ភ្នំពេញ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ថា ដាច់ខាតមិនលើកលែងទោសឲ្យទណ្ឌិត សម រង្ស៊ី ដែលកំពុងរស់នៅក្រៅស្រុកនោះឡើយ។
ក្នុងឱកាសអញ្ជើញជាអធិបតីប្រជុំបូកសរុប របាយការណ៍ប្រចាំអាណត្តិទី៦ របស់ក្រុមការងាររាជរដ្ឋាភិបាលចុះមូលដ្ឋាន នៅថ្ងៃទី១៩ ខែមិថុនានេះ សម្តេចតេជោ ហ៊ុន សែន បានថ្លែងថា អ្នកជំនាន់ក្រោយរបស់បក្សប្រជាជនកម្ពុជា មិនលើកលែងទោស ឱ្យក្រុមប្រឆាំងក្រៅប្រទេសនោះឡើយ។ សម្តេចតេជោ ក៏បានបន្តចំអកឱ្យក្រុមប្រឆាំងថា មិនមានមនុស្សសម្រាប់បន្តវេន។
សម្តេចតេជោ បានបញ្ជាក់យ៉ាងដូច្នេះថា “អត់លើកលែងទោសឲ្យហ្អែងទេ (សម រស្ស៉ី) ហើយបើមានអ្នកជំនាន់ក្រោយចូលមក ក៏អត់មានអ្នកលើកលែងទោសឲ្យហ្អែងដែរ។ ហ្អែង ក៏អត់ចូលស្រុកបានរហូត។ ឥលូវ អាយុសុទ្ធតែជាង ៧០ឆ្នាំហើយ សល់ ៥ឆ្នាំប៉ុន្មានដងទៀត? មុខពួកហ្អែងនេះអត់មានអ្នកបន្តវេនទេ។ ប្រៀបធៀបនឹងគណបក្សប្រជាជន មានរាប់រយរាប់ពាន់នាក់”។
ជាមួយគ្នានេះ សម្រេចតេជោ បានព្រមានថា ក្រោយច្បាប់ស្តីពីការបោះឆ្នោត ត្រូវបានកែប្រែហើយ អ្នកដែលបង្កបញ្ហាពាក់ព័ន្ធនឹងការបោះឆ្នោតជ្រើសតាំងតំណាងរាស្ត្រ អាណត្តិទី៧ ដឹងតែមានបញ្ហាហើយ។ សម្តេចតេជោ បានថ្លែងថា គុក គេធ្វើសម្រាប់ដាក់មនុស្សខូច។
បន្ថែមលើនេះ សម្តេចតេជោ ហ៊ុន សែន បានថ្លែងថា ភាព «ភ្លើ» របស់មេក្រុមប្រឆាំង ជាឱកាសសម្រាប់បក្សប្រជាជនកម្ពុជា ទទួលបានជោគជ័យលើការគ្រប់គ្រងប្រទេស។
សម្តេចតេជោ ក៏បានថ្លែងអំណរគុណមេក្រុមប្រឆាំង ដែលសម្តេចហៅថា «អាល្ងង់» នាំគ្នារត់ទៅក្រៅប្រទេសអស់នៅឆ្នាំ២០១៧ និង២០១៨៕
