សម្តេចតេជោ អំពាវនាវដល់ប្រទេសនានា ពិនិត្យមើលការបង្ហោះដ្រូនចូលដីកម្ពុជា ដែលនេះជាការបំពានទាំងស្រុងលើឯករាជ្យ អធិបតេយ្យភាពរបស់កម្ពុជា
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់បណ្ដាប្រទេសនានា ពិនិត្យមើលការបង្ហោះត្រូនចូលដីកម្ពុជា ដែលនេះជាការបំពានទាំងស្រុងលើឯករាជ្យ អធិបតេយ្យភាពរបស់កម្ពុជា ខណៈសម្ដេចជឿថា ដ្រូននេះមិនមែនរបស់វៀតណាមទេ ។
ក្នុងឱកាសចុះជួបកម្មករ កម្មការិនី ជិត២ម៉ឺននាក់ទៀត នៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញ នាថ្ងៃទី២៨ ខែមិថុនា ឆ្នាំ២០២៣ សម្តេចតេជោ ហ៊ុន សែន បានបញ្ជាក់ថា «ខ្ញុំអំពាវនាវដល់ប្រទេសនានាពិនិត្យមើល នេះជាការបំពានទាំងស្រុងលើឯករាជ្យ អធិបតេយ្យភាពរបស់កម្ពុជា។ យើងសួរទៅវៀតណាម វៀតណាមអត់ទាំងដឹងផង ហើយវៀតណាមគាត់មានផលប្រយោជន៍អីនឹងការបង្ហោះដ្រូនមក ដោយមិនជូនដំណឹងឱ្យកម្ពុជា ហើយត្រូវចូលមកកម្ពុជា ព្រោះកម្ពុជាមានសមត្ថភាព ដើម្បីរុករកជួយពួកគាត់ហើយ បើគាត់ហោះ ហោះតែក្នុងដីគាត់ទៅ ប៉ុន្តែខ្ញុំជឿថាមិនមែនរបស់វៀតណាមទេ»។
សម្តេចតេជោ បានបញ្ជាដល់កងទ័ព និងកម្លាំងប្រដាប់អាវុធថា «សំខាន់បំផុតចាប់ពីយប់នេះទៅ គឺត្រូវតែបាញ់ ហើយត្រូវរាយការណ៍ឱ្យខ្ញុំ កុំបារម្ភថាយប់ហើយលោកនាយករដ្ឋមន្ត្រីដេក កុំបារម្ភឱ្យសោះ វាយផ្ញើមកម៉ោងប៉ុន្មានក៏ដោយ រឿងទ័ព រឿងសន្តិសុខជាតិ គឺខ្ញុំមានការគិតគូរខ្ពស់ណាស់ ដើម្បីធានាអាយុជីវិតរបស់ប្រជាជន» ៕
