវុធ និងប្រជាពុទ្ធបរិស័ទ្ធកាន់ព្រះពុទ្ធសាសនា ត្រូវចូលរួមចំណែកនូវសទ្ធាជ្រះថ្លាចូលរួមក្នុងវិស័យពុទ្ធសាសនាដែលជាសាសនារបស់រដ្ឋ។
ទេយ្យវត្ថុ និងទេយ្យទានដែលបានប្រគេនព្រះសង្ឃចំនួន ៣៦វត្ត ក្នុងខេត្តរតនគិរី ក្នុងមួយវត្តទទួលបាន៖
១-ទៀនវស្សា១គូរ
២- អង្ករ ១០០គីឡូក្រាម
៣-មី ១កេសធំ
៤-អំបិល ១០គីឡូក្រាម
៥-ទឹកសុីអុីវ ១យួរ
៦-ត្រីខ ៣យួរ
៧-ទឹកត្រី ១យួរ
៨-ប្រេងឆា ៥លីត្រ
៩-ប៊ីចេង ២កញ្ចប់
១០-បច្ច័យ ១០មុឺនរៀល ៕
