ប៉េកាំង៖ ប្រទេសចិន និងរុស្ស៊ីចាំបាច់ត្រូវដឹកនាំទិសដៅត្រឹមត្រូវនៃកំណែទម្រង់អភិបាលកិច្ចពិភពលោក នេះបើយោងតាមប្រធានាធិបតីចិន លោក Xi Jinping ដែលបានសាទរចំពោះភាពជាដៃគូរបស់ប្រទេសទាំងពីរនៅក្នុងកិច្ចប្រជុំជាមួយអ្នកនយោបាយកំពូលរុស្ស៊ីនៅទីក្រុងប៉េកាំងកាលពីថ្ងៃចន្ទ (១០ កក្កដា) រដ្ឋប្រព័ន្ធផ្សព្វផ្សាយបានរាយការណ៍។
ទីក្រុងប៉េកាំង និងទីក្រុងមូស្គូបានបង្កើនកិច្ចសហប្រតិបត្តិការសេដ្ឋកិច្ច និងទំនាក់ទំនងការទូតក្នុងប៉ុន្មានឆ្នាំថ្មីៗនេះ ជាមួយនឹងការផ្លាស់ប្តូរកាន់តែជិតស្និទ្ធចាប់តាំងពីការឈ្លានពានរបស់រុស្ស៊ីលើអ៊ុយក្រែនកាលពីឆ្នាំមុន។
ទូរទស្សន៍រដ្ឋ CCTV បានរាយការណ៍ថា កាលពីថ្ងៃច័ន្ទ លោក Xi Jinping បានជួបជាមួយលោក Valentina Matviyenko ប្រធានក្រុមប្រឹក្សាសហព័ន្ធ – សភាជាន់ខ្ពស់របស់សភារុស្ស៊ី នៅសាលមហាសន្និបាតរបស់ប្រជាជន។
លោក Xi Jinping បានឲ្យដឹងថា ការអភិវឌ្ឍន៍ទំនាក់ទំនងរវាងប្រទេសទាំងពីរគឺជា ជម្រើសយុទ្ធសាស្ត្រដែលធ្វើឡើងដោយប្រទេសទាំងពីរដោយផ្អែកលើផលប្រយោជន៍ជាមូលដ្ឋាននៃប្រទេស និងប្រជាជនរៀងៗខ្លួន នេះបើយោងតាមទូរទស្សន៍ CCTV។
សេចក្តីថ្លែងការណ៍បានបន្តទៀតថា ភាគីទាំងពីរក៏ត្រូវពង្រឹងទំនាក់ទំនង និងកិច្ចសហប្រតិបត្តិការក្នុងយន្តការពហុភាគីដូចជា អង្គការសហប្រតិបត្តិការសៀងហៃ និងបណ្តាប្រទេស BRICS ដឹកនាំទិសដៅត្រឹមត្រូវនៃកំណែទម្រង់អភិបាលកិច្ចសកល និងការពារផលប្រយោជន៍រួមរបស់ប្រទេសទីផ្សារដែលកំពុងរីកចម្រើន និងប្រទេសកំពុងអភិវឌ្ឍន៍។
កាលពីថ្ងៃចន្ទ មេដឹកនាំលោកខាងលិចបានប្រមូលផ្តុំគ្នានៅក្នុងរដ្ឋធានីរបស់ប្រទេសលីទុយអានី មុនពេលកិច្ចប្រជុំកំពូលមួយ ដែលរំពឹងថានឹងបង្ហាញការរួបរួមស្តីពីសមាជិកភាពនាពេលអនាគតរបស់អ៊ុយក្រែននៃសម្ព័ន្ធមិត្តយោធាណាតូ ដែលជាការរំពឹងទុកដែលរុស្ស៊ីបានប្រតិកម្មយ៉ាងខឹងសម្បារ។
ទីក្រុងប៉េកាំងបានឲ្យដឹងថា ខ្លួនជាភាគីអព្យាក្រឹតក្នុងសង្គ្រាម ប៉ុន្តែការបដិសេធរបស់ខ្លួនក្នុងការថ្កោលទោសការឈ្លានពាននេះបាននាំឱ្យសម្ព័ន្ធមិត្តជាច្រើនរបស់ទីក្រុងគៀវ ចោទប្រកាន់ថា ខ្លួនពេញចិត្តនឹងរុស្ស៊ី។
លោក Matviyenko កាលពីថ្ងៃចន្ទបានឲ្យដឹងថា ភាពជាដៃគូយុទ្ធសាស្ត្ររវាងទីក្រុងប៉េកាំង និងទីក្រុងមូស្គូ បានឈានដល់កម្រិតខ្ពស់បំផុតក្នុងប្រវត្តិសាស្ត្រ ហើយបន្តអភិវឌ្ឍជាលំដាប់ នេះបើយោងតាមទូរទស្សន៍ CCTV។
លោកបានបន្តថា ដំណើរទស្សនកិច្ចនៅខែមីនារបស់លោក Xi Jinping ទៅកាន់ទីក្រុងមូស្គូ ជាកន្លែងដែលលោកបានជួបសមភាគីលោក វ្ល៉ាឌីមៀ ពូទីន បាន បញ្ចូលកម្លាំងរុញច្រានយ៉ាងខ្លាំងក្លាទៅក្នុងការអភិវឌ្ឍន៍បន្ថែមទៀតនៃទំនាក់ទំនងរុស្ស៊ី-ចិន។
លោក Xi Jinping បានឲ្យដឹងថា ប្រទេសចិនមានឆន្ទៈក្នុងការបន្តធ្វើការជាមួយប្រទេសរុស្ស៊ីដើម្បីបង្កើតភាពជាដៃគូយុទ្ធសាស្ត្រដ៏ទូលំទូលាយនៃជំនួយទៅវិញទៅមក សមាហរណកម្មស៊ីជម្រៅ ការបង្កើតថ្មី និងកិច្ចសហប្រតិបត្តិការរួមបញ្ចូលក្នុងយុគសម័យថ្មី។
ប្រភព៖ CNA
ប្រែសម្រួលដោយ៖ {ឡាយ លីហួ}
